Read obolo Ijik 21 Bible Online

Ijik 21 - obolo bible

Ijik 21

¹Okumugwem onenitumu inyi emi ibe:

²“Gwun̄ ebilene, kana isi kwun̄ da Jeruselem, mè tumu ikọ keme ere mbuban kiban̄ cha, mè ben nriran keme ijọn̄ ido Ijeren.

³Tumu nyi ijọn̄ ido Ijeren ibe: ‘Okumugwem ìtumu ibe ikeyi: Emi melek kwun̄ kpetat, mâniwọọk oge akọn̄ n̄a isibi me emen ogan isa isọp ebi kwun̄ igwook, ebi ata irọrọ mè ebi ikpak.

⁴Mije m̀basọp ebi kwun̄, ebi ata irọrọ mè ebi ikpak igwook, oge akọn̄ n̄a môsibi me ogan iyaka ida otutuuk ebilene, ibene me agan̄ osiki isi ire agan̄ inyọn̄.

⁵Otutuuk ebilene mêneniriọọn̄ ibe ke emi, Okumugwem, nra iwọọk oge akọn̄ n̄a isibi me ogan, ke ìkpoyaka igwu ikom inin̄ emen ogan ofifi.’

⁶“Eya orọ, owu gwun̄ ebilene, to mfi. Fieek ejit to mfi ujat ujat me isi kiban̄.

⁷Mgbọ ema isido owu ibe: ‘Keke orọ okito mfi ni?’ Owu môfọọk ema ibe, ‘Îre mije etip òkinu. Owot ene geelek môfieek; ubọk ene geelek môriọkọ igwook; ibot ejit ene geelek môwulu; ebek ukot ene geelek môwọ kubọk mun̄.’ Ìkpọ, òkinu! Ìkpolọlọ irọrọ iso. Emi Ogwukaan̄-ene Okumugwem ntumu.”

⁸Okumugwem onenitumu inyi emi ibe:

⁹“Gwun̄ ebilene, ben nriran, mè tumu be, ‘Okumugwem ìtumu ibe ikeyi: “ ‘Ìkpọ, oge akọn̄, oge akọn̄, ewawat ireke, mè ikwuk itana!

¹⁰Ewat ireke, ibe esa ekpan̄ ene, ekwuk itana, inyi ikimumen kubọk omumen inyọn̄! “ ‘Enyi ebi otoko gwun̄ n̄a, ìre eji mêbele ejit ni? Kpọ, oge akọn̄ ya ìkikpọkpọ otutuuk uti geelek isiki chieen̄.[4]

¹¹“ ‘Esa oge akọn̄ ya inyi ekwuk, ufuna mêtetbe ikaan̄ me ubọk; ewawat oge akọn̄ ya ireke, mè ikwuk itana, inyi mêyakabe itap me ubọk ogwu òkpan̄ ene.

¹²Gwun̄ ebilene, taan̄ ukpo, mè to ito, mije, oge akọn̄ ya ìkinu lek ebi n̄a; ìkinu me lek otutuuk ebi ibot ebi Ijeren. Mîtọp ema melek otutuuk ebi n̄a itap me otu oge akọn̄. Eya orọ, bene ubọk iba toon̄ me ibot fieek ejit.

¹³“ ‘Itọtọ ikpọ ke îre. Keke ke ebeyaka irọ, ire okuba ubọọn̄ ya eyi oge akọn̄ ya okikpọ isiki chieen̄ ìkayaka ìkup?[5] Emi Ogwukaan̄-ene Okumugwem ntumu.’

¹⁴“Eya orọ, gwun̄ ebilene, ben nriran, mè gbaan̄ ubọk kwun̄ kwak. Tele oge akọn̄ ya irọn̄ mgbọ iba, ikerere mgbọ ita. Îre oge akọn̄ ebesa ikpan̄ ene, oge akọn̄ ebesa ikpan̄ owuwa ene, ìkakana ema okokop.

¹⁵Nra igwuun̄ oge akọn̄ ikpan̄ ene itele me otunchit kiban̄ geelek, ufuna owot ifieek ene, inyi ebi mêkwaan̄be ewa. Jei! Ìkimumumen kubọk omumen inyọn̄, etetet ikaan̄ inye isasa ikpan̄ ene igwook.

¹⁶Owu oge akọn̄, gbaan̄ nyi agan̄ ulom, mè gbaan̄ nyi agan̄ ujit, agan̄ geelek eyakabe owu ida.

¹⁷Emi si mâgbaan̄ ubọk n̄a ikwak, uyok uyok unaan̄-ejit n̄a môsisiki. Emi Okumugwem ntumu.”

