Read obolo Ijik 25 Bible Online

Ijik 25 - obolo bible

Ijik 25

¹Okumugwem onenitumu inyi emi ibe:

²“Gwun̄ ebilene, kana isi kwun̄ da ebi Amọn, mè ben nriran keme ema.

³Tumu nyi ema ibe, ‘Ìgban̄ ikọ Ogwukaan̄-ene Okumugwem. Ogwukaan̄-ene Okumugwem ìtumu ibe ikeyi: Mije enyi ebelebe ejit mgbọ echakabe mbuban me lek Uwu Mbuban n̄a, mè mgbọ ejijakabe ijọn̄ Ijeren igwook, mè mgbọ ekpulube ebi Juda isi itap me usun̄ akọn̄,

⁴eya orọ, emi mâniyaka enyi itap me ubọk ebi agan̄ mbum-ura, inyi ema ekana ebikaan̄ kinyi. Ema mêrọ ere nluk kiban̄ me etete kinyi, mè igwuun̄ uwu ọfọ kiban̄ me etete kinyi. Ema mêkirie mfut uti kinyi, mè ikinwọ mun̄ ebe kinyi.

⁵Mârọ mè ama Raba ikana ere aligọ obokitaka mbubet, mè ijọn̄ ido Amọn ikana ere arọọn̄ obokililam iwọ efuuk. Enyi mêneniriọọn̄ ibe ke emi nre Okumugwem.

⁶Mije, Ogwukaan̄-ene Okumugwem ìtumu ibe ikeyi: Mije enyi ekwakbe ubọk, mè igon ukot me ijọn̄, mè isa me otutuuk njijọ ejit enyi ekaan̄be ibele ejit me lek ufialek òrọrọn̄ ikeme ijọn̄ Ijeren,

⁷eya orọ, mâninyana ubọk n̄a ikeme enyi, mè isa enyi inyi ebi ofifi ido efum. Mâfieek enyi isan̄a me etete ebi ido geelek, mè ichep enyi isan̄a dìp dìp me etete ebi ife geelek. Mâjijaka enyi, inyi enyi eriọọn̄ ibe ke emi nre Okumugwem.’ ”

⁸“Ogwukaan̄-ene Okumugwem ìtumu ibe ikeyi: ‘Mije Mowabu melek Seya ekibe, “Ìkpọ, uwu kè Juda îkana ikup kubọk otutuuk ebi ofifi ido ekupbe.”

⁹Eya orọ, mâria akọn̄ initim ikpan̄ ama ebi Mowabu, ibene me lek ama echi òkup me otubọk okike ijọn̄ kiban̄, ama echi ema ekisa itọn̄ lek cha, òrere Bet Jesimot mè Baali-Meyon melek Kiriatayim.

¹⁰Mâyaka Mowabu melek ebi Amọn itap me ubọk ebi ìnan̄a me agan̄ mbum-ura, inyi ebiba ekana ebikaan̄, inyi ene geege ikayaka ìkeek ebi Amọn ofifi me etete ebi ido geelek.

¹¹Emi mâsulu Mowabu osusut; ema mêneniriọọn̄ ibe ke emi nre Okumugwem.’ ”

¹²“Ogwukaan̄-ene Okumugwem ìtumu ibe ikeyi: ‘Mije ebi Edọm esan̄abe useen̄ me lek ebi Juda, mè isa me ikeya irọ ikpele ijo inu,

¹³eya orọ, Ogwukaan̄-ene Okumugwem ìtumu ibe ikeyi: Mânyana ubọk n̄a isulu Edọm osusut, mè ikpan̄ ebilene mè anam kan̄ isan̄a, mè ikpan̄ ema isan̄a me otu oge akọn̄, ibene me Teman isi ire Dedan, mè ijijaka ema isan̄a.

¹⁴Mâsa ebi n̄a ebi Ijeren irọ Edọm useen̄ inu. Ema mêrọ Edọm inu ikpọ me lek unaan̄-ejit n̄a, melek uyok uyok unaan̄-ejit n̄a. Edọm môneniriọọn̄ ubọk irọrọ useen̄ inu eyi n̄a okikup. Emi Ogwukaan̄-ene Okumugwem ntumu.’ ”

¹⁵“Ogwukaan̄-ene Okumugwem ìtumu ibe ikeyi: ‘Mije ebi Filisia erọbe useen̄ inu, mè isa me njijọ ejit isan̄a useen̄ me lek ebi Juda, mè iweek ijijijaka Juda, igọọk me ejit oka ochicha chieen̄ ema ekaan̄be akarake ukot ikaan̄,

¹⁶eya orọ, Ogwukaan̄-ene Okumugwem ìtumu ibe ikeyi: Emi mâninyana ubọk n̄a isulu ebi Filisia osusut. Mâkpan̄ ebi Keret ifiin̄, mè ijijaka ebi ìsisik me agba okwaan̄ ichep ita.

¹⁷Mârọ ema ikpele useen̄ inu, mè isa me uyok uyok unaan̄-ejit isulu ema uga osusut. Nsisan̄a useen̄ inu ya isan̄a, ema mêneniriọọn̄ ibe ke emi nre Okumugwem.’ ”