Read obolo Ijik 40 Bible Online

Ijik 40 - obolo bible

Ijik 40

¹Me òso akọp usen me onyan̄, me ibebene acha, me òso akọp acha iba mè go eji ekupbe me usun̄ akọn̄, òrere òso akọp mè acha ini ebọkọbe ama Jeruselem, me usen keya, unye Okumugwem onenijot emi me emen, inenisa emi isi ama Jeruselem.

²Me emen ilaak ọkpọchieen̄, Awaji onenisa emi inu me inyọn̄ ijọn̄ Ijeren, mè ito emi me inyọn̄ ogoon̄ ge òbebene enenen. Me inyọn̄ ogoon̄ ya, me agan̄ osiki, îkaan̄ inu ge òkup kubọk ìre ama.

³Inenisa emi isi ama ya. Nnenimun̄ ene ge òkitoon̄ kubọk ekwe okekebe me isotu otunchit, mè ikaan̄ olik lilin̄ melek ujọn̄ọ uti itọ-inu me ubọk.

⁴Ogwu ene ya onenibe emi, “Gwun̄ ebilene, ruk chieen̄ kwun̄ kpọ, mè siki utọn̄ kwun̄ gban̄, mè sa ejit kwun̄ gwuun̄ me lek otutuuk inu mbajeen̄ owu. Îre mije keyi ke esa owu inu me ere yi. Kpa otutuuk inu geelek omun̄be nyi ebi uwu kè Ijeren.”

⁵Nnenikpọ, mè imun̄ mgban ge okanabe Uwu Mbuban okokop me agan̄ oyet. Ogwu ene ya îkaan̄ uti itọ-inu me ubọk, eyi ujọn̄ọ kan̄ orebe ejit ge mè agbagba otubọk gweregwen me ujọn̄ọ otitọ.[21] Inenitọ mgban ya, akpọk kan̄ orere uti itọ-inu ya ge, ubene kan̄ si orere uti itọ-inu ge.

⁶Ene ya onenisi otunchit agan̄ mbum-ura, mè inene otitop kan̄ isi itọ inyọn̄ isotu otunchit ya. Akpọk kan̄ orere uti itọ-inu ge.[22]

⁷Ere ebi mbem ekikeke me otunchit ya, ujọn̄ọ ge kan̄ ìre uti itọ-inu ge, sà uwele kan̄ ore si uti itọ-inu ge. Nan̄a me ere ogwu mbem ge si re ofifi ìre ejit ge mè agbagba otubọk ita. Akpọk isotu òkup me lek otunchit òkup me lek ọfọ òkiyaka isi ida Uwu Mbuban ya ìre si uti itọ-inu ge.

⁸Îtọ si ọfọ òkup me lek otunchit agan̄ emen, akpọk kan̄ si orere uti itọ-inu ge.

⁹Inenitọ ọfọ òkup me otunchit, eya orere ejit iba, akpọk ubọk afọn̄ kan̄ orere agbagba otubọk gweregwen. Ọfọ òkup me otunchit ya ìkiyaka isi ida Uwu Mbuban.

¹⁰Me agan̄ emen me lek otunchit agan̄ mbum-ura, ere ebi mbem ita okup me agan̄ ge, ita si okukup me agan̄ keyilọ. Ita cha ìre ìkike me itọtọ. Ikeya si, akpọk agba uwu òkup me etete kiban̄ me agba agan̄ iba cha ìre si ìkike.

¹¹Ene ya onenitọ uwele isotu otunchit ya, isisibi ejit iba mè agbagba otubọk gweregwen, ujọn̄ọ kan̄ onenire ejit ita mè agbagba otubọk ita.

¹²Me isi ere ogwu mbem geelek, agba uwu òwa eyi ubene kan̄ orebe agbagba otubọk ita. Ere ogwu mbem geelek ìre ejit ge mè agbagba otubọk gweregwen me ujọn̄ọ, mè ejit ge mè agbagba otubọk gweregwen si me uwele.

¹³Inenitọ si otunchit, ibene me inyọn̄ ere ogwu mbem ge isi ire lek inyọn̄ ofifi, uwele keya orere ejit gweregwen mè agbagba otubọk ita nan̄a me isotu ge saba toon̄ me eyi òkikpọ eyi keya.

¹⁴Îtọ agba uwu òkakana otunchit cha me agan̄ emen, isisibi akọp mè ejit go. Ere îtọbe ya îre lek ọfọ òyaka isi ida oyet egep ya.[23]

¹⁵Bene me isotu otunchit ya na re ọfọ otunchit ya eyi agan̄ emen ìre akọp mè ejit iba mè agbagba otubọk gweregwen.

¹⁶Ere ebi mbem cha mè agba uwu òkup me etete kiban