Read obolo Ijik 27 Bible Online

Ijik 27 - obolo bible

Ijik 27

¹Okumugwem onenitumu inyi emi ibe:

²“Gwun̄ ebilene, kọt okwa ito ofolek Taya.

³Tumu nyi Taya, ama òkup me agba awaji ya, òrere ogwu mbit inyi ebi ife geelek ìluk me owuwa ebon okwaan̄, ibe, ‘Ogwukaan̄-ene Okumugwem ìtumu ibe ikeyi: “ ‘Owu ama Taya, owu òkitumu ibe, “Emi njaan̄ uja isan̄a.”

⁴Okike ijọn̄ kwun̄ ìkup me ejit okwaan̄, ebi ìnanama owu enanama owu ijaan̄ isan̄a.

⁵Ema esa uti alaga inwan̄ ònan̄a me Seniri[7] ibak otutuuk uwot kwun̄; mè imọnọ uti olik ge ònan̄a me Lebanọn isa irọ uga uti awala inyi owu.

⁶Esa ilip ònan̄a me Basan ikọ uran̄ kwun̄, mè isa uti alaga inwan̄ ònan̄a me agba asuk achọ Saipọrọs irọ ejit uji kwun̄, mè isa oduuk eniin̄ ibala emen kwun̄.

⁷Ujuja ekwut lilin̄ Ijipiti eyi elọkbe ke esa irọ awala kwun̄, mè isa si irọ egop kwun̄; ekwut esabe ikwek inyọn̄ nruruk kwun̄ ìre ekwut oluku oluku mè ekwut irio irio ònan̄a me agba awaji me Elisa.

⁸Ebi Sidọn mè ebi Arifadi ere ebi uran̄ kwun̄, Taya, ebi kwun̄ ebi ìrọriọọn̄ inu, ema ere ebi ìkisa owu ikọp me okwaan̄.

⁹Ebi ìkup me emen kwun̄ ikitun̄ agbagba chieen̄ uji kwun̄ òkilulut ìre ebi ugane ama Gebali melek ebi ìriọọn̄ inu kiban̄. Otutuuk uji ile geelek me okwaan̄ mè ebi ìkikọkọp, ekikọp itap me lek kwun̄ inikisa inu kiban̄ ikinwene inu mbit kwun̄.

¹⁰“ ‘Ebi Pesia mè ebi Lidia mè ebi Put òwa me urum akọn̄ kwun̄ ekupbe ikitim akọn̄ inyi owu. Ema ejijijen agbọ kiban̄ melek okpibot akọn̄ kiban̄ me lek mgban kwun̄, îre ema ere uja kwun̄.

¹¹Ebi Arifadi melek urum ebi akọn̄ kwun̄ ekibem mgban kwun̄ ikat ikana okokop. Ebi Gamadi ekikup me uwu-oket kwun̄ geelek, ema ejijen agbọ kiban̄ ikana lek mgban kwun̄, ema ekirọ inyi uja kwun̄ iso ifuk.

¹²“ ‘Mije owuwa inu mbit okaan̄be, ebi Tasis mînyam ewe melek kwun̄; ema ekisa alata okuket mè okwukwut mè alala melek oporolo ininwene inu mbit kwun̄.

¹³“ ‘Ebi Jafan,[8] mè ebi Tubali, mè ebi Mesek ekinyam ewe melek kwun̄; ema ekisa ene mè inu esabe ekwe irom ininwene inu mbit me ubọk kwun̄.

¹⁴“ ‘Ebi Bet Togama ekisa inyinya ikwaan̄, mè inyinya akọn̄, mè inyinya mgbidim ukot, ininwene inu mbit me ubọk kwun̄.

¹⁵“ ‘Ebi Dedan mînyam ewe melek kwun̄; ebi ìluk me lek owuwa achọ si ìre ebi ewe kwun̄. Ema ekisa oduuk eniin̄ melek òkwa ofifit inikpe ewe inu ema elepbe me ubọk kwun̄.

¹⁶“ ‘Ebi Aram ekinyam si ewe melek kwun̄ bak me lek owuwa inu mbit owu okirom. Ema ekisa ewuuk tọkwọyis, mè ekwut oluku oluku, mè ekwut ekpakpa, mè ujuja ekwut lilin̄, mè akalari melek ewuuk rubi ininwene inu mbit kwun̄.

¹⁷“ ‘Ebi Juda mè ebi Ijeren mîgọọk owu inyam ewe. Ema ekisa akpa ònan̄a me Minit, mè unin̄i fituru mè aran̄ akwọọk mè aran̄ mè ugwun̄ ekikeken ininwene inu mbit kwun̄.

