Read obolo Ijik 13 Bible Online

Ijik 13 - obolo bible

Ijik 13

¹Okumugwem onenitumu inyi emi ibe:

²“Gwun̄ ebilene, ben nriran keme ebi nriran Ijeren ebi ìkiben nriran mgbọ keyi. Tumu nyi ebi ìkitumu ikọ òkup ema me ejit kubọk ikọ nriran cha be, ‘Ìnọ ikọ Okumugwem!

³Ogwukaan̄-ene Okumugwem ìtumu ibe ikeyi: Môfieek inyi ebi nriran ebi mbubut, ebi kpemun̄ inu geege, ire, ekwukwu kiban̄ gaalek okitumu ikọ inyi ema!

⁴Ebi Ijeren, ìkpọ, ebi nriran kinyi ekup kubọk ibo oron afa òkisaan̄ ikana emen ǹrioon̄.

⁵Enyi kpenene isi inama ere òtitibi me lek mgban ya ichit inyi ebi uwu kè Ijeren, inyi mgban ya ikeke inye mgbọ akọn̄ isinu me usen oyerebet Okumugwem.

⁶Ilaak ọkpọchieen̄ kiban̄ ìre ofiaan̄ ofiaan̄, inu ema ekitumu ibe ìborọ me mgbọ ònu me isi ìre ataak ataak. Ema ekibe, “Îre Okumugwem otumu,” me mgbọ Okumugwem ìkaria ema inu geege, mè ema èkekpọ chieen̄ ibe ke ikọ kiban̄ môrọ iso.

⁷Ìre ìkare ofiaan̄ ofiaan̄ ilaak ọkpọchieen̄ ke enyi ekimun̄, sà ìre ìkare ataak ataak inu ke enyi ekitumu ibe ìborọ me mgbọ ònu me isi, mgbọ enyi ekibe, “Îre Okumugwem otumu,” me mgbọ emi ǹkatumu ikọ geege?

⁸“ ‘Eya orọ, Ogwukaan̄-ene Okumugwem ìtumu ibe ikeyi: Bak me lek ofiaan̄ ofiaan̄ ikọ kinyi mè ataak ataak ilaak ọkpọchieen̄ kinyi, emi melek kinyi kpetat. Emi Ogwukaan̄-ene Okumugwem ntumu.

⁹Ubọk n̄a môre lek ebi nriran ìkimun̄ ofiaan̄ ofiaan̄ ilaak ọkpọchieen̄, mè ikitumu ataak ataak inu òborọ me mgbọ ònu me isi. Ema kpebere ebi ogbo ntitiin̄ ebi n̄a, erieen̄ kiban̄ ìkponin̄ me ikpa erieen̄ ebi uwu kè Ijeren, ukot kiban̄ ìkpochak me ijọn̄ Ijeren. Enyi mêtotolek iniriọọn̄ ibe ke emi nre Ogwukaan̄-ene Okumugwem.

¹⁰“ ‘Ema esa ebi n̄a ije ilọ oniin̄, mè ikibe, “Esuuk òwa,” me mgbọ kpunube esuuk. Ìkup kubọk ema ekisa agba okuket ichọkọ ichit lek gwakagwaka mgban ebi n̄a enamabe, inyi ikup kubọk mgban ònyenye.

¹¹Eya orọ, tumu nyi ebi ìsasa agba okuket ichọkọ ichit lek mgban̄ ya ibe ke mgban ya ìbogbugbugbọ irọn̄. Mâria ibot otu ile ibe irep, ibot mgbọlọ môrọrọn̄ọ, unye efet egwijo môwuwut inigbugbọ mgban ya ito me ijọn̄.

¹²Mgbọ mgban ya isigbugbọ igwook, ìre ebi ene kpebedo enyi ibe, “Ìre agba okuket ya enyi esabe ichọkọ lek mgban ya ichit îkaan̄ oruru ni?”

