Read obolo Ijik 28 Bible Online

Ijik 28 - obolo bible

Ijik 28

¹Okumugwem onenitumu inyi emi ibe:

²“Gwun̄ ebilene, tumu nyi ogwu òkikpulu ama Taya ibe ke Ogwukaan̄-ene Okumugwem ìtumu ibe ikeyi: “ ‘Owu osa me ugumulek òkup owu me ejit ikitumu ibe, “Emi ìre awaji; emi ǹkweek irek me inyọn̄ ogboon̄ ubọọn̄ ebi kè awaji me ejit okwaan̄.” Ire, owu ìre ebilene, òkare awaji, ubọk geelek okikeek ibe ke owu oriọọn̄ inu kubọk awaji.

³Kpọ, owu òkimọnọ ibe ke owu oriọọn̄ inu igak Danien; ke kpunu nlelet inu geege òlelet me lek kwun̄.

⁴Sa me iriọọn̄-inu kwun̄ mè ngobo-ntet kwun̄, owu okana ogwu òbọbọọn̄ ubọọn̄, mè ititiin̄ alata araran̄ mè alata okuket isun̄ me uwu isun̄-inu ubọọn̄ kwun̄.

⁵Sa me ikpele iriọọn̄-inu kwun̄ me inyanyam ewe, owu orọ inu ubọọn̄ kwun̄ imumana; ugumulek înin̄ igak owu emen, bak me lek inu ubọọn̄ kwun̄.

⁶“ ‘Eya orọ, Ogwukaan̄-ene Okumugwem ìtumu ibe ikeyi: “ ‘ “Bak me lek osun̄be ejit kwun̄ kubọk ejit awaji,

⁷kpọ, mânisa ebi ichen inu akọn̄ me lek kwun̄, ido ebi ìmimin ikpak me lek igak otutuuk ido geelek; ema mêwọọk oge akọn̄ kiban̄ isa ijijaka ujuja iriọọn̄-inu kwun̄ ya, mè ichichaka òrirọ kwun̄.

⁸Ema mêtọp owu itap me emen udọn̄, owu môkwukwu mkpa unye me ejit okwaan̄.

⁹Mgbọ ya, me isi ebi ìkpan̄ owu ya, ìre owu môkọt itumu ibe: ‘Emi ìre awaji’? Ire, me ubọk ebi ìbekpan̄ owu ya, owu môre ogwu ebilene, òkpore awaji.

¹⁰Owu môkwu mkpa ebi kpefieek afi me ubọk ebi ichen. Nra itumu isan̄a. Emi Ogwukaan̄-ene Okumugwem ntumu.” ’ ”

¹¹Okumugwem onenitumu inyi emi ibe:

¹²“Gwun̄ ebilene, kọt okwa ito nyi ogwu ubọọn̄ Taya, mè tumu nyi ọmọ ibe ke Ogwukaan̄-ene Okumugwem ìtumu ibe ikeyi: “ ‘Owu ke ekisa iriọọn̄ ubọk ene okiso ifuk isan̄a, iriọọn̄-inu kwun̄ ìjojot, uja kwun̄ si îso ifuk.

¹³Owu òkup me Iden, òrere uko eyi Awaji; esa otutuuk ewuuk unye otu ewe geelek ibala owu lek: ewuuk rubi, mè topaji, me emeran, mè karasolet, mè onikisi, melek jasipa, mè safaya, mè tọkwọyis, mè berin, melek alata araran̄. Udọn̄ ere ekinwaan̄ ewuuk unye otu ewe cha melek inu esabe itet ema ikaan̄ me lek kwun̄, erom me usen emanbe owu.[9]

¹⁴Owu ìre ogwu mbem emen inyọn̄ òwewele uwop kan̄ ikana ichit ene;[10] ǹsun̄ owu me inyọn̄ ogoon̄ mbuban eyi Awaji, owu okekijijen̄e ikana me etete ewuuk òreren̄e kubọk ukan̄.