¹⁸“ ‘Ebi Damasikọs si ekigọọk owu inyam ewe, bak me lek owuwa inu owu okirom, mè ubọk inu mbit kwun̄ osabe iwa. Ema ekisa miin̄ ònan̄a me Elibọn mè okuket inwọọn̄ anam ònan̄a me Jayari igọọk owu inyam ewe.

¹⁹“ ‘Ebi Dan mè ebi Jafan ìnan̄a me Ujan mîkilep si inu mbit kwun̄. Ema ekisa okwukwut urọt lek, mè aran̄ uti kasia mè ikpọk uti kalamus ininwene inu mbit kwun̄.

²⁰“ ‘Ebi Dedan ekisa ekwut inyọn̄ udun̄ inyinya ininyam ewe melek kwun̄.

²¹“ ‘Ebi Arebia mè otutuuk ebi ibot me Keda ìre ebi ewe kwun̄; ema ekisa bọn arọọn̄ mè orie arọọn̄ mè ebot inigọọk owu inyam ewe.

²²“ ‘Ebi mbit Sieba mè Rayama ekinyam ewe melek kwun̄. Ema ekisa atalek inu ekisa irọ inorie itop, mè kpa chieen̄ ewuuk unye otu ewe mè alata araran̄ ininwene inu mbit kwun̄.

²³“ ‘Ebi Aran mè ebi Kane melek ebi Iden, mè ebi mbit Sieba, mè ebi Asuru melek ebi Kilimadi ekinyam ewe melek kwun̄.

²⁴Me oyet ewe kwun̄, ema ekinu ininyam ujuja ofọnti, mè ekwut oluku oluku, mè ekwut echi ekpakpa, mè kpa chieen̄ ekwut ulobo akpọk ekisa ibala ijọn̄ uwu, mè olik igbọ eyakabe igọm mè itobo ekpuk ikam.

²⁵“ ‘Uji ile Tasis okibeme inu mbit kwun̄ cha. Sa me ikeya, etatap inu ijot owu me emen gbak, owu okukup kubọk uji ile òkije me ejit okwaan̄.

²⁶Ebi uran̄ kwun̄ cha ekikọp owu isibi ejit okwaan̄. Ire, efet mbum ura môtọbọ owu isek me ejit okwaan̄.

²⁷Inu ubọọn̄, mè inu mbit kwun̄, mè inu kwun̄ geelek òkup me emen uji cha, mè ebi uji kwun̄, mè ebi edim uji, mè ebi ìkitun̄ uji, mè ebi ewe kwun̄ mè otutuuk ebi akọn̄ kwun̄, mè ofifi ebi geelek ìkup me emen uji cha, mêgen ibia me ejit okwaan̄ me usen owu mônin̄be me ichep.

²⁸Agba okwaan̄ geelek môsisik mgbọ ebi uji kwun̄ mêkitaan̄ ukpo.

²⁹Otutuuk ebi uran̄, mè ebi uji, mè otutuuk ebi edim uji, mêsibi itele uji kiban̄, mè inikikeke me otu ijọn̄.

³⁰Ema mêtaan̄ uga ukpo, mè ito ujat ito me ibot kwun̄; ema mêgwọ achiaan̄ igwook me ibot, mè ifufuku lek me ntọn̄.

³¹Ema mêkwọkọ ijeek me ibot bak me lek kwun̄, mè ikwun ekwut ufieejit. Ema mêfieek ejit enenen, mè inin̄ uwu ito me ibot kwun̄, mè ito ito ujat ujat.

³²Me emen ito ibot kwun̄ ya, ema mêkọt okwa ito ibak owu ibe: “Ekene ke inu okan̄ kubọk îkan̄be Taya, òrerek ichep ibia me ejit okwaan̄?”

³³Mgbọ inu mbit kwun̄ isisibi okwaan̄, owu ora itap owuwa ido owot ijot; owu osa ikpele inu ubọọn̄ kwun̄ mè inu mbit kwun̄ itap ebi ubọọn̄ linyọn̄ ubọọn̄.

³⁴Mgbọ yi, okwaan̄ îtọọn̄ owu ibak me ejit ejit mun̄; inu mbit kwun̄ mè otutuuk ọgbọn̄ ebi melek kwun̄ mîgen ibia melek kwun̄.

³⁵Otutuuk ebi ìluk me agba awaji ekigwook mbiribọ me lek mije kwun; ikpele ukpook îtet ebi ubọọn̄ kiban̄, mè inwene ema isi.

³⁶Ebi mbit me ofifi ido ekifọfiọọk mije kwun̄; mîjijaka owu itap urimi, owu òkpoyaka ikpọk ikup mege ire mgbọ geelek.’ ”