Read obolo Ijik 32 Bible Online

Ijik 32 - obolo bible

Ijik 32

¹Me adasi usen, me òso akọp mè onyan̄ iba, me òso akọp mè acha iba me lek usun̄ akọn̄, Okumugwem onenitumu inyi emi ibe:

²“Gwun̄ ebilene, kọt okwa ito ofolek ogwu Fero, ogwu ubọọn̄ Ijipiti ibe: “ ‘Owu òbet lek gwun̄ egbe àtat me etete ebi ido geelek; owu òbet lek asakwun òkup me okwaan̄ ikibọn̄ mun̄ ikana me emen okolo; owu òkisa ukot kwun̄ ikifuku mun̄ itap afuk me okolo.

³“ ‘Ogwukaan̄-ene Okumugwem ìtumu ibe ikeyi: “ ‘Mâsa ikpele urum ene initọp njin n̄a ichit owu, ema mêsasa njin n̄a itaba owu iwolo.

⁴Mâtọp owu ito me ijọn̄, mè idut owu itap me oron; mârọ otutuuk unọn òwulu me inyọn̄ esusọn me lek kwun̄, mè irọ otutuuk anam oron geelek etaka owu ejot owot.

⁵Mâchon ufuk kwun̄ ikana inyọn̄ ogoon̄, mè itap nkwukwu kwun̄ ijot emen iteke itiik ibene.

⁶Mâsa eje kwun̄ ya òkigbọgbọọk igwook ichit ijọn̄, mege isi ire inyọn̄ ogoon̄ geelek; ufuk kwun̄ môjojot emen òkpuku mun̄ geelek.

⁷Mgbọ nsiwut owu iniin̄, mâchit isi akpabin inyọn̄, mè irọ ntoronyan̄ òkup me akpabin inyọn̄ idun; mâsa oduku inyọn̄ ikwek ura, onyan̄ ìkpoyaka inyi utoon̄ kan̄.

⁸Mârọ otutuuk utoon̄ me akpabin inyọn̄ ikana udun ichit enyi; Mâtap udun ichit lek ijọn̄ kinyi. Emi Okumugwem ntumu.

⁹Mâtap owuwa ebi ene saasaak me ejit mgbọ nsisa etip mfufiat mfiatbe owu isi itọbọ ebi ofifi ido, mege ire lek ido ebi owu okariọọn̄ge.

¹⁰Mârọ mbiribọ igwook owuwa ebi ene me lek mije kwun̄, mè irọ ebi ubọọn̄ kiban̄ efieek owot mije kwun̄ mgbọ nsiwuwum oge akọn̄ n̄a me isi kiban̄. Me usen irọn̄ kwun̄ ya, ene geelek me etete kiban̄ ìbokiraran mgbọ geelek, bak me lek ebek ugwem kan̄.

¹¹“ ‘Mije, Ogwukaan̄-ene Okumugwem ìtumu ibe ikeyi: “ ‘Oge akọn̄ ogwu ubọọn̄ Babilọn môre owu lek.

¹²Mârọ ibe urum ebi kinyi erurọn̄ọ me otu oge akọn̄ ebi unye, ebi ido ìmimiin̄ ikpak me lek ichit me etete ebi ido geelek. Ema mêjijaka inu cha Ijipiti okisa igumu lek, mè ikpan̄ otutuuk urum ebi kan̄.

¹³Mâjijaka otutuuk anam kiban̄ isan̄a me agba lek owuwa okolo; ukot ebilene ìkpoyaka ikifuku mun̄ okolo cha ibat, ukot anam si ìkpoyaka ikibuku mun̄ okolo cha itap afuk.

¹⁴Mânenirọ mun̄ okwaan̄ kan̄ cha igen, mè irọ okolo kan̄ cha ikigbọọk kubọk aran̄. Emi Ogwukaan̄-ene Okumugwem ntumu.

¹⁵Mgbọ nsirọ Ijipiti ikana ukpọk ukpọk, mè ichan otutuuk inu òjojot ido ya isan̄a, mgbọ nsikpan̄ otutuuk ebi ìluk me emen kan̄ isan̄a, ema mêneniriọọn̄ ibe ke emi nre Okumugwem.

¹⁶“ ‘Eyiyi ore okwa ito ya ema mêkọtbe isa ito ọmọ. Ebibaan̄ ebi ofifi ido ebekọt. Ema ebekọt inyi Ijipiti melek otutuuk urum ebi kan̄. Emi Ogwukaan̄-ene Okumugwem ntumu.’ ”

¹⁷Me òso akọp mè usen go me onyan̄,[18] me òso akọp mè acha iba, Okumugwem onenitumu inyi emi ibe:

¹⁸“Gwun̄ ebilene, to ito nyi urum ebi Ijipiti. Gele Ijipiti mè ebibaan̄ ido ebi unye cha siki tap me irak ijọn̄, inyi esi ekup melek ebi ìkwakwaan̄ ifo emen udọn̄.

¹⁹Tumu nyi ema ibe: ‘Ekene ke enyi ejaan̄ uja igak? Ìgele ìsiki, ìsi ìgọọk ebi ekafieekge afi ìlaak ìbia.’

²⁰Ema mêrọn̄ inin̄ me etete ebi ìkwaan̄ me otu oge akọn̄. Mîwọwọọk oge akọn̄ isibi isan̄a ikikpọ ọmọ. Etaba ọmọ esa eje, ọmọ melek otutuuk urum ene kan̄.

²¹Ebi ibot me lek ebi unye mêkup me ama ekwukwu ikitumu ikọ ibak Ijipiti melek ebi ìgọgọọk ọmọ ikeke ikibe, ‘Ema mîsibi inu inilaak igba ebi ekafieekge afi melek ebi ìkwakwaan̄ me otu oge akọn̄.’

²²“Asiria mè otutuuk urum akọn̄ kan̄ òwa me ere ya. Udọn̄-ufuun̄ otutuuk ebi kan̄ ekpan̄be, ebi ìkwakwaan̄ me otu oge akọn̄, ìgbagban ikana ọmọ.

²³Udọn̄-ufuun̄ kiban̄ ìkup me ejit ejit udọn̄. Ebi akọn̄ kan̄ elililam ikana udọn̄-ufuun̄ kan̄. Otutuuk kiban̄ ìtatap ukpook igak linyọn̄ ebi ògat ugwem mîkwaan̄ isan̄a, ema eje me otu oge akọn̄ ikwaan̄ irurọn̄ọ.

²⁴“Elam òwa me ere ya, melek otutuuk urum akọn̄ kan̄ egbanbe ikana udọn̄-ufuun̄ kan̄. Otutuuk kiban̄ ekpakpan̄, eje me otu oge akọn̄ ikwaan̄ irurọn̄ọ. Otutuuk ebi ìtatap ukpook me linyọn̄ ebi ògat ugwem, ebi ekafieekge afi, mîkwaan̄ ifo irak ijọn̄. Ema mîrie esip, ema melek ebi ìkwakwaan̄ ifo emen udọn̄.

²⁵Mîto mkpilaak me etete ebi ekpan̄be inyi ọmọ, udọn̄-ufuun̄ otutuuk urum ebi kan̄ ogbagban ikana ọmọ. Otutuuk kiban̄ ìre ebi ekafieekge afi, ebi ìkwakwaan̄ me otu oge akọn̄. Ukpook ema etapbe me linyọn̄ ebi ògat ugwem orọ ema ekibọkọ esip, ema melek ebi ìkwakwaan̄ ifo emen udọn̄. Emaan̄ ema igba ebi ekpan̄be.

²⁶“Mesek mè Tubali òwa si me ere ya, melek otutuuk urum ebi akọn̄ kiban̄ ìgbagban ikana udọn̄-ufuun̄ kiban̄. Otutuuk kiban̄ ìre ebi ekafieekge afi; ema ekwaan̄ me otu oge akọn̄, mije ema etapbe ukpook ikana linyọn̄ ebi ògat ugwem.

²⁷Kpemaan̄ nkwukwu kiban̄ me irek umin me etete ebi unye cha ebi ekafieekge afi ìkwakwaan̄ irurọn̄ọ, ebi ìsa nroon̄ akọn̄ kiban̄ igbaalek isi ama ekwukwu. Ebi unye chi, esa oge akọn̄ kiban̄ irak ema ibot, mè itoon̄ mkpukpe ijo inu kiban̄ me inyọn̄ ukwuuk kiban̄,[19] bak me lek ukpook ebi unye cha etapbe me linyọn̄ ebi ògat ugwem.

²⁸“Owu ogwu Fero, mêgbaan̄ owu melek ebi ekafieekge afi ikpukpuku, owu môlalaak me etete ebi ìkwakwaan̄ me otu oge akọn̄.

²⁹“Edọm òwa me ere ya, ọmọ melek ebi ubọọn̄ kan̄ mè otutuuk ebi ibot kan̄. Ema mîkaan̄ unye, ire, emaan̄ ema me etete ebi ìkwaan̄ me otu oge akọn̄. Ema elilam melek ebi ekafieekge afi, ebi ìkwakwaan̄ ifo emen udọn̄.

³⁰“Otutuuk ebi ibot ìnan̄a me agan̄ inyọn̄ mè otutuuk ebi Sidọn òwa si me ere ya; ema ekwaan̄ mkpa esip, mè igọọk ebi ekpan̄be inin̄ udọn̄, ubọk geelek ema esabe unye kiban̄ itap ukpook me lek owuwa ebi ene. Ema, ebi ekafieekge afi, egọọk ebi ìkwakwaan̄ me otu oge akọn̄ igbaan̄ ililam, mè iben esip me isi isa ifo emen udọn̄, igọọk ofifi ebi ìkwakwaan̄.

³¹“Ogwu Fero mômun̄ ema, mè isa ikat ejit ofolek otutuuk urum ebi akọn̄ kan̄, òrere otutuuk urum akọn̄ ogwu Fero, ebi ìkwakwaan̄ me otu oge akọn̄. Emi Ogwukaan̄-ene Okumugwem ntumu.

³²Ubọk geelek nsabe ogwu Fero itap ukpook me otutuuk linyọn̄ ebi ìkup me ugwem, ọmọ melek otutuuk urum ebi akọn̄ kan̄ mêkwaan̄ irurọn̄ọ me etete ebi ekafieekge afi, ebi ìkwakwaan̄ me otu oge akọn̄. Emi Okumugwem ntumu.”