¹⁵Owu òsoso ifuk bene me usen erombe owu mege ire mgbọ eniweek ijo inu imun̄ me emen kwun̄.

¹⁶Sa me lek ewe kwun̄ owelebe owot, afa oninin̄ ijot owu me emen, owu onenikirọ ijo inu. Eya ke nlap owu isan̄a me inyọn̄ ogoon̄ Awaji, jei ogwu mbem emen inyọn̄ òkikwek ene lek, mè ichaka owu mbuban me lek, mè irieen̄ owu isibi me etete ewuuk cha òreren̄e kubọk ukan̄.

¹⁷Ugumulek îjot owu ejit mije uja kwun̄; owu ofififila iriọọn̄-inu kwun̄ mije òrirọ kwun̄. Eya ke nsan̄a owu itọp ito me ijọn̄ me isi ebi ubọọn̄, inyi ema ekekpọ owu kubọk ekikpọ ifit.

¹⁸Owu osa owuwa nrọ-nlọ kwun̄ melek ngan ngan ewe kwun̄, ichichaka ere mbuban kwun̄ geelek. Eya ke nrọ inyi ukan̄ ibumu isibi me emen kwun̄, mè itaka owu iriọk, mè owu òkana ntọn̄ me inyọn̄ ijọn̄, me chieen̄ otutuuk ebi geelek ìkimun̄ owu.

¹⁹Otutuuk ebi ìrọriọọn̄ owu isi me ido geelek ekigwogwook mbiribọ me lek mije kwun̄; owu okana ikpele inu ukpook, owu òkpoyaka ikup mege ire mgbọ geelek’ ”

²⁰Okumugwem onenitumu inyi emi ibe:

²¹“Gwun̄ ebilene, kana isi kwun̄ da Sidọn, mè ben nriran keme ọmọ,

²²mè tumu nyi ibe, ‘Okumugwem ìtumu ibe ikeyi: “ ‘Jei Sidọn, emi melek kwun̄ kpetat, ire, mâkup me emen kwun̄ ibọkọ itọn̄; mgbọ nsisulu owu osusut, mè isa me lek kwun̄ ijeen̄ ibe ke emi ìre ogwu òkup me mbuban, ebi ene mêneniriọọn̄ ibe ke emi nre Okumugwem.

²³Mâria ijo orukan̄ ijet owu, mè irọ eje ikigbuk me lek oniin̄ kwun̄; ebi ekpan̄be mêrurọn̄ọ igwook me emen kwun̄, oge akọn̄ môkekikeen̄ ebi kwun̄ me agan̄ geelek. Owu mêneniriọọn̄ ibe ke emi nre Okumugwem.

²⁴“ ‘Ebi ìluluk ikana ebi uwu kè Ijeren mè ikikpọ ema chieen̄ isiki, kpebeyaka ikpọk ikire abọm egbe mè ukpak ikigwak ema mè ikichiin̄ ema lek ofifi. Ema mêneniriọọn̄ ibe ke emi nre Ogwukaan̄-ene Okumugwem.

²⁵“ ‘Ogwukaan̄-ene Okumugwem ìtumu ibe ikeyi: Mgbọ nsigbaan̄ ebi Ijeren me ido geelek eyiyalabe ema isi igwook inititiin̄, me isi ebi ofifi ido, emi mânenisa me lek kiban̄ ijeen̄ ibe ke emi ǹkup me mbuban. Ebi Ijeren mêneniluk me lek ijọn̄ kiban̄, eyi nnyibe Jekọp ogwu ikwaan̄ n̄a.

²⁶Ema mêluk me lek ijọn̄ ya me utelelek, mè ikinama uwu, mè ikiwop uko gerep. Mgbọ nsisulu ebi ìluluk ikana ema cha mè ikikpọ ema chieen̄ isiki osusut, ema mêneniluk me utelelek. Ema mêneniriọọn̄ ibe ke emi nre Okumugwem Awaji kiban̄.’ ”