Read obolo Ijik 29 Bible Online

Ijik 29 - obolo bible

Ijik 29

¹Me òso akọp mè usen iba, me òso akọp onyan̄, me òso akọp acha me lek etetbe Jioyakin me usun̄ akọn̄, Okumugwem onenitumu inyi emi ibe:

²“Gwun̄ ebilene, kana isi kwun̄ da ogwu Fero, ogwu ubọọn̄ Ijipiti, mè ben nriran keme ọmọ, mè ben si keme otutuuk Ijipiti.

³Tumu nyi ọmọ ibe, ‘Ogwukaan̄-ene Okumugwem ìtumu ibe ikeyi: “ ‘Owu ogwu Fero, ogwu ubọọn̄ Ijipiti, emi melek kwun̄ kpetat, owu ikpele asakwun òlalaak inyana me emen bọn okolo okwaan̄ Nali kwun̄ cha. Owu òkibe, “Okwaan̄ Nali ìre eyi n̄a; emi nrọ ọmọ inyi lek n̄a.”

⁴Mâgọbọ owu owuwa ukọọk me uga, mè irọ ibe irin̄ emen okolo kwun̄ cha egba ekam me lek ikpọk kwun̄, mè itaba owu isibi me emen okolo kwun̄ cha, melek otutuuk irin̄ cha me lek ikpọk kwun̄ egbabe ikam.

⁵Mâto owu itele me emen èwê, owu mè otutuuk irin̄ emen okolo okwaan̄ Nali kwun̄ cha. Owu môrọn̄ me eden̄ oron ikwu, kpunu ogwu òbokwọọk nkwukwu kwun̄, mè ìre iben owu ifuun̄. Mâsa owu irọ inorie inyi ebi kè anam oron mè ebi kè unọn òwulu me inyọn̄.

⁶Otutuuk ebi ìluk me Ijipiti mêneniriọọn̄ ibe ke emi nre Okumugwem. “ ‘Mgbọ ebi uwu kè Ijeren eweekbe ibebieen̄ lek me lek kwun̄, owu òkup kubọk mkpat anyiaan̄ kpunube unye me lek.

⁷Mgbọ ema esabe ubọk kiban̄ itet owu, owu òkpukpukpuku, mè ichiin̄ ema oguga igwak; mgbọ ema ebieen̄be lek me lek kwun̄, owu òfafan̄a, mè irọ ebon kiban̄ ikwala.

⁸“ ‘Eya orọ, Ogwukaan̄-ene Okumugwem ìtumu ibe ikeyi: Kpọ, mânisa oge akọn̄ igọọk owu, mè ikpan̄ ebilene melek anam isan̄a me emen kwun̄.

⁹Ijọn̄ Ijipiti môkakana ere òyayat ikup ukpọk ukpọk. Ema mêneniriọọn̄ ibe ke emi nre Okumugwem. “ ‘Mije, owu òkibe, “Okwaan̄ Nali ìre eyi n̄a, emi nrom,”

¹⁰eya orọ, kpọ, emi melek kwun̄ kpetat, emi ncha si okwaan̄ Nali kwun̄. Mârọ ijọn̄ Ijipiti ikana ukpọk ukpọk, mè iyat ita ibene me ama Migidọn isi ire ama Asuwan, mè isi igwook me otubọk okike ijọn̄ Etiopia.

¹¹Ukot ogwu ebilene mè ìre ukot anam ìkpoje iraka me lek ijọn̄ ya; kpukpunu si ene geege òboluk me lek mege akọp acha ini.

¹²Mârọ ijọn̄ Ijipiti ikana ere òyayat ita me etete otutuuk ere geelek òyayat, mè ama kan̄ geelek ilaak ukpọk ukpọk mege akọp acha ini, me etete otutuuk ama geelek òlalaak ukpọk ukpọk. Mâyiyala ebi Ijipiti ikana me etete ofifi ido geelek, mè itọọn̄ ema itaak me etete ebi ofifi ife geelek.

¹³“ ‘Ire, Ogwukaan̄-ene Okumugwem ìtumu ibe ikeyi: Akọp acha ini isiraka, mâkpulu ebi Ijipiti inan̄a me ido geelek ntọọn̄be ema igwook isa ika.

¹⁴Mâsa ebi Ijipiti inan̄a me usun̄ akọn̄ igwu ikom ika, mè isa ema ika inu me Paturus, òrere ijọn̄ iman kiban̄. Ema mênenikana ama ubọọn̄ ikanyege lek.

¹⁵Ọmọ obowọ ichit me etete ama ubọọn̄ geelek; ìkpoyaka ikpọk ibene lek kan̄ igak ofifi ido geege. Mârọ ọmọ iwọ enenen, ire lek, ìkpoyaka ikpọk ikọt ikikpulu ofifi ido geege ofifi.

¹⁶Ijipiti ìkpoyaka ikpọk ire utoon̄-ejit inyi ebi uwu kè Ijeren. Kpan̄asi ikeya, ìbokirọ ebi Ijeren ekekeek ijo inu ema erọbe me isisi itap ibot me ubọk kan̄. Ema mêneniriọọn̄ ibe ke emi nre Ogwukaan̄-ene Okumugwem.’ ”

¹⁷Me okpa usen me adasi onyan̄, me òso akọp acha iba mè jaaba, Okumugwem onenitumu inyi emi ibe:

¹⁸“Gwun̄ ebilene, Nebukadineja ogwu ubọọn̄ Babilọn îsa urum akọn̄ kan̄ isak ofaak isi akọn̄ me Taya. Ibot ebi akọn̄ kan̄ geelek înyiaan̄, oguga kiban̄ geelek îfiọọk. Ire, ọmọ mè urum akọn̄ kan̄ kpekaan̄ mkpukpe geege me lek akọn̄ ema esakbe ofaak isi me Taya.

¹⁹Eya orọ, Ogwukaan̄-ene Okumugwem ìtumu ibe ikeyi: Emi mâniyaka Ijipiti itap me ubọk kè Nebukadineja ogwu ubọọn̄ Babilọn. Ọmọ môchiaan̄ inu ubọọn̄ Ijipiti, mè ifum inu Ijipiti isa ifo, mè ikwọọk Ijipiti irak. Eya mônenire mkpukpe inyi ebi akọn̄ kan̄.

²⁰Ǹnyinyi ọmọ ijọn̄ Ijipiti me mkpukpe ubọk ikwaan̄ kan̄ mije ofaak eyi ọmọ melek ebi akọn̄ kan̄ esakbe me lek ikwaan̄ ya ema erọbe inyi emi. Emi Ogwukaan̄-ene Okumugwem ntumu.

²¹“Me usen ya, mâtap ebi Ijeren unye me emen, mè irọ inyi owu Ijikien òchili otu òtumu ikọ me eden̄ kiban̄. Ema mêneniriọọn̄ ibe ke emi nre Okumugwem.”