Read obolo Ito 4 Bible Online

Ito 4 - obolo bible

Ito 4

¹Jei, alata araran̄ ìkayaka ìkebe, atalek alata araran̄ ìkayaka ìtoon̄! Mîtọọn̄ ewuuk unye otu ewe òkup mbuban cha iyiyala ikana me ibot oniin̄ geelek.

²Jei, bọn ebirieen̄ Sayọn, ìkup me unye otu ewe kubọk alata araran̄, mgbọ keyi efuk ema kubọk otin̄ ibat, kubọk ema ìre ubọk ikwaan̄ ogwu òbot otin̄.

³Ebi kè ibo oron afa mîsan̄a ebe kiban̄ isibi inyi ebi bọn enwọ, ire, ebibaan̄ ebi n̄a efieek kubọk wukuwuku emen èwê.

⁴Alọm îgba igọm me otu gwun̄ òkup me otu ebe, mije urak-ebek; asa nsabọn mîbeek inorie igak, kpunu ogwu ònyinyi ema erie.

⁵Ebi ìkirie utop otu mgbọ orebe, eyaka inikinyinya ikana me lek oniin̄ ikibeek inu mgbọ keyi. Ebi mgbọ ìkisa ekwut irio irio ibala lek, eyaka inikirọọn̄ inu me inyọn̄ otiton mgbọ keyi.

⁶Osusut ijo inu ebi kiji, îmin igak eyi ebi Sodọm, ebi ama kiban̄ otakabe iriọk mgbọ yaage fiâm, ubọk ogwu ebilene ìkanin̄ me lek.

⁷Me adasi mgbọ, ebi ibot mkpulu Jeruselem mîtoon̄ me ugwem igak abalara, mè itana okuket igak mun̄ ebe, nriro lek kiban̄ ìkup irio irio kubọk ewuuk rubi, akpalek kiban̄ ìrọt ikup kubọk lek ewuuk safaya.

⁸Ire, me mgbọ keyi, akpalek kiban̄ îfit igak mfifit ukan̄, kpeyaka iriọọn̄ ema isi me lek oniin̄; akpa kiban̄ îgba ikam me lek ukwuuk; ema eyaka inikup nchat nchat kubọk uti.

⁹Ebi ìkwaan̄ me otu oge akọn̄ enwọn igak ebi ìkwaan̄ me ubọk akan̄, ebibi ekwaan̄ mkpa ofaak me ubọk uraafiọọn̄, mije una inorie ònan̄a me uko.

¹⁰Ebibaan̄ ìkaan̄ ata ejit mîsa ubọk kiban̄ item bọn kiban̄, mè isa irọ inorie irie me mgbọ ejijakabe ebi kiji igwook.

¹¹Okumugwem îgwuku unaan̄-ejit kan̄ ibook ire okputut, îgbuku uyok uyok unaan̄-ejit kan̄ igwook. Îtap ukan̄ me Sayọn, itataka ama ya iriọk ire lek ọdọ kan̄.

¹²Ebi ubọọn̄ linyọn̄ kpechieek, otutuuk ebi linyọn̄ kpechechieek si ibe ke ebi oriara mè ebi ochicha mêkọt ije itibi iraka otunchit inin̄ Jeruselem.

¹³Inu yi ìrọ mije ijo inu ebi nriran kan̄ erọbe, mè nrọ-nlọ ebi ngwugwa kan̄ erọbe. Ema ekup me emen ama ya ifiat eje ebi ata irọrọ.

¹⁴Mgbọ keyi, ema ekitutun ikana lek oniin̄ ikiweek agan̄, kubọk ebi ǹnàan̄. Eje ene îchaka ema mbuban me lek, ire lek, ebi ene kpekọt ichak ubọk me lek ofọnti kiban̄.

¹⁵Ebi ene ekibe ema, “Ìje ìnan̄a! Mbuban me lek kinyi! Ìje ìnan̄a! Ìje ìnan̄a! Ikachak eji ubọk me lek!” Mgbọ ema eliliin̄be, mè isi ikinyinya ikana me etete ebi ofifi ido, ife cha mîra ikitumu ibe, “Ema kpebeyaka ikpọk iluk me ere keyi igak ikeya.”

¹⁶Okumugwem me lek kan̄ oyiyala ema isan̄a, ìkayaka ìkpọ ema chieen̄ me lek. Ìkayaka ìnyi ebi ngwugwa ulibi, ìkayaka ìkaan̄ ata ejit me lek ebi ugane.

¹⁷Chieen̄ îwọ eji ikpọkpọ ntap-ubọk ikakaan̄ge ibot; eji ekup me uwu-oket kiji ikikpọ ido eyi ìkpokọt inyan̄a eji.

¹⁸Ebi ochicha ekikpọ eji akpat ukot, eji kpeyaka ikọt ikije me lek oniin̄ kiji. Òta mgbọ kiji îgbet, usen kiji îso, mije, mgbọ kiji îre.

¹⁹Ebi ìkililaba eji mîfet ukot igak igo òkiwulu me akpabin inyọn̄; ema ekigọọk eji ikana me inyọn̄ ogoon̄, mè ikilileek me emen èwê ikpọ eji.

²⁰Ogwu ubọọn̄ kiji, ogwu Okumugwem otọkọbe aran̄ me ibot, ogwu òre efuuk ugwem kiji, ogwu eji ekibe ke eji mêluk me irak okwukwek kan̄ me etete ebi ofifi ido, ema mîtet me otu ufe kiban̄.

²¹Enyi ebi Edọm, ebi ìluk me lek ijọn̄ Usu, ìnwọọn̄ unwọọn̄, mè ìbele ejit. Ire, ekpen̄ ya môkana si inin̄ enyi ubọk; enyi mênwọ isa, mè iben njak kinyi iwele me oyet.

²²Jei Sayọn, osusut ijo inu kwun̄ îta, ìkpoyaka itap owu me usun̄ akọn̄ ofifi. Ire, enyi ebi Edọm, Okumugwem môsut enyi osusut mije nrọ-nlọ kinyi, mè irọ ibe ijo inu kinyi ikpọk mbum.