Read obolo Ijik 10 Bible Online

Ijik 10 - obolo bible

Ijik 10

¹Nnenikpọ, mè imun̄ inu òbet lek ogboon̄ ubọọn̄ esabe ewuuk oluku oluku ekigwen safaya irom okekebe ibene isaba inyọn̄ akpabin ya òkup me inyọn̄ ibot ebi mbem emen inyọn̄ cha.

²Okumugwem onenitumu inyi ogwu òsa ekwut lilin̄ ibala lek ya ibe, “Je nin̄ agbagba ekpirikpo òkup me irak ebi mbem emen inyọn̄ cha. Lọbọ mbubuuk ukan̄ òreren̄e me etete ebi mbem emen inyọn̄ cha jot ubọk kwun̄, mè sa si tọp gwook kana me emen ama ya.” Mmumun̄ ogwu ene ya orakabe inin̄ ere ya.

³Ebi mbem emen inyọn̄ cha ekeke me agba lek Uwu Mbuban ya me agan̄ osiki mgbọ ene ya orakabe inin̄, oduku inyọn̄ ochichit oyet egep eyi emen emen ya bùk.

⁴Ujamgbugbo Okumugwem ojijibi ibene inan̄a me inyọn̄ ebi mbem emen inyọn̄ cha, mè ijuuk ifo otu isotu Uwu Mbuban. Oduku inyọn̄ ya ojojot Uwu Mbuban, utoon̄ eyi ujamgbugbo Okumugwem ojojot oyet egep ya.

⁵Ida uwop ebi mbem emen inyọn̄ cha okekitaan̄ isi igwook me oyet egep agan̄ oyet, kubọk ida Awaji Ogwu Òkaan̄ Unye Geelek mgbọ îkitumu ikọ.

⁶Mgbọ Okumugwem onyibe ogwu òsa ekwut lilin̄ ibala lek ya ida ibe ilọbọ ukan̄ me etete ekpirikpo cha, me etete ebi mbem emen inyọn̄ cha, ene ya osisi ikeke me agba lek ekpirikpo ge.

⁷Ge me lek ebi mbem emen inyọn̄ cha onyanyana ubọk kan̄ ire lek ukan̄ òkup me etete kiban̄ cha, mè igwọ mbubuuk ukan̄, mè itap me ubọk ogwu òtap lilin̄ ya. Ogwa obọbọkọ, mè isa isibi.

⁸Ebi mbem emen inyọn̄ cha geelek mîkaan̄ inu òbet lek ubọk ebilene me irak uwop kiban̄.

⁹Nnenikpọ, mè imun̄ ekpirikpo ini me agba lek ebi mbem emen inyọn̄ cha, ekpirikpo ge me agba lek ogwu mbem emen inyọn̄ ge. Ekpirikpo cha ìkikekebe kubọk ewuuk ekigwen berin.

¹⁰Ikpọ me ubọk ekpirikpo cha okupbe, ge ìbọkọ lek ge, mè ikup kubọk esasa ofifi ekpirikpo ge itap ikwuk irieen̄ me lek ge.

¹¹Ekpirikpo cha isikije, agan̄ geelek me lek agan̄ ini cha isi kiban̄ oyakabe ida, agan̄ keya ke ema ekije inin̄, kpekigwu ikana. Ebi mbem emen inyọn̄ cha ekije ifo agan̄ geelek ge me lek ibot ini kiban̄ cha oyakabe ida, kpekigwu lek ikana mgbọ ema ekije.

¹²Otutuuk lek ebi mbem emen inyọn̄ cha, mè udun̄ kiban̄, mè ubọk kiban̄, mè uwop kiban̄, mè otutuuk lek ekpirikpo ini kiban̄ cha, chieen̄ chieen̄ ojot lek.

¹³Ekpirikpo cha ke nnọ ekigwen “Ekpirikpo mgba-ǹyak.”

¹⁴Ebi mbem emen inyọn̄ cha geelek ìkaan̄ isi ini: Isi ge ìre isi ogwu mbem emen inyọn̄, eyi òso iba ore isi ebilene, eyi òso ita ore isi egbe àtat, sà eyi òso ini ore isi igo.

¹⁵Ebi mbem emen inyọn̄ cha enanan̄a ibene ifo inyọn̄. Ema ere inu òkup me ugwem cha mmun̄be me agba okwaan̄ Keba.

¹⁶Ebi mbem emen inyọn̄ cha isijibi ije, ekpirikpo cha òkup me agba lek kiban̄ îra ijibi si ije. Mgbọ ebi mbem emen inyọn̄ cha isiyat uwop kiban̄ iwele iwulu inan̄a me ijọn̄, ekpirikpo cha si ìkakinan̄a me agba lek kiban̄.

¹⁷Mgbọ ebi mbem emen inyọn̄ cha isiyaka ikeke, ekpirikpo cha si îra iyaka ikeke. Ebi mbem emen inyọn̄ cha isijibi ibene, ekpirikpo cha si mîra ijibi ibene, mije, erumun̄ inu òkup me ugwem cha ìkup me emen ekpirikpo cha.

¹⁸Ujamgbugbo Okumugwem oneninan̄a me otu isotu Uwu Mbuban ya inikeke me lek efet me inyọn̄ ibot ebi mbem emen inyọn̄ cha.

¹⁹Me chieen̄ n̄a, ebi mbem emen inyọn̄ cha eyayat uwop kiban̄ iwele, mè ijibi ibene inan̄a me ijọn̄. Ike ema ekinan̄a ibene, ekpirikpo cha okekigọọk ema ibene. Ema eneniyaka ikeke me isotu otunchit agan̄ mbum-ura Uwu Mbuban. Ujamgbugbo Awaji ebi Ijeren obebene ikeke me inyọn̄ ibot kiban̄.

²⁰Inu òkup me ugwem kechi ere si inu òkup me ugwem cha echi mmun̄be Awaji ebi Ijeren okweekbe me inyọn̄ me agba okwaan̄ Keba. Ntotolek iniriọọn̄ ibe ke ema ìre ebi mbem emen inyọn̄.

²¹Geelek ìkaan̄ isi ini mè uwop ini, mè ikaan̄ inu òbet lek ubọk ebilene me irak uwop kiban̄ cha.

²²Isi kiban̄ ìre isi yaage kubọk isi echi mmun̄be me agba okwaan̄ Keba. Geelek ìkitetet isi kan̄ itat ikije.