Read obolo Ijik 14 Bible Online

Ijik 14 - obolo bible

Ijik 14

¹Usini ebi ugane me Ijeren eneninu me lek n̄a, mè inikweek irek me isi n̄a.

²Mgbọ ya, Okumugwem otutumu inyi emi ibe:

³“Gwun̄ ebilene, ebi ife chi mîsa ejit kiban̄ inyi mkpọmfaka kiban̄, mè isa me ikeya isa ijo inu kiban̄ irieen̄ mgban òtọbọ ene ukot ikwek isi kiban̄. Ìre emi mâtele ibe ema enedo emi ikọ me otu ni?

⁴Eya orọ, tumu ikọ melek kiban̄, mè kpa nyi ema ibe, ‘Ogwukaan̄-ene Okumugwem ìtumu ibe ikeyi: Ogwu uwu kè Ijeren geelek òsasa ejit kan̄ inyi mkpọmfaka, mè isa me ikeya irieen̄ mgban òtọbọ ene ukot ikwek isi kan̄, mè ininu me lek ogwu nriran, emi me lek n̄a, Okumugwem, mbafọọk ene ya otu ikpọ me lek owuwa mkpọmfaka kan̄,

⁵inyi mâsa me ikeya ikpọk ikaan̄ ejit ebi uwu kè Ijeren. Mije, ema mîgọọk mkpọmfaka cha, mè iyat itele emi.’

⁶“Eya orọ, tumu nyi ebi uwu kè Ijeren be: ‘Ogwukaan̄-ene Okumugwem ìtumu ibe ikeyi: Ìgwu ìkom! Ìtele mkpọmfaka kinyi, mè ìsan̄a lek me lek otutuuk filafila inu cha enyi ekirọ.

⁷“ ‘Mije, ene geelek me lek ebi uwu kè Ijeren, mè ìre ogwu ichen òluk me Ijeren, ogwu òkpekpebe lek kan̄ isan̄a me lek n̄a, mè isa ejit kan̄ inyi mkpọmfaka, mè isa ijo inu kan̄ irieen̄ mgban òtọbọ ene ukot ikwek isi kan̄, mè inu me lek ogwu nriran inido otu n̄a, emi Okumugwem me lek n̄a gaalek mbafọọk ene ya otu.

⁸Mâyaka isi n̄a ida ene ya, mè isa ọmọ irọ inu ijejeen̄ mè ogwu ebekisa irọk urọk. Mâfieek ọmọ si isan̄a me etete ebi n̄a. Enyi mêtotolek iniriọọn̄ ibe ke emi nre Okumugwem.

⁹“ ‘Ire ene ileke ogwu nriran ya ibe iben nriran, îre emi Okumugwem nleke ogwu nriran ya. Ogwu nriran ya ìkponwọnọ emi me ubọk, m̀bajijijaka ọmọ isan̄a me etete ebi Ijeren ebi n̄a.

¹⁰Ema mêbọkọ osusut ògbe ema. Osusut ogwu nriran mè eyi ogwu ònido ikọ me otu ogwu nriran ìbore ìkike.

¹¹Eya mônenirọ mè ebi uwu kè Ijeren ekayaka ìje ìlọ emi ukot, mè ekayaka ìkpọk ìsa ijo inu ìfifila lek kiban̄. Ema mênenire ebi n̄a, emi mârere Awaji kiban̄. Emi Ogwukaan̄-ene Okumugwem ntumu.’ ”

¹²Okumugwem onenitumu si inyi emi ibe:

¹³“Gwun̄ ebilene, ido geelek òjijit emi itele, mè isa me ikeya irọ emi ijo inu, ìkponwọnọ emi me ubọk. Mâgon otu oniin̄ inorie kan̄ ichit, mè iria akan̄ ijet ọmọ, mè ikpan̄ ebilene mè anam isan̄a me emen kan̄.

¹⁴Ikerere ibe ene ita cha, Nuwa mè Danien mè Jobu, òwa me emen ido ya, îre ebek ugwem kiban̄ gaalek ke ata irọrọ kiban̄ obokọt inyan̄a isibi, ìkpokọt inyan̄a ofifi ene. Emi Ogwukaan̄-ene Okumugwem ntumu.

¹⁵“Ire nria ijo anam oron itap me ido ya ibe ijijen̄e ikana, mè ikpan̄ ene isan̄a, mè ire ido ya ilaak ukpọk, ebi ene kpeyaka ikije itibi ido ya bak me lek anam cha,

¹⁶ikerere ebi ene ita cha ekukup me ido ya, kè lek ugwem n̄a, ema kpebekọt inyan̄a ukpọk ukpọk lek bọn kiban̄ ebirieen̄ mè ebibaan̄ isibi. Ema cha gaalek ke ebenyan̄a. Ire, ido ya ìbochechep. Emi Ogwukaan̄-ene Okumugwem ntumu.

¹⁷“Ire nria oge akọn̄ itap me ido ya, mè ibe oge akọn̄ ya ijijen̄e ikana otutuuk ido ya, mè ikpan̄ ebilene mè anam kiban̄ isan̄a,

¹⁸ikerere ebi ene ita chi si ekukup me ido ya, kè lek ugwem n̄a, ema kpebekọt inyan̄a ukpọk ukpọk lek bọn kiban̄ ebirieen̄ mè ebibaan̄ isibi. Ema cha gaalek ke ebenyan̄a. Emi Ogwukaan̄-ene Okumugwem ntumu.

¹⁹“Ire nria ijo orukan̄ itap me ido ya, mè igbuku uyok uyok unaan̄-ejit n̄a isa ifiat eje ebilene mè anam me ido ya,

²⁰ikerere Nuwa mè Danien mè Jobu ekukup me ido ya, kè lek ugwem n̄a, ema kpebekọt inyan̄a ukpọk ukpọk lek gwun̄ kiban̄ enerieen̄ mè ìre enenwaan̄ isibi. Ata irọrọ kiban̄ ìbonyan̄a ema cha gaalek. Emi Ogwukaan̄-ene Okumugwem ntumu.

²¹“Mije, Ogwukaan̄-ene Okumugwem ìtumu ibe ikeyi: Ire ikeya, môfieek enenen inyi Jeruselem mgbọ nsiria ijo osusut ini n̄a cha, òrere oge akọn̄, mè akan̄, mè ijo anam oron, melek ijo orukan̄, ibe ikpan̄ ebilene me anam isan̄a me Jeruselem!

²²Ire, môkaan̄ usini bọn ebirieen̄ mè ebibaan̄ ebi mêsikbe. Ebibi ke ebesan̄a isibi me emen ama ya. Ema mênunu me lek kinyi. Mgbọ enyi isimun̄ eru kiban̄ mè ubọk irọ-inu kiban̄, enyi mêkat ejit òfo me lek ùrioon̄ nsabe initoon̄ Jeruselem, melek otutuuk inu geelek nrọbe me ama ya.

²³Enyi isimun̄ eru kiban̄ mè ubọk irọ-inu kiban̄, môkat enyi ejit. Enyi mêneniriọọn̄ ibe ke ǹkagegen ibak ìrọ inu nrọbe me emen ama ya me ikpak. Emi Ogwukaan̄-ene Okumugwem ntumu.”