Read obolo Ijik 36 Bible Online

Ijik 36 - obolo bible

Ijik 36

¹“Owu, gwun̄ ebilene, ben nriran bak ebi kè ogoon̄ Ijeren, mè tumu ibe, ‘Jei, enyi ogoon̄ Ijeren, ìnọ ikọ Okumugwem.

²Ogwukaan̄-ene Okumugwem ìtumu ibe ke ogwu ochicha ìkitumu ikọ ibak enyi ibe: “Ìin̄-iin̄-ìin̄! Ogoon̄ ubene ile ukot ikaan̄ cha îkana inin̄ eji ubọk.” ’

³Eya orọ, ben nriran, mè tumu ibe ke Ogwukaan̄-ene Okumugwem ìbe ikeyi: ‘Mije ebi ochicha kinyi egwakbe enyi igwook, mè ililaba enyi me agan̄ geelek, inyi enyi ekana inu ebi ofifi ido ekaan̄be, mè irọ enyi ekana ebi ebi ene ekitumu usem ikpak inyi, mè ikirọ ochak,

⁴eya orọ, enyi ebi kè ogoon̄ Ijeren, ìnọ ikọ Ogwukaan̄-ene Okumugwem: Ikeyi ke Ogwukaan̄-ene Okumugwem otumu inyi ogoon̄ mè orioon̄, melek òkpuku mun̄ mè iteke, mè ere ejijakabe ikana ǹrioon̄ mè ama òyayat cha echi ido ebi ìluluk ikana enyi efumbe mè ikisa irọ ochak:

⁵Ogwukaan̄-ene Okumugwem ìtumu ibe ikeyi: Mije ebi ofifi ido cha ìsisik mè otutuuk ebi Edọm esabe ijo ubelejit mè ejit ikpak ibọkọ ijọn̄ n̄a isak, inyi ema efum ijọn̄ ya, emi nsa me uyok uyok mba-ejit n̄a itumu iko ikeme ema.’

⁶Eya orọ, ben nriran ofolek ijọn̄ Ijeren, mè tumu nyi ebi kè ogoon̄ mè orioon̄, mè òkpuku mun̄ melek iteke geelek ibe: ‘Ogwukaan̄-ene Okumugwem ìtumu ibe ikeyi: Ìkpọ, ǹsa ejit mba mè unaan̄-ejit n̄a itumu ikọ, bak me lek enyi ebọkọbe esip me ubọk ebi ofifi ido.

⁷Eya orọ, Ogwukaan̄-ene Okumugwem ìtumu ibe ikeyi: Mbene ubọk n̄a inyan̄a ibot ibe ke ido cha òkukup ikana enyi mêbọkọ esip eyi kiban̄ si.

⁸“ ‘Ire, enyi ebi kè ogoon̄ Ijeren, enyi mêtibi owuwa otu agọọk, mè ito owuwa mfut inyi ebi n̄a ebi Ijeren, mije, ema mêkikika inu.

⁹Ìkikpọ, mbele ejit me lek kinyi, mâkaan̄ ata ejit me lek kinyi; mêrọkọ ijọn̄ me inyọn̄ kinyi, mè iwop inu me lek kinyi.

¹⁰Mârọ otu ifuk ene me inyọn̄ kinyi imumana, otutuuk ebi uwu kè Ijeren mêmumana. Ama cha òyayat, mêluk me emen, mè ikpọk inama ǹrioon̄ cha.

¹¹Mârọ ibe otu ifuk ene mè anam me inyọn̄ kinyi iwa; ema mêmumana, mè iwa enenen. Mârọ ebi ene eluk me inyọn̄ kinyi kubọk mgbọ òraraka, mè irọ enyi ebọọn̄ ubọọn̄ egak adasi mgbọ. Enyi mêneniriọọn̄ ibe ke emi nre Okumugwem.

¹²Mârọ ebi ene, òrere ebi Ijeren ebi n̄a, ekeje ekana me inyọn̄ kinyi. Ema mêkaan̄ enyi, enyi mêrere ìrot kiban̄; enyi kpebeyaka ikpọk itele ibe ema ekana ebi una bọn.

¹³“ ‘Ogwukaan̄-ene Okumugwem ìtumu ibe ikeyi: Mije ebi ene ekitumu inyi enyi ibe; ‘Enyi ìre ijọn̄ òkitaka ene, mè ikirọ ido kinyi inan bọn,’

¹⁴eya orọ, enyi kpebeyaka ire ijọn̄ òkitaka ene, kpebeyaka ikirọ ido kinyi inan bọn. Emi Ogwukaan̄-ene Okumugwem ntumu.

¹⁵Enyi kpebeyaka ikpọk ikinọ ochak ebi ofifi ido ekichak enyi, kpebeyaka ikpọk ikibọkọ itiik ebi ene, enyi kpebeyaka irọ ibe ido kinyi inan̄a irọn̄. Emi Ogwukaan̄-ene Okumugwem ntumu.’ ”

¹⁶Okumugwem onenitumu si inyi emi ibe:

¹⁷“Gwun̄ ebilene, mgbọ ebi Ijeren ekiluk me lek ijọn̄ kiban̄, ema mîsa ijo ugwem kiban̄ mè ijo inu ema ekirọ ififila ijọn̄ ya. Eru kiban̄ ìkup nsebe nsebe me chieen̄ n̄a kubọk enenwaan̄ òkup me irek ebibaan̄.

¹⁸Eya orọ mgbukube uyok uyok unaan̄-ejit n̄a igwook ema me lek, mije, ema mîfiat eje ene me ijọn̄ ya, mè isa mkpọmfaka kiban̄ ififila si ijọn̄ ya.

