Read obolo Ijik 35 Bible Online

Ijik 35 - obolo bible

Ijik 35

¹Okumugwem onenitumu inyi emi ibe:

²“Gwun̄ ebilene, kana isi kwun̄ da ogoon̄ Seya; ben nriran keme ọmọ,

³mè tumu nyi ibe: ‘Ogwukaan̄-ene Okumugwem ìtumu ibe ikeyi: Ogoon̄ Seya, emi melek kwun̄ kpetat. Mâbene ubọk n̄a ida owu, mè irọ owu òyat òta, mè òkana ukpọk ukpọk.

⁴Mârọ ama kwun̄ geelek ikana ǹrioon̄, mè irọ owu òkana ukpọk ukpọk. Owu môneniriọọn̄ ibe ke emi nre Okumugwem.

⁵“ ‘Owu okaan̄ ochicha me lek ebi Ijeren akarake ukot ikaan̄, mè isa me ikeya ida bọn ebi Ijeren itap me otu oge akọn̄ mgbọ ùrioon̄ otoon̄be ema, mgbọ osusut ijo inu kiban̄ orebe okputut.

⁶Eya orọ, kè lek ugwem n̄a, emi Ogwukaan̄-ene Okumugwem ntumu, mâyaka owu inyi ibe efiat eje kwun̄, ifiat eje môlilaba owu. Eyi owu òkacha ifiat eje, ifiat eje obolilaba owu.

⁷Mârọ ogoon̄ Seya iyat ikana ukpọk ukpọk. Mârọ inyi ene geege ikaje ìraka me ere ya, mè irọ si ibe ene geege ikayaka ìka ìnu me ere ya.

⁸Ebi ìkwakwaan̄ mêtutọmọ ijot inyọn̄ ogoon̄ kwun̄, ebi ìkwaan̄ me otu oge akọn̄ mêrurọn̄ọ ijot inyọn̄ orioon̄ kwun̄ mè emen iteke ijọn̄ kwun̄ mè otutuuk òkpuku mun̄ kwun̄ geelek.

⁹Mârọ inyi owu òyat òre mgbọ geelek; ama kwun̄, ene kpebeluk. Owu môneniriọọn̄ ibe ke emi nre Okumugwem.

¹⁰“ ‘Owu òtumu ibe, “Ido iba kechi mè lek ijọn̄ iba kechi môkana echi n̄a, eji mêtet ibọkọ isak,” ubọk geelek ibe ke emi Okumugwem òwa me ere ya nkupbe.

¹¹Eya orọ, kè lek ugwem n̄a, emi Ogwukaan̄-ene Okumugwem ntumu, mâsulu owu osusut ikpọ me lek unaan̄-ejit mè mba-ejit osabe icha ebi n̄a. Mgbọ nsisulu owu osusut, mâsa me ikeya irọ inyi ebi ene eriọọn̄ emi me etete kiban̄.

¹²Mgbọ ya, owu môneniriọọn̄ ibe ke emi Okumugwem nnọ otutuuk ikọ unye chieen̄ cha otumube ibak ogoon̄ Ijeren. Owu òtumu ibe: “Mîjijaka ema isan̄a, mè ikana inyi eji ibe eji echep esan̄a.”

¹³Ikeya ke enyi esa otu kinyi ikigugo lek inyi emi, mè ikitumu ogbogbo ikọ ikeme emi. Emi nnọnọ.

¹⁴Ogwukaan̄-ene Okumugwem ìtumu ibe ikeyi: Nsijijaka owu igwook, otutuuk ebi linyọn̄ mênwọọn̄ unwọọn̄.

¹⁵Ike owu onwọọn̄be unwọọn̄ mgbọ ìrot uwu kè Ijeren ojijakabe, ikeya si ke mbarọ owu. Jei ogoon̄ Seya, ebejijijaka owu mè otutuuk Edọm isan̄a kpai. Otutuuk ene mêneniriọọn̄ ibe ke emi nre Okumugwem.’ ”