Read obolo Ijik 30 Bible Online

Ijik 30 - obolo bible

Ijik 30

¹Okumugwem onenitumu inyi emi ibe:

²“Gwun̄ ebilene, ben nriran, mè tumu ibe ‘Ogwukaan̄-ene Okumugwem ìtumu ibe ikeyi: “ ‘Ìtaan̄ ukpo ìto ito ìtumu ìbe, “Jei, usen ùrioon̄ îta me ubọk!”

³Mije, usen ya îgbet, usen osusut Okumugwem îgbet, ìbore usen oduku inyọn̄ môkanabe ere ichit, mè ire si ibot mgbọ ùrioon̄ inyi ebi ofifi ido.

⁴Oge akọn̄ mônin̄ Ijipiti, ikpele ofaak môkup me Kus[11] mgbọ ebi ekpan̄be mêkirurọn̄ọ me Ijipiti, ekekifum inu ubọọn̄ Ijipiti isa ifon, mè ikpukpuku ọdọ Ijipiti igwook.

⁵Ebi akọn̄ Kus mè Put mè Lidia, mè otutuuk Arebia[12], mè ebi Libia[13], mè ebi ìgọgọọk ema igbaan̄ inyan̄a ibot, mêgọọk Ijipiti ikwaan̄ irurọn̄ọ me otu oge akọn̄.’ ”

⁶Okumugwem ìtumu ibe ikeyi: “Ebi ìgọọk Ijipiti irọ ebon ge mêrurọn̄ọ, unye kan̄ ya îkisa igumu lek môrọrọn̄. Bene me Migidọn si re Asuwan, ebi ìkup me emen Ijipiti mêrurọn̄ọ me otu oge akọn̄. Emi Ogwukaan̄-ene Okumugwem ntumu.

⁷Ema mêkana ere òyayat me etete otutuuk ere geelek òyayat. Ama kiban̄ cha si mêlaak ukpọk ukpọk me etete otutuuk ama geelek òlalaak ukpọk ukpọk.

⁸Mgbọ nsichim ukan̄ itap me Ijipiti, mè otutuuk ebi ntap-ubọk kan̄ isitaka ikọọk, mgbọ ya, ema mêneniriọọn̄ ibe ke emi nre Okumugwem.

⁹“Me usen ya, mâria ebi etip isi Kus. Ema mêjeje me uji ile isi iriki Kus ya òkup me utelelek. Urimi môninin̄ me emen kan̄ me usen ya mgbọ ùrioon̄ môtoon̄be Ijipiti. Usen ya ìkpolọlọ inunu.

¹⁰“Ogwukaan̄-ene Okumugwem ìtumu ibe ikeyi: “ ‘Mâchep urum ebi Ijipiti sa me ubọk kè Nebukadineja, ogwu ubọọn̄ Babilọn.

¹¹Ọmọ mè ebi urum akọn̄ kan̄ melek kan̄, ebi ìmimiin̄ ikpak me lek ichit me otutuuk ido geelek, ema ke ebesa inu inijijaka ido Ijipiti. Ema ebewọwọọk oge akọn̄ kiban̄ isa inin̄ Ijipiti, mè ikpan̄ ene itutọmọ me ijọn̄.

¹²Mârọ ibot mun̄ okolo Nali cha geelek ichiaak ita, mè inyam ijọn̄ ido Ijipiti inyi ebi ikpak; mârọ inyi ebi ichen ejijaka ijọn̄ ya melek inu geelek òkup me lek ijọn̄ ya. Emi Okumugwem ntumu.’ ”

¹³Ogwukaan̄-ene Okumugwem ìtumu ibe ikeyi: “Mâjijaka mkpọmfaka geelek isan̄a, mè irọ inu ekọkọ geelek ichieen̄ ita me Memfis.[14] Ogwu ibot geege ìkpoyaka ikup me Ijipiti; mâtap ukpook ichit otutuuk lek ijọn̄ Ijipiti.

¹⁴Mâjijaka Paturus igwook, mè itap ukan̄ iwọp Sowan, mè inyi Tebes[15] osusut.

¹⁵Mâgbuku uyok uyok unaan̄-ejit n̄a igwook me Sin, ere unye Ijipiti okupbe, mè ifieek ogbogbo urum akọn̄ ebi Tebes cha ifiin̄.

¹⁶Mâtap ukan̄ iwọp Ijipiti; ama Pelusiọm môkijijiin̄ me irak uga ufiak. Ama Tebes ìbogwagwak isan̄a; ama Memfis môkimun̄ ukwook usen geelek.

¹⁷Nsabọn irieen̄ ama Eliopolis,[16] mè ama Bubasitis[17] mêkwaan̄ irurọn̄ọ me otu oge akọn̄; mêkpulu ebi ama chi me usun̄ akọn̄ isa ifon.

¹⁸Me Tapenes, ikarek usen ya môkana udun mgbọ nsifan̄a ọgbọn Ijipiti; unye kan̄ ya ọmọ okisa igugo lek môtata. Oduku inyọn̄ môduku ichit ọmọ, mêkpukpulu ebi asabọn ama kan̄ me usun̄ akọn̄.

¹⁹Ikeya ke mbasulu Ijipiti osusut, ema mêneniriọọn̄ ibe ke emi nre Okumugwem.”

²⁰Me òso usen jaaba, me adasi onyan̄, me òso akọp mè acha ge, Okumugwem onenitumu inyi emi ibe:

²¹“Gwun̄ ebilene, nra ifan̄a ubọk ogwu Fero, ogwu ubọọn̄ Ijipiti. Kpebọp-nu, inyi ubọk ya môtabe; kpesasa-nu ekwut ikat unan kan̄, inyi ubọk kan̄ mônyebe ikem isasa itet oge akọn̄.

²²Eya orọ, Ogwukaan̄-ene Okumugwem ìtumu ibe ikeyi: Emi melek ogwu Fero, ogwu ubọọn̄ Ijipiti, kpetat. Mâfaan̄ ubọk iba kan̄, eyi atata mè eyi òfafan̄a, mè irọ oge akọn̄ iwaka ọmọ me ubọk irọn̄.

²³Mâyiyala ebi Ijipiti ikana me ofifi ido, mè iche ema itaak inyi ebi agan̄ geelek.

²⁴Mârọ inyi ubọk ogwu ubọọn̄ Babilọn inye, mè itap oge akọn̄ n̄a me ubọk kan̄. Ire, mâfaan̄ ubọk ogwu Fero; ọmọ môkukup me isi ogwu ubọọn̄ Babilọn ikigọt kubọk ogwu unan osakbe me lek okigọt mgbọ ìbokwu.

²⁵Mârọ inyi ubọk ogwu ubọọn̄ Babilọn inye, ire, ubọk ogwu Fero ìbokidididen̄. Mgbọ nsitap oge akọn̄ n̄a me ubọk ogwu ubọọn̄ Babilọn, mè ọmọ isiben oge ya ikiwuwum inin̄ ido Ijipiti, mgbọ ya, ebi Ijipiti mêneniriọọn̄ ibe ke emi nre Okumugwem.

²⁶Mâyiyala ebi Ijipiti ikana me ofifi ido, mè itọọn̄ ema itaak me agan̄ geelek. Ema mêneniriọọn̄ ibe ke emi nre Okumugwem.”