Read obolo Ijik 18 Bible Online

Ijik 18 - obolo bible

Ijik 18

¹Okumugwem onenitumu inyi emi ibe:

²“Keke ore ibot urọk keyi enyi ekito mgbọ geelek ofolek ido Ijeren ibe: “ ‘Ebi nte nte erie agburu gerep, ke ajiji otet ejeek nsabọn’?

³“Kè lek ugwem n̄a, enyi kpebeyaka ikpọk ito urọk keyi me Ijeren. Emi Ogwukaan̄-ene Okumugwem ntumu.

⁴Mije, ebek ugwem ene geelek, îre emi nkaan̄. Ebek ugwem eyi ute mè ebek ugwem eyi gwun̄, îre emi nkaan̄. Ogwu òrọ ijo inu, ọmọ obokwu.

⁵“Ire ikaan̄ ogwu ata irọrọ ge òkukup, mè irọ inu ònenen mè itat ibe erọ;

⁶ire ìkarie inorie me isi-ijọn̄ me inyọn̄ ogoon̄, ìkabene chieen̄ ìkpọ mkpọmfaka ebi uwu kè Ijeren, ìkagan nwa ogwu melek kan̄, ìkagọọk enenwaan̄ òkup me irek ebibaan̄ ìlaak;

⁷ìkatutuku ene geege, ire, îyaka inu nsọọn̄ esabe ifọọk ọmọ ikpoko me ubọk inyi ogwukaan̄; ìkachiin̄ inọ afa, ire, îsa inorie kan̄ inyi ebi ìkup me uraafiọọn̄, mè inyi ebi ìkup njak ekwut esa echit njak;

⁸ìkakitoon̄ urot me inyọn̄ ibot ikpoko îkifọọk inyi ene, ìkakimọnọ uga oruru me lek; ire, ìkisasan̄a ubọk kan̄ isan̄a me ijo inu, mè ikisibi unen oyerebet inyi ene;

⁹ire ikirọ inu ntọbe, mè ikeke inye me isusun̄ ikan n̄a, ọmọ ìre ogwu ata irọrọ; ìkpolọlọ iluluk ugwem. Emi Ogwukaan̄-ene Okumugwem ntumu.

¹⁰“Ire ene ya inikaan̄ gwun̄ òrere ogwu afa òkifiat eje ene, mè ìre irọ geelek me lek inu kechichi:

¹¹(ubọk geelek nte kan̄ ìkarọ geege me lek): “Ire gwun̄ ya ikirie inu me isi-ijọn̄ me inyọn̄ ogoon̄ mè ikififila nwa ogwu melek kan̄;

¹²ire ikitutuku ebi ugbọọn̄ mè ebi una, mè ikichiin̄ inu me afa, ìkakiyaka inu nsọọn̄ esabe ifọọk ikpoko ìnyi ogwukaan̄; ire isa mkpọmfaka itoon̄ ejit, mè ikirọ òchichaka inu;

¹³ire ikitoon̄ urot me inyọn̄ ibot ikpoko îkifọọk inyi ene, mè ikimọnọ uga oruru me lek, ìre ene ogwu òkup ikeya môluk ugwem ni? In̄-in̄, ìkpoluk! Ogwu òrọrọ otutuuk òchichaka inu kechichi ìkpolọlọ ikwukwu; eje kan̄ si ìbotoon̄ me ibot kan̄.

¹⁴“Ire, ire gwun̄ yi ikaan̄ gwun̄ eyi kan̄, ogwa omumun̄ otutuuk inu nte kan̄ orọbe, mè igbala chieen̄, ìkarọ inu cha geege:

¹⁵“Ìkakirie inorie me isi-ijọn̄ me inyọn̄ ogoon̄, ìkakisa mkpọmfaka ebi uwu kè Ijeren ìtoon̄ ejit, ìkakififila nwa ogwu melek kan̄;

¹⁶ìkakitutuku ene geege, ìkakitet inu nsọọn̄ ìkaan̄, ìkakichiin̄ inọ afa, ire, ìkisa inorie kan̄ inyi ebi ìkup me uraafiọọn̄, mè ikinyi ebi ìkup njak ekwut esa echit njak;

¹⁷ire isan̄a ubọk isan̄a me itututuku ebi ugbọọn̄, ìkakitoon̄ urot me inyọn̄ ibot ikpoko îkifọọk inyi ene, ìkakimọnọ uga oruru me lek; ire, ìkekirọ inu ntọbe, mè ikisun̄ ikan n̄a; ene ya ìkpokwu mkpa ibot ijo inu ogwu ute; ìboluluk ugwem.