¹⁸Okumugwem onenitumu inyi emi ibe:

¹⁹“Gwun̄ ebilene, san̄a oniin̄ iba sun̄, inyi oge akọn̄ ogwu ubọọn̄ Babilọn ije me lek inu. Oniin̄ iba cha mônan̄a me ido yaage isibi. Ge uwot ijeen̄ oniin̄ sa si gwuun̄ me ugwaka oniin̄ òkinu emen ama.

²⁰San̄a oniin̄ eyi oge akọn̄ môjebe isi ire ama Raba me ido Amọn, mè ofifi oniin̄ eyi ìboje me lek isi ire Juda, mè inin̄ Jeruselem, ama enamabe mgban ikana.

²¹Mije, ogwu ubọọn̄ Babilọn ìkekeke me lek ugwaka oniin̄ ya, me ere oniin̄ ochebe iba ya, ikitet ǹcha. Môsisik oraan̄ kan̄ kubọk ekpọọk, mè ido mkpọmfaka kan̄ ikọ, mè ikpọ ejit anam îkisa itet ǹcha.

²²Ǹcha eyi agan̄ ubọk ulom kan̄ ìtet Jeruselem, ere ìbogwook nroon̄ akọn̄ ekisa igbugbọ mgban, mè inyi ida ibe ekpan̄ ene egwook, mè ibene ida itaan̄ ukpo itiki akọn̄, mè igwook nroon̄ ekisa igbugbọ mgban iyaka ibieen̄ me lek otunchit geelek, mè inibot urak ukot, mè ikpa mbin akọn̄ ikana.

²³Ǹcha ya môkup kubọk mkpọn̄kpọn̄ inu me chieen̄ ebi ìnyan̄a ibot melek kan̄. Ire, môkeek ema nlilọ inu ema erọbe, mè ikpulu ema me akọn̄.

²⁴“Eya orọ, Ogwukaan̄-ene Okumugwem ìtumu ibe ikeyi: ‘Mije, enyi erọbe ibe eyaka ekeek ijo inu kinyi, inyi nrọ-nlọ kinyi ikpọk mbum, mè irọ inyi emun̄ ijo irọrọ kinyi me inu geelek enyi ekirọ, ebi ochicha kinyi mêteen̄ enyi agam agam ifon.

²⁵“ ‘Ire owu, ogwu ibot ebi Ijeren, ogwu ikpak òlọlọ ijọn̄, ogwu usen mkpukpe ijo inu kan̄ orebe, ogwu inu ikpak kan̄ ojotbe ichak,

²⁶Ogwukaan̄-ene Okumugwem ìtumu ibe ikeyi: Tọn̄ọ akisi òkup me ibot kwun̄ to, mè san̄a okpibot ubọọn̄ san̄a. Inu ìkpoyaka ikup kubọk îkikup. Mêjibi ebi ìsisiki ibene, mè ikeme ebi ìbebene isiki.

²⁷Jakajaka! Jakajaka! Emi mârọ ibe ido yi ijijaka! Ido yi ìkpoyaka ikup, mege ire mgbọ ogwu îrebe unen kan̄ ikpukpulu mônube, ogwugwa ke mbasa inyi.’

²⁸“Ire owu, gwun̄ ebilene, ben nriran, mè tumu be, ‘Inu Ogwukaan̄-ene Okumugwem otumube ofolek ebi Amọn mè unyechieen̄ kiban̄ ìre ikeyi: “ ‘Oge akọn̄, oge akọn̄, ewọwọọk isibi, inyi esa ekpan̄ ene; ekwukwuk itana, inyi esa esọp ene egwook, mè ikimumen kubọk omumen inyọn̄!

²⁹Mije ofiaan̄ ofiaan̄ ilaak ọkpọchieen̄ ekimun̄ ofolek kwun̄, melek ataak ataak ido-inu ekido ibak owu; mêsa owu itoon̄ me inyọn̄ ebek ebi ikpak, ebi ebekpakpan̄, ebi usen mkpukpe ijo inu kiban̄ orebe, ebi inu ikpak kiban̄ ojotbe ichak.

³⁰Yaka oge akọn̄ ya nwaan̄ me ogan kan̄. Me irek ere emanbe owu, me inyọn̄ ijọn̄ ebi nte nte kwun̄, ere ya ke mbasibi owu oyerebet me ibot.

³¹Mâgbuku uyok uyok unaan̄-ejit n̄a igwook owu me lek, mè ifuuk ukan̄ unaan̄-ejit n̄a itaka owu. Mâyaka owu itap me ubọk ebi ìkirọ nnaan̄, ebi ìrọriọọn̄ ubọk ekijijaka inu.

³²Mêsa owu irọ iye isọk ukan̄, eje kwun̄ môgwook me lek ijọn̄ kinyi, kpebeyaka ikeek owu ofifi, mije, îre emi Okumugwem ntumu.’ ”