Read obolo Ijik 1 Bible Online

Ijik 1 - obolo bible

Ijik 1

¹Me òso usen go me emen onyan̄ ini, me òso akọp acha ita, mgbọ ya, emi ìre ene ge me lek ebi usun̄ akọn̄ Juda ìkup me agba okwaan̄ Keba, emen inyọn̄ ochichili ibook, mmumun̄ ilaak ọkpọchieen̄ ofolek Awaji.

²Me egwe go ya me onyan̄ ya me acha ya, òrere òso acha go etetbe ogwu ubọọn̄ Jioyakin me usun̄ akọn̄,

³Okumugwem otutumu ikọ inyi emi, Ijikien, ogwu ngwugwa, gwun̄ kè Buji, me agba okwaan̄ Keba me ido Babilọn. Unye Okumugwem okukup me lek n̄a me ere ya.

⁴Nnenikpọ, mè imun̄ egwijo ofitbe me isinyọn̄ ikinan̄a me agan̄ inyọn̄ inu. Mmun̄ ikpele oduku inyọn̄ melek omumen inyọn̄ okimumen me emen kubọk ukan̄, utoon̄ okekitoon̄ ikat ikana. Me eden̄ oduku inyọn̄ ya, îkaan̄ utoon̄ ge òkpọkpọ iren̄e kubọk alata òkikala me emen ukan̄.

⁵Me eden̄ oduku inyọn̄ ya si, îkaan̄ inu ini erombe òkup me ugwem òkukup. Me ubọk ema ekupbe, ebet lek ebilene.

⁶Ire, ema ge ge ekaan̄ isi ini mè uwop ini.

⁷Ukot kiban̄ ìtatat. Ijọn̄ ukot kiban̄ ìbet lek ijọn̄ ukot eriembuuk, mè ikimumen kubọk ekwe ekwukbe lek itana, inyi itoon̄.

⁸Ema mîkaan̄ ubọk ebilene me irak uwop kiban̄, ubọk ge me irak uwop ge, me agan̄ ini kiban̄. Otutuuk inu ini cha mîkaan̄ isi me lek, mè ikaan̄ si uwop.

⁹Inu cha geelek ìwewele uwop iba kan̄, utọn̄ uwop ge îra ichak me lek utọn̄ uwop kè ogwulọ. Ema ekeke me agan̄ ini. Ema isibeje, ekigbagbaan̄ ije, ogwu ikup òtet isi kan̄ eyi òkup me agan̄ ekije ifo òtat me agan̄ keya, kpekiyaka lek ikana.

¹⁰Isi kiban̄ ìkup ikeyi: Geelek îkaan̄ isi ebilene me agan̄ isi kan̄, mè isi egbe àtat me agan̄ ulom, mè isi orie eriembuuk me agan̄ ujit, mè isi igo me agan̄ udun̄.

¹¹Ikecha ke isi kiban̄ okup. Uwop kiban̄ ìsasan ifo inyọn̄. Ge ìsa uwop iba ichak me lek uwop echi ebi ìkup me ulom mè ujit kan̄, mè isa uwop iba ichit lek kan̄.

¹²Ogwu ikup, ìtetet isi itat ikije. Ere geelek erumun̄ okisi, ere keya ke ema ekisi, kpekiyaka lek ikana.

¹³Me mbet kiban̄, inu òkup me ugwem cha, ebet lek mbubuuk ukan̄ òreren̄e, mè ikigeen̄, mè ìre alọm ukan̄ òkisasak. Ukan̄ ya okekibeen̄ ikana me etete inu òkup me ugwem cha, mè ikitoon̄. Omumen-inyọn̄ okekimumen me emen ukan̄ ya.

¹⁴Inu òkup me ugwem cha ekililibi ikana, ilibi inyi isi, elibi enyi udun̄, kubọk omumen inyọn̄ okimumen.

¹⁵Ike nkikpọ inu òkup me ugwem cha, mmumun̄ ekpirikpo kiban̄ ge ge me ijọn̄ me agba lek kiban̄, ogwu ikup mè ekpirikpo eyi kan̄ melek isi ini kan̄.

