Read obolo Ijik 24 Bible Online

Ijik 24 - obolo bible

Ijik 24

¹Me òso akọp usen, me òso akọp onyan̄, me òso acha onaan̄ge me lek etetbe ogwu ubọọn̄ Jioyakin me usun̄ akọn̄, Okumugwem onenitumu inyi emi ibe:

²“Gwun̄ ebilene, ge usen cherekeyiyi tap me ikpa, mije, îre usen keyi, usen cherekeyi, ke ogwu ubọọn̄ Babilọn obene irieen̄ mgban kan̄ ikana ama Jeruselem.

³To urọk nyi ebi uwu unye-ibot ya ibe ke Ogwukaan̄-ene Okumugwem ìtumu ibe ikeyi: “ ‘Yik otin̄ me ukan̄, yik, mè tap mun̄ me emen.

⁴Kpulu okpọkọ anam gwook me emen, tap otutuuk okpọkọ anam ònwọnwọn lek, owut-ukot melek oguga. Tap atalek ere ukwuuk ukwuuk jot otin̄ ya.

⁵Atalek arọọn̄ ge ke obotet me etete urum arọọn̄; tap iye lobo me irak otin̄ ya, bak me lek ukwuuk cha; rọ inyi iriaak ijaan̄ lek, mege ukwuuk cha òbet.

⁶Mije, Ogwukaan̄-ene Okumugwem ìtumu ibe ikeyi: “ ‘Môfieek inyi ama òfiat eje ene, òkup kubọk otin̄ òtataka achiaan̄, eyi kpebekọt ikwuk itana! Kumu anam cha sibi me okpọkọ me okpọkọ, ekaroroon̄ nriroon̄ ìsa ìgobo.

⁷“ ‘Mije, eje îfiatbe ya ọmọ òwa me eden̄ kan̄ okupbe; gwook eje ya me inyọn̄ ewuuk; kagwook me ijọn̄, inyi achiaan̄ ikachit.

⁸Ǹtele ibe eje ya igwook me inyọn̄ ewuuk, inyi ekakọt ìchit, ufuna unaan̄-ejit ibene, mè esan̄a useen̄.

⁹Eya orọ, Ogwukaan̄-ene Okumugwem ìtumu ibe ikeyi: “ ‘Môfieek inyi ama òfiat eje ene! Emi si mâgwook èdọ iye ya ibene.

¹⁰Gwook iye bene mè sọk ukan̄. Tem anam ya bet, tap inu ekisa irọ inorie itop me lek, mè tele ukwuuk cha iriak itaka igọm.

¹¹Yik otin̄ ya ukpọk emen me inyọn̄ mbubuuk ukan̄, inyi iyok, mè ekwe esabe irom ikala, ufuna mkpakaan̄ òkup me lek itọk, mè achiaan̄ òtaka me lek ikama inan̄a.

¹²Efuuk geelek etapbe me lek ìchechep, ulobo achiaan̄ òtataka otin̄ ya ìgọgọm ibia, ukan̄ ìkakọt ìtaka ìkpọk.

¹³“ ‘Barabat kwun̄ oken owu okpa. Nsa igwọgwọk owu itana, ire, owu òkachieek okpa ita owu me lek. Owu òkpoyaka itana mege ire mgbọ unaan̄-ejit n̄a me lek kwun̄ môsikibe.

¹⁴“ ‘Emi Okumugwem ntumu. Ikọ n̄a ìborọrọ iso. Mârọ ubọk ntumube; m̀kpatet ubọk ikaan̄, m̀kpato njijin, m̀kpato nsan. Mêsibi owu oyerebet me ibot ikpọ me lek eru kwun̄ melek inu owu orọbe. Emi Ogwukaan̄-ene Okumugwem ntumu.’ ”

¹⁵Okumugwem onenitumu inyi emi ibe:

¹⁶“Gwun̄ ebilene, kpọ, mâsa me otu njijan̄ ge ibọkọ ogwu chieen̄ kwun̄ okima ikpọkpọ isan̄a owu me ubọk. Ire, kafieek ejit, kato ito, karọn̄ọ mun̄ ito geege me chieen̄.

¹⁷To mfi emen emen, kafieek ejit ekifieek inyi ebi ìkwakwaan̄. Bọp akisi ibot kwun̄ kam me ibot, mè tap ikpukot kwun̄ me ukot, kachit ifet otu kwun̄, mè karie inorie ebi ito ekirie.”

¹⁸Nnenitumu ikọ inyi ebi ene me otu ewelegwe. Me otu ikakwun̄ usen ya, nwa n̄a okwukwu. Ofit iwele kan̄, nrọrọ ike Awaji otọbe ibe emi ǹrọ.

¹⁹Ebi ene ekekido emi ibe, “Ìre keke orọ okirọ eru ikeyi? Ire òkpokpa inu inu chi osibibe inyi eji ni?”

²⁰Nnenitumu inyi ema ibe, “Okumugwem ìtumu inyi emi ibe:

²¹Tumu nyi ebi uwu kè Ijeren ibe, ‘Ogwukaan̄-ene Okumugwem ìtumu ibe ikeyi: Mânichaka mbuban me lek Uwu Mbuban n̄a, inu ya òkinye enyi lek, eyi enyi ekisa igugo lek, inu ya eyi òkilọk enyi isasa chieen̄ ikimun̄, eyi enyi emabe ichit me otutuuk ejit kinyi. Bọn kinyi ebirieen̄ mè ebibaan̄ ebi mêsikbe me udun̄ kinyi mêkwaan̄ me otu oge akọn̄.

²²Enyi mêrọrọ si kubọk emi nrọbe. Enyi kpebechit ifet otu kinyi, kpeberie si inorie ebi ito ekirie.

²³Akisi kinyi môkup enyi me ibot, ikpukot kinyi môkup enyi me ukot; enyi kpebefieek ejit, kpebeto ito. Ire, enyi mêwọlọ lek ita kpai mije ijo inu kinyi, mè ikito mfi me etete kinyi, ogwu ikup, òto mfi onyi ogwu ngwan̄.

²⁴Ijikien môre inu ijejeen̄ inyi enyi. Inu geelek îrọbe, enyi eberọ si ikeya. Inu yi isirọ iso, enyi mêneniriọọn̄ ibe ke emi nre Ogwukaan̄-ene Okumugwem.’

²⁵“Ire owu, gwun̄ ebilene, usen nsibọkọ ere unye kiban̄ isan̄a, ere òkinyi ema unwọọn̄ mè umin, eyi òkilọk ema isasa chieen̄ ikimun̄, eyi ema emabe ichit me otutuuk ejit kiban̄, mè ibọkọ si ema bọn kiban̄ ebirieen̄ mè ebibaan̄,

²⁶me usen ya, ogwu òkọkọt ilibi inwọnọ môsa etip inu inilook owu, inyi owu òsa utọn̄ kwun̄ ònọ.

²⁷Me usen ya, owu môkama otu itumu ikọ melek ogwu mkpat akọn̄ ya. Owu môtumu ikọ, òkpoyaka iriaan̄ ere. Sa me ikeya, owu môre inu ijejeen̄ inyi ema, mè ema eriọọn̄ ibe ke emi nre Okumugwem.”