¹⁸Ire me lek ogwu ute, ìbokwukwu mkpa mije ijo inu kan̄, mije, îtutuku ene, mè ichiin̄ inu ogwu ngwan̄ me afa, mè irọ inu ikajaan̄ge me etete ebi kiban̄.

¹⁹“Ire, enyi edo ibe, ‘Keke orọ gwun̄ ìkabọkọ osusut ijo inu ogwu ute?’ Mije ogwu gwun̄ orọbe inu ònenen mè inu òtatat, mè igbala chieen̄ ikirọ otutuuk inu ntọbe, gwun̄ ya ìkaan̄ iluluk ugwem.

²⁰Ogwu òrọ ijo inu, ọmọ obokwu. Gwun̄ ìkpobọkọ osusut ijo inu ogwu ute, ute si ìkpobọkọ osusut ijo inu ogwu gwun̄. Ata irọrọ ogwu ata irọrọ ìbia inyi ogwukaan̄ lek; ijo irọrọ ogwu ijo irọrọ ìbia si inyi ogwukaan̄ lek.

²¹“Ire, ire ogwu ikpak igwu ikom itele otutuuk ijo inu îkirọ, mè iyaka inikirọ otutuuk inu ntọbe, mè ikirọ inu ònenen mè inu òtatat; ìboluluk ugwem me atikọ; ìkpokwu mkpa.

²²Kpebeyaka ikeek inu ikpak kan̄ cha geege isa itip ọmọ oyerebet. Ire, ọmọ môluk ugwem, sa me lek ata irọrọ îyakabe inikirọ.

²³Ìre ìneneme emi ibe ogwu ijo ene ikwu ni? In̄-in̄, emi ǹkiweek ibe ogwu ijo ene igwu ikom me oniin̄ kan̄, mè iluk ugwem. Emi Ogwukaan̄-ene Okumugwem ntumu.

²⁴“Ire, ire ogwu ata irọrọ itele ata irọrọ kan̄, mè isi irọ ijo inu, mè ikirọ filafila inu cha ebi ijo ife ekirọ, ìre môluk ugwem ni? Otutuuk ata irọrọ kan̄ cha geelek îrọbe, kpebeyaka ikeek. Mije ọmọ ikayakage ìgbe utoon̄-ejit, mè mije ijo inu îyakabe ikinirọ, ọmọ môkwu mkpa.

²⁵“Ire, enyi ekibe, ‘Oniin̄ Ogwukaan̄-ene okirọ inu kan̄ ìkatat.’ Jei, ebi uwu kè Ijeren, ìgban̄-nu: Ìre oniin̄ emi nkirọ inu ikatatge? Ìre ìkare oniin̄ enyi ekirọ inu ore eyi ikatatge?

²⁶Ire ogwu ata irọrọ itele ata irọrọ kan̄, mè isi itap ubọk me ijo irọrọ, ìbokwukwu. Mije ijo inu îrọbe, môkwu mkpa.

²⁷Ire, ire ogwu ijo irọrọ isan̄a ubọk me ijo irọrọ kan̄, mè isi ikirọ inu ònenen mè inu òtatat, môsun̄ lek kan̄ me ugwem.

²⁸Eyi îmun̄be otutuuk ijo inu cha ọmọ orọbe, mè igwu ikom, ìboluluk ugwem, ìkabokwu mkpa.

²⁹Ire, ebi uwu kè Ijeren ekibe, ‘Oniin̄ Ogwukaan̄-ene okirọ inu kan̄ ìkatat.’ Jei, ebi uwu kè Ijeren, ìre oniin̄ emi nkirọ inu ikatatge? Ìre, ìkare oniin̄ enyi ekirọ inu ore eyi ikatatge?

³⁰“Eya orọ, enyi ebi uwu kè Ijeren, mâsibi enyi oyerebet me ibot, me ene me ene, igọọk me oniin̄ enyi ekirọ inu. Emi Ogwukaan̄-ene Okumugwem ntumu. Ìgwu ìkom! Ìgwu ìkom ìtele otutuuk nrọ-nlọ kinyi, inyi ijo inu ikarọ enyi echieen̄ eta.

³¹Enyi ebi uwu kè Ijeren, ìsan̄a lek me lek otutuuk ijo inu enyi ekirọ, mè ìkaan̄ ayaya ejit mè ayaya ekwukwu me emen kinyi. Keke orọ enyi ekiweek ikwakwaan̄?

³²Ìkabele emi ejit ibe ene geege ikwu. Emi Ogwukaan̄-ene Okumugwem ntumu. Ìgwu ìkom, mè ìgat ugwem!”