¹⁹Ntọọn̄ ema ikana ido geelek, mè iyiyala ema itap me etete ebi ife geelek. M̀fieek oyerebet inyi ema ikpọ me lek ijo ugwem kiban̄ mè ijo inu ema ekirọ.

²⁰Ere geelek ema enin̄be me etete ebi ofifi ido cha, ema ekifafiat erieen̄ n̄a, mije, ekitumu ikọ ibak ema ibe, ‘Ebibi ìre ebi eyi Okumugwem, ire, mîlilaba ema isibi me lek ijọn̄ Okumugwem.’

²¹Îyọt emi me lek ibe ke ebi uwu kè Ijeren mîfifila erieen̄ mbuban n̄a me etete ebi ofifi ido cha eyiyalabe ema isi igwook.

²²“Eya orọ, tumu nyi ebi uwu kè Ijeren ibe ke Ogwukaan̄-ene Okumugwem ìtumu ibe ikeyi: ‘Enyi ebi uwu kè Ijeren, ìkare bak me lek kinyi ke nkirọ inu chi. Îre bak me lek erieen̄ mbuban n̄a ya enyi efifilabe isan̄a me etete ebi ofifi ido me ere geelek enyi enin̄be.

²³Mâjeen̄ ibe ke ikpele erieen̄ n̄a îkup me mbuban, erieen̄ ya eyi efifilabe me etete ebi ofifi ido, òrere erieen̄ ya eyi enyi efifilabe me etete ebi ife cha. Mâsa me lek kinyi ijeen̄ ebi ofifi ido cha, me isi kiban̄, ibe ke emi nkup me mbuban. Mgbọ ya, ema mêneniriọọn̄ ibe ke emi nre Okumugwem. Emi Ogwukaan̄-ene Okumugwem ntumu.

²⁴“ ‘Mije mâsan̄a enyi me ofifi ido cha isibi, mè ititen̄e enyi me etete otutuuk ebi ife geelek isa igwu ikom ika inu inyọn̄ ijọn̄ kinyi.

²⁵Mânyan mun̄ òtatana igwook enyi me lek, enyi mêtatana. Mâgwọk otutuuk orieen̄ cha isan̄a enyi me lek, inyi enyi etana, mè isan̄a otutuuk mkpọmfaka kinyi cha isan̄a enyi me lek.

²⁶Mânyi enyi ayaya ejit, mè itap enyi ayaya ekwukwu me emen. Mâmọnọ ejit eyi ewuuk ya isan̄a enyi me lek, mè inyi enyi ejit ufuk ufuk.

²⁷Mâtap Ekwukwu n̄a me emen kinyi, mè irọ ibe enyi ekerọ orọmijọn̄ n̄a, mè ekegbala chieen̄ ekesun̄ ikan n̄a.

²⁸Enyi mêluk me inyọn̄ ijọn̄ nnyibe ebi nte kinyi; enyi mêre ebi n̄a, emi mârere Awaji kinyi.

²⁹Mânyan̄a enyi isibi me emen otutuuk orieen̄ kinyi geelek. Mârọ akpa itibi me inyọn̄ ijọn̄ kinyi, mè iwa; m̀kpayaka isa akan̄ ijet enyi.

³⁰Mârọ uti kinyi ito mfut iwa, mè irọ ijọn̄ kinyi itibi inu ogbogbo, inyi akan̄ ikayaka ìsa esip ìtet enyi me isi ebi ofifi ido.

³¹Enyi mênenikeek ijo ugwem enyi elukbe melek ijo irọrọ kinyi cha enyi erọbe. Nlilọ inu kinyi cha mè filafila ugwem kinyi cha mônenirọ ibe eru kinyi gaalek ijọ enyi ejit.

³²Enyi ebi uwu kè Ijeren, ìriọọn̄ ibe ke ìkare bak me lek kinyi ke nrọ inu yi. Kè esip itet enyi, kè ochak ichak enyi! Emi Ogwukaan̄-ene Okumugwem ntumu.

³³“ ‘Ogwukaan̄-ene Okumugwem ìtumu ibe ikeyi: Usen nsigwọk enyi itana me otutuuk ijo inu kinyi, mârọ enyi eluk me ama kinyi cha, mè ekpọk enama ǹrioon̄ cha.

³⁴Ijọn̄ eyatbe itele cha, mêwop inu ichit. Ebi geelek ìkije iraka kpebeyaka ikimun̄ ijọn̄ ya kubọk ijọn̄ òyayat.

³⁵Ema ebekitumu ibe, “Ijọn̄ keyi eyi eyatbe itele ìyaka inikana uko Iden. Ama cha òkakana ǹrioon̄, echi eyatbe itele, mè ijijaka igwook, îkana ama òkakaan̄ mgban ikana mgbọ keyi, ebi ene ekekiluk me emen kiban̄.”

³⁶Ebi ido cha ìsisik, ebi ìluluk ikana enyi, mêneniriọọn̄ ibe ke emi Okumugwem mkpọk inama inu ejijakabe igwook, mè ikpọk iwop mfut me ijọn̄ òyayat cha. Îre emi Okumugwem ntumu, m̀barọrọ si iso.’

³⁷“Ogwukaan̄-ene Okumugwem ìtumu ibe ikeyi: Mâtele ibe ebi uwu kè Ijeren ebeek mbeek keyi, mârọ si inu keyi inyi ema: Mârọ ebi kiban̄ ewa kubọk urum arọọn̄.

³⁸Ike urum arọọn̄ okiwa me Jeruselem me ibot mgbọ ekigwa ngwugwa ijọk, ikeya si ke urum ebi ene ebewa me emen ama echi mgbọ òyayat ita cha. Ema mêneniriọọn̄ ibe ke emi nre Okumugwem.”