¹⁶Ike ekpirikpo cha okupbe mè ubọk erombe ìre ikeyi: Ema ekikebe kubọk ewuuk ekigwen berin. Ekpirikpo ini cha, ge ìbọkọ lek ge, mè ikup kubọk esasa ofifi ekpirikpo ge itap ikwuk irieen̄ me lek ge.

¹⁷Ekpirikpo cha isikije, agan̄ geelek me lek agan̄ ini cha isi kiban̄ oyakabe ida, agan̄ keya ke ema ekije inin̄, kpekigwu ikana.

¹⁸Ekpirikpo cha ìbebene, mè ikup nriki nriki. Otutuuk ekpirikpo ini cha îkaan̄ chieen̄ chieen̄ ijot lek ikat ikana.

¹⁹Mgbọ inu òkup me ugwem cha isikije, ekpirikpo cha òkup me agba lek kiban̄ îra ikije. Ema isinan̄a me ijọn̄ ibene, ekpirikpo cha îra inan̄a ibene si.

²⁰Ere geelek erumun̄ okisi, ke inu ini òkup me ugwem cha ekisi, ekpirikpo cha si îra ikinan̄a ibene igọọk ema, mije, erumun̄ inu òkup me ugwem cha ìkup me emen ekpirikpo cha.

²¹Inu òkup me ugwem cha isije, ekpirikpo cha îra ije. Inu òkup me ugwem cha isichak ikeke, ekpirikpo cha îra ichak ikeke. Inu òkup me ugwem cha isibene inan̄a me ijọn̄, ekpirikpo cha si îra igọọk ibene inan̄a me ijọn̄, mije, erumun̄ inu òkup me ugwem cha ìkup me emen ekpirikpo cha.

²²Inu ge òbet lek akpabin owewele inyana ichit inyọn̄ ibot inu òkup me ugwem cha. Inu ya ìkup umọọn̄ umọọn̄, mè ikikebe kubọk ewuuk unye otu ewe ògegen, mè ikitet ene ukpook.

²³Me irak akpabin ya ke inu ini cha òkup me ugwem esan uwop kiban̄ iwele, ge oda ge. Ema geelek esasa uwop iba iba ichit lek kiban̄.

²⁴Mgbọ inu òkup me ugwem cha ejibibe ije, nnọnọ ida uwop kiban̄ cha okikput kubọk agbugbuk, mè ikitaan̄ kubọk ida Ogwu Òkaan̄ Unye Geelek, mè ikikput kubọk okput urum ebi akọn̄. Mgbọ ema echakbe ikeke, ema egegele uwop kiban̄ isiki.

²⁵Nneninọ ida ge okitaan̄ me inyọn̄ akpabin ya òkup me inyọn̄ ibot kiban̄ ike ema ekekebe, mè igele uwop kiban̄ isiki.

²⁶Mmumun̄ si inu ge me inyọn̄ akpabin ya òkup me inyọn̄ ibot kiban̄, òbet lek ogboon̄ ubọọn̄ esabe ewuuk oluku oluku ekigwen safaya irom. Me inyọn̄ inu òbet lek ogboon̄ ubọọn̄ ya, îkaan̄ inu ge òbet lek ebilene òbebene inan̄a me inyọn̄ ogboon̄ ya.

²⁷Mmumun̄ bene me ere òbet lek ebon kan̄ fo inyọn̄ okigeen̄ kubọk alata òreren̄e, eyi ukan̄ okilomo ikana ichit bùk. Bene me ere òbet lek ebon kan̄ siki fo ijọn̄, ìbet lek ukan̄, utoon̄ ototoon̄ ikana ọmọ okokop.

²⁸Utoon̄ òtotoon̄ ikana ọmọ ya ìkup kubọk egop ubọọn̄ òkup me emen oduku inyọn̄ me usen ibot. Eyiyi ìre mbet ujamgbugbo Okumugwem. Mgbọ mmun̄be inu yi, nrọrọn̄ ikana isi ichit me ijọn̄, mè inọ ida ge okitumu ikọ.