¹³“ ‘Eya orọ, Ogwukaan̄-ene Okumugwem ìtumu ibe ikeyi: Mâsa me uga uyok uyok unaan̄-ejit n̄a iria efet egwijo, mè ibot otu ile, mè ibot mgbọlọ inu, inyi inijijaka mgban ya isan̄a kpai.

¹⁴Mâgbugbọ mgban enyi esabe agba okuket ichọkọ lek ya igwook, mè ida ito akpakpa me ijọn̄, inyi ebi ene ekemọọn̄ ọdọ kan̄. Ama ya isigbugbọ, enyi mêkwaan̄ ita si me emen kan̄. Enyi mênenitolek iriọọn̄ ibe ke emi nre Okumugwem.

¹⁵Sa me ikeya, mânenirọ unaan̄-ejit n̄a iso me lek mgban ya, mè irọ si iso me lek ebi ìsasa agba okuket ichọkọ lek. Mânenitumu inyi enyi ibe, “Mgban ìkayaka ìkup, ebi ìchọchọkọ lek kpeyaka ikup,

¹⁶òrere ebi nriran Ijeren cha ìkiben nriran inyi Jeruselem, mè ikimun̄ ilaak ọkpọchieen̄ inyi ibe ke esuuk òwa me mgbọ esuuk ikakupge. Emi Okumugwem ntumu” ’

¹⁷“Owu gwun̄ ebilene, mgbọ keyi, kana isi kwun̄ da bọn ebibaan̄ ebi kinyi ebi ìkitumu ikọ òkup ema me ejit kubọk ikọ nriran. Ben nriran keme ema,

¹⁸mè tumu nyi ema ibe: ‘Ogwukaan̄-ene Okumugwem ìtumu ibe ikeyi: Môfieek inyi enyi ebibaan̄, ebi ìkichim igba itaak me ebek ubọk ebi ene, mè ikirom ujọn̄ọ akisi ugwun̄ inyi ebi ene ekesa echit ibot, mè isa me ikeya ikitip ufe itet ebi ene. Ìre enyi ebekitip ufe itet ebek ugwem ebi n̄a, mè ikisun̄ ebek ugwem kinyi ni?

¹⁹Enyi mîfifila emi me etete ebi n̄a bak me lek akpa balì egwọbe ubọk inen mè inen inyi enyi, mè bak me lek mkpukpuku fituru inen mè inen ekpọkọbe inyi enyi. Enyi mîkpan̄ ebi kpemekpan̄, mè itele ebi mekpan̄be ibe egat ugwem, sa me lek ataak enyi ekikan̄ inyi ebi n̄a ebi ìkigban̄ ikọ ataak.

²⁰“ ‘Eya orọ, Ogwukaan̄-ene Okumugwem ìtumu ibe ikeyi: Nje ikeme ugwun̄ kinyi cha enyi ekisa itip ufe itet ene kubọk ekitet ofut. Emi mâjene inu cha isan̄a enyi me ubọk, mè irọ ebi enyi etipbe ufe itet kubọk ofut cha enwọnọ.

²¹Mâgwak ujọn̄ọ akisi kinyi cha isan̄a, mè inyan̄a ebi n̄a isibi me ubọk kinyi. Ema kpebeyaka ikpọk ikirọn̄ inin̄ me emen ubọk kinyi ofifi. Sa me ikeya, enyi mêtolek iniriọọn̄ ibe ke emi nre Okumugwem.

²²Mije, enyi mîsa ataak kinyi itap ebi ata irọrọ ufieejit me lek, me mgbọ emi ǹkatap ema ufieejit me lek, mè irọ ebi ikpak inye, inyi ekagwu ìkom me emen ikpak ema ekirọ, mè ìweek ebek ugwem kiban̄.

²³Eya orọ, enyi kpebeyaka ikpọk ikimun̄ ataak ataak ilaak ọkpọchieen̄ cha, kpebeyaka ikpọk ikitumu si ataak ataak inu òborọ me mgbọ ònu me isi. Mânyan̄a ebi n̄a isibi me emen ubọk kinyi. Enyi mêsasa me ikeya iniriọọn̄ ibe ke emi nre Okumugwem.’ ”