Read obolo Ijik 34 Bible Online

Ijik 34 - obolo bible

Ijik 34

¹Okumugwem onenitumu inyi emi ibe:

²“Gwun̄ ebilene, ben nriran keme ebi ìkikpulu Ijeren. Ben nriran, mè tumu nyi ema ibe ke Ogwukaan̄-ene Okumugwem ìtumu ibe ikeyi: ‘Môfieek inyi ebi mkpulu Ijeren, ebi ìkikpukpo lek kiban̄. Ìre ìkare arọọn̄ ke ebi òkpukpo arọọn̄ ekikpukpo ni?

³Enyi ekinwọ mun̄ ebe, mè ikisa inwọọn̄ anam ichim ofọnti itap, mè ikikpan̄ arọọn̄ egwookbe imiin̄ ufuk itaka, ire, arọọn̄ cha, enyi kpekikpukpo.

⁴Arọọn̄ echi ikanyege lek, enyi kpekitap unye me lek; echi orukan̄ okupbe me lek, enyi kpekigwa; echi ukot ofaan̄be, enyi kpekibọp unan kiban̄; echi òjeje ilọ oniin̄, enyi kpekisa ika; echi òchechieen̄, enyi kpekisi iweek. Ire, enyi ekisa me unye-ubọk mè nnaan̄ ikikpulu ema.

⁵Eya orọ ema eyiyalabe, mije, ema kpekaan̄ ogwu òkpukpo arọọn̄. Bak me lek eyiyalabe, ema ekakana inorie inyi otutuuk anam afa geelek me oron.

⁶Arọọn̄ n̄a înyinya ikana otutuuk inyọn̄ ogoon̄ mè inyọn̄ ubene orioon̄ geelek. Ema eyiyiyala ikana otutuuk lek ijọn̄ ya, kpunu ogwu òsisi iweek, kpunu ogwu òdodo inu ofolek kiban̄.

⁷“ ‘Eya orọ, enyi ebi òkpukpo arọọn̄, ìgban̄ ikọ Okumugwem:

⁸Kè lek ugwem n̄a! Emi Ogwukaan̄-ene Okumugwem ǹkitumu ibe ikeyi: Urum arọọn̄ n̄a îkana anam ebi kè anam afa ekigwak itaka, mè ikana inorie inyi otutuuk anam oron geelek, mije una òkpukpo arọọn̄. Ebi òkpukpo arọọn̄ n̄a kpekisi iweek arọọn̄ n̄a, ire, ema ekikpukpo lek kiban̄ gaalek, ìkare arọọn̄ n̄a ke ema ekikpukpo.

⁹Mije keya, enyi ebi òkpukpo arọọn̄, ìnọ ikọ Okumugwem:

¹⁰Ogwukaan̄-ene Okumugwem ìtumu ibe ikeyi: Emi melek ebi òkpukpo arọọn̄ kpetat; ema ke mbatet mije urum arọọn̄ n̄a. Mâsan̄a ema isan̄a me ikpukpukpo urum arọọn̄ n̄a. Ema kpebeyaka ikikpukpo lek kiban̄ ofifi. Mâsik urum arọọn̄ n̄a isan̄a ema me otu, ìkpoyaka ikpọk ire inorie inyi ema ofifi.

¹¹“ ‘Ogwukaan̄-ene Okumugwem ìtumu ibe ikeyi: Ìkpọ, îre emi me lek n̄a mbaweek arọọn̄ n̄a, mè ikpọ ema chieen̄ me lek.

¹²Ike ogwu òkpukpo arọọn̄ okikpọ chieen̄ me lek urum arọọn̄ kan̄ me mgbọ îkupbe melek kiban̄, ike ya ke mbakpọ chieen̄ me lek urum arọọn̄ n̄a. Mânyan̄a ema isibi me otutuuk ere geelek eyiyalabe ema igwook me usen oduku inyọn̄ mè udun ya.

¹³Mâsan̄a ema me etete ebi ife geelek isibi, mè ititen̄e ema me ido geelek, mè isa ema inigwook me lek ijọn̄ kiban̄. Mâkpukpo ema me inyọn̄ ogoon̄ Ijeren cha, mè emen òkpuku mun̄ cha, mè otutuuk ere nluk geelek me lek ijọn̄ ya.

¹⁴Mâsa ema isi ikpukpo me ata ijọn̄ urie anam, ema mêkibọm urie me inyọn̄ ubene ogoon̄ Ijeren. Ere keya ke ema ebekililam me lek ata ijọn̄ urie, mè ikirie urie me ere mbubet ojaan̄be lek me inyọn̄ ogoon̄ Ijeren.

