Read obolo Ito 5 Bible Online

Ito 5 - obolo bible

Ito 5

¹Jei Okumugwem, keek inu òrọrọn̄ ikeme eji, kpọ, mè mun̄ esip òkup eji me isi.

²Ìrot kiji îkana inin̄ ubọk ebi ichen, uwu kiji înin̄ ubọk ebi ofifi ido.

³Eji mîkana ebi kpà-nte, mè ebi ìnan ute; ebi nga kiji mîkana ebi nwakpa.

⁴Mudim eji ekinwọ, eji ekilelep, sabum ènwọ, iye eji ekisọk, eji ekikpekpe ewe, sabum esọk.

⁵Ebi ìkililaba eji ekitọbọ eji ubọk me udun̄ ebek; eji mîgak iweek, ire, kpenyi eji isiki-efuuk.

⁶Eji mînyana ubọk ibeek ebi Ijipiti mè ebi Asiria ibe enyi eji inorie erie ejot owot.

⁷Ebi nte kiji erọ ijo inu, ema kpeyaka ikup; eji eyaka inikibọkọ mkpukpe ijo inu kiban̄.

⁸Ebi usun̄ ekikpulu eji mgbọ keyi, kpunu ogwu òtataba eji isibi me ubọk kiban̄.

⁹Inorie otu kiji, eji ekisa mkpa mè ugwem iweek, bak me lek ebi ìkiben oge akọn̄ ikana emen èwê.

¹⁰Uraafiọọn̄ îbak eji ukan̄ me lek, akpa kiji ìkiyok kubọk ototun̄.

¹¹Mîtet ebibaan̄ me Sayọn me unye ilaak, mè obaak ebibaan̄ me ama ebi Juda geelek.

¹²Ebọp ebi ibot mkpulu me ubọk iben ijeen̄ ikpan̄ kpekpọkpọ ebi ugane isi, mè ìnyi ema ulibi.

¹³Nsabọn irieen̄ ekibọkọ ukwook me lek ewuuk ikikọk akpa, asasa nsabọn ebirieen̄ ekekinyen̄e me irak efit iye.

¹⁴Ebi ugane mînọọn̄ me otunchit ama, nsabọn irieen̄ kpeyaka ikọt okwa.

¹⁵Unwọọn̄ îsibi ita eji me ejit; ifit òjijop kiji îkana ufieejit.

¹⁶Okpibot ubọọn̄ înan̄a eji me ibot irọn̄. Îta eji me ubọk, mije, eji mîrọ ijo inu!

¹⁷Mije keyi, ejit kiji îrọn̄ utọọk; mije inu chi geelek, chieen̄ îdun eji,

¹⁸bak me lek ogoon̄ Sayọn òlaak ukpọk ukpọk, ebi kè ibo oron afa ekekinililiin̄ ikana me inyọn̄.

¹⁹Jei Okumugwem, owu ìre ubọọn̄ ire mgbọ geelek; ogboon̄ ubọọn̄ kwun̄ ìbokukup nan̄a me ukot re me ukot.

²⁰Keke orọ okiwuuk eji mgbọ geelek? Keke orọ ojitbe eji itele ijọn̄ọ mgbọ ikeyi?

²¹Jei Okumugwem, kpọk gwen eji tap me lek kwun̄, inyi eji egwu ekom egọọk owu; kpọk rọ ukot eyi kiji ikup ayaya ayaya kubọk mgbọ ebi ukot ikaan̄.

²²Sà ìre owu òjijit eji isan̄a isi mege, mè inaan̄ ejit me lek kiji iraka iman̄ ni?