Read obolo Ijik 2 Bible Online

Ijik 2 - obolo bible

Ijik 2

¹Okumugwem onenitumu inyi emi ibe, “Gwun̄ ebilene nan̄a keke keke me ukot kwun̄, inyi ǹtumu ikọ ǹnyi owu.”

²Mgbọ îkitumu ikọ ya, Ekwukwu Awaji oninin̄ emi me emen, mè ijibi emi ibene, nkekeke me ukot. Nnọnọ ida ya si okitumu ikọ inyi emi ibe:

³“Gwun̄ ebilene, ǹkiria owu isi lek ebi Ijeren, ido ebi òkpaka ibot cha ìkpakpaka ibot inyi emi. Ema mè ebi nte nte kiban̄ ekup me lek inyenye ibot inyi emi mege inire cherekeyi.

⁴Ebi nkiria owu isi lek ìre ebi unyechieen̄ mè ebi unye-ejit. Tumu nyi ema ibe, ‘Ogwukaan̄-ene Okumugwem ìtumu ibe ikeyi.’

⁵Ema ìre uwu ebi òkpaka ibot. Eya orọ, ema egbagban̄, kpegban̄, ema mêriọọn̄ ibe ke ogwu nriran òwa me etete kiban̄.

⁶Ire owu, gwun̄ ebilene, katet ukpook me lek kiban̄, kafefieek si owot me lek ikọ kiban̄. Ubọk geelek ema erebe abọm egbe mè ukpak ikana owu, mè ikaan̄ iwot me lek kubọk eferen̄, owu okekiluk me etete kiban̄, katet ukpook. Ubọk geelek ema erebe ebi uwu mkpaka-ibot, kafieek owot me lek ikọ kiban̄, katetet si ukpook me lek kiban̄.

⁷Tumu ikọ n̄a nyi ema, egbagban̄, kpegban̄, mije, ema ìre ebi ìkpaka ibot.

⁸Ire, owu, gwun̄ ebilene, gban̄ utọn̄ me lek inu ntumube inyi owu. Kakpaka ibot kubọk ebi uwu mkpaka-ibot. Chili otu kwun̄ bọkọ inu nnyibe owu taka.”

⁹Nnenikpọ, mè imun̄ ubọk ge onyanabe inu emi lek. Ikpa ekakat okup me ubọk ya.

¹⁰Ubọk ya onenikala ikpa ya me isi n̄a. Mîge okwa ito, mè ufieejit, mè ubọnọlek ijot lek ikpa ya, me agan̄ isi mè agan̄ udun̄.