¹⁵Emi mbakpukpo urum arọọn̄ n̄a, mè irọ ema elilam etap efuuk. Emi Ogwukaan̄-ene Okumugwem ntumu.

¹⁶Mâsi iweek echi òchechieen̄, mè isa echi òlọlọ oniin̄ ika. Mâbọp unan echi òfafan̄a ukot, mè irọ echi ikanyege lek inye lek. Ire, mâjijaka echi òmimiin̄ ufuk mè echi ònyenye lek. Mâsa unen oyerebet ikpukpo ema.

¹⁷“ ‘Ogwukaan̄-ene Okumugwem ìtumu ibe ikeyi: Me etete kinyi, enyi urum arọọn̄ n̄a, mâsibi oyerebet inyi arọọn̄ mè arọọn̄, mè isibi inyi ebi kè orie arọọn̄ mè ebi kè orie ebot.

¹⁸Ìre enyi kpesa ata mbubet enyi etakabe igwen inu ni? Ìre keke orọ enyi ekisa ukot ijak echi enyi etakabe isik? Ìre mun̄ òtatana enyi enwọbe ìkakup me lek inu geege me lek kinyi ni? Ìre keke orọ enyi ekisa ukot ijak eyi òsisik ibubuku?

¹⁹Ìre urum arọọn̄ n̄a kechilọ mênitaka mbubet enyi ejakbe cha mè inwọ mun̄ enyi ejakbe ibubuku ni?

²⁰“ ‘Eya orọ, Ogwukaan̄-ene Okumugwem ìtumu inyi ema ibe ikeyi: Emi gaalek me lek n̄a mbasibi oyerebet inyi arọọn̄ echi ufuk ufuk mè echi asasa lek.

²¹Mije, enyi ekisa nkan̄ kinyi mè oguga kinyi ikibieen̄ arọọn̄ echi ikanyege lek, mè ikisa iko kinyi ikigoon̄ ema, mege enyi mêrieen̄be ema isibi iyiyala ichieen̄.

²²Eya orọ, mânyan̄a arọọn̄ n̄a isibi, inyi ekayaka ìtutuku ema. Mâsibi oyerebet inyi arọọn̄ mè arọọn̄.

²³Mâto ogwu òkpukpo arọọn̄ ge, òrere Debit ogwu ikwaan̄ n̄a, ogwu môkikpọ ema chieen̄ me lek. Ọmọ môkikpọ ema chieen̄ me lek, mè ire ogwu òkpukpo arọọn̄ inyi ema.

²⁴Emi Okumugwem mâre Awaji kiban̄, Debit ogwu ikwaan̄ n̄a môrere ogwu ibot me etete kiban̄. Emi Okumugwem ntumu.

²⁵“ ‘Mârọ inyan̄a-ibot eyi esuuk melek kiban̄, mè ilap ijo anam-unye geelek isan̄a me lek ijọn̄ kiban̄, ema mêkekiluk me emen èwê, mè ikilaak me oron me utelelek.

²⁶Mâgbana ema, mè igbana si ere òkukup ikana ogoon̄ n̄a. Mârọ ibot ikirep me ibot mgbọ kan̄, ibot cha môre ibot òkinyi ugbana.

²⁷Uti òkup me oron môkekito mfut kiban̄, ijọn̄ môkekitibi inu isibi ogbogbo. Ema mêkekikaan̄ utelelek me lek ijọn̄ kiban̄. Nsisọp mkpọn ọgbọn kiban̄ igwook, mè inyan̄a ema isibi me ubọk ebi ìsa ema irọ usun̄, ema mêneniriọọn̄ ibe ke emi nre Okumugwem.

²⁸Ido geege ìkpoyaka inu ema mfum me lek, ijo anam oron geege ìkpoyaka ichim ema igwak itaka. Ema mêluk me utelelek, ene geege ìkpoyaka itap ema ukpook me lek.

²⁹Mânyi ema ijọn̄ òkitaan̄ etip me isisibi mfut, uraafiọọn̄ ìkpoyaka itet ema me ido kiban̄, ebi ofifi ido kpebeyaka ikisa ema irọ inu ochak.

³⁰Ema mêneniriọọn̄ ibe ke emi Okumugwem, Awaji kiban̄, òwa melek kiban̄, ke ema ebi uwu kè Ijeren ìre ebi n̄a. Emi Ogwukaan̄-ene Okumugwem ntumu.

³¹Enyi ìre urum arọọn̄ n̄a, urum arọọn̄ emi nkikpukpo. Enyi ìre ebilene, emi nre Awaji kinyi. Emi Ogwukaan̄-ene Okumugwem ntumu.’ ”