Read obolo Ijik 11 Bible Online

Ijik 11 - obolo bible

Ijik 11

¹Ekwukwu Awaji onenijibi emi ibene, mè isa emi isi otunchit Uwu Mbuban Okumugwem eyi agan̄ mbum-ura, otunchit ya ìkikpọ si agan̄ mbum-ura. Mmumun̄ akọp ene iba mè go ekekebe me otu isotu otunchit ya, mè imun̄ si Jayajania gwun̄ kè Ajuru melek Pelatiya gwun̄ kè Benaya, ebi ibot ebi Ijeren, me etete ife cha.

²Okumugwem onenitumu inyi emi ibe: “Gwun̄ ebilene, kpọ, ife chi ere ebi ìkitọt ijo inu, mè ikinyi ikpak ikpak nteme me emen ama yi.

³Ema ekibe, ‘Eji ekanama uwu nu, mgbọ ìkakem. Ama yi ìkup kubọk otin̄ ekisa item anam, eji ekup kubọk anam me emen otin̄ ya.’

⁴Eya orọ, ben nriran keme ema. Gwun̄ ebilene, ben nriran!”

⁵Ekwukwu Okumugwem onenikana ichit emi, mè ibe emi, “Tumu be, Okumugwem ìbe ikeyi: Jei ebi uwu kè Ijeren, inu enyi ekitumu ire eya. Ire, emi nriọọn̄ inu òkup enyi me ejit.

⁶Enyi mîkpan̄ ene iwa me ama yi, mè igwook nkwukwu ene ichit lek otutuuk oniin̄ geelek.

⁷“Eya orọ, Ogwukaan̄-ene Okumugwem ìtumu ibe ikeyi: Nkwukwu ene cha etọọn̄be igwook me emen ama yi ore anam, sà ama yi ore otin̄. Ire, mârieen̄ enyi isibi me emen ama yi.

⁸Oge akọn̄ ìkitetet enyi ukpook, ire, oge akọn̄ ke mbasa inikweek enyi. Emi Ogwukaan̄-ene Okumugwem ntumu.

⁹Mârieen̄ enyi isibi me ama yi, mè ikana enyi itaak me ubọk ebi ofifi ido, mè isulu enyi osusut.

¹⁰Enyi mêkwaan̄ me otu oge akọn̄, emi mâsulu enyi osusut me otubọk okike ijọn̄ ebi Ijeren. Enyi mêtotolek iniriọọn̄ ibe ke emi nre Okumugwem.

¹¹Ama keyi ìkpore otin̄ inyi enyi, enyi si kpeberere anam me emen kan̄. Me otubọk okike ijọn̄ ebi Ijeren ke mbafieek oyerebet inyi enyi.

¹²Enyi mêneniriọọn̄ ibe ke emi nre Okumugwem, ogwu enyi ejitbe irọrọ orọmijọn̄ kan̄, mè ijit si isusun̄ ikan kan̄. Kpan̄asi keya, enyi etetet lek inye ikirọ orọmijọn̄ ebi ido cha ìluluk ikana enyi.”

¹³Ike nkiben nriran ya, Pelatiya gwun̄ kè Benaya okwukwu. Nrọrọn̄ ikana isi ichit me ijọn̄, mè itaan̄ ukpo ibe: “Iyak, Ogwukaan̄-ene Okumugwem! Ìre òbokpakpan̄ otutuuk ebi Ijeren ìsisik isan̄a kpai ni?”

¹⁴Okumugwem otutumu inyi emi ibe:

¹⁵“Gwun̄ ebilene, ebi ngwan̄ kwun̄, bọn ulọk kwun̄, mè otutuuk ebi uwu kè Ijeren, ema ke ebi Jeruselem ekitumu ibe, ‘Ebiba mîjọn̄ọ ere me lek Okumugwem. Esasa ijọn̄ keyi inyi eji ibe eji esa erọ eyi kiji.’

¹⁶“Eya orọ, tumu nyi ema ibe: ‘Ogwukaan̄-ene Okumugwem ìtumu ibe ikeyi: Ubọk geelek nchonbe ema ijọn̄ọ ere itap me etete ebi ife geelek, mè iyiyala ema ikana me ido geelek, ire, me ido cha geelek ema ekupbe, emi nre ere mbuban inyi ema me sọntitiik mgbọ.’

¹⁷“Eya orọ, tumu be: ‘Ogwukaan̄-ene Okumugwem ìtumu ibe ikeyi: Mâkpulu enyi me etete ife geelek cha, mè isa enyi inan̄a me etete ido cha nyiyalabe enyi igwook igwu ikom ika. Mâkpọk inyi enyi ijọn̄ Ijeren.’

¹⁸“Ema mêgwu ikom inu me lek ijọn̄ ya, mè inisan̄a otutuuk mbuban mkpọmfaka mè filafila inu cha geelek isan̄a.

¹⁹Mânyi ema ejit ge, mè itap aya ekwukwu me emen kiban̄. Mâsan̄a ejit òkinye kubọk ewuuk isan̄a ema me emen, mè inyi ema mmemem ejit òkup ufuk ufuk.

²⁰Mgbọ ya, ema mênenikirọ orọmijọn̄ n̄a, mè ikigwuun̄ chieen̄ isun̄ ikan n̄a. Ema mênenire ebi n̄a, emi mârere Awaji kiban̄.

²¹Ire, ebi geelek ulọk kiban̄ okupbe me lek mbuban mkpọmfaka mè filafila inu kiban̄ cha, m̀bayayaka inu ema erọbe ichit ema me ibot. Emi Ogwukaan̄-ene Okumugwem ntumu.”

²²Ebi mbem emen inyọn̄ cha eyayat uwop kiban̄ iwele isan, melek ekpirikpo kiban̄ me agba lek kiban̄, ujamgbugbo Awaji ebi Ijeren obebene ikeke me inyọn̄ ibot kiban̄.

²³Ujamgbugbo Okumugwem ojijibi ibene inan̄a isibi me emen ama ya, mè isi ikeke me inyọn̄ ogoon̄ òkup me agan̄ mbum-ura me lek ama ya.

²⁴Ekwukwu Awaji ya onenijibi emi ibene, mè inisa emi ika inu me etete ebi ìkup me usun̄ akọn̄ me ido Babilọn. Ilaak ọkpọchieen̄ n̄a otata.

²⁵Nnenikpa otutuuk inu cha Okumugwem ojeen̄be emi inyi ebi ìkup me usun̄ akọn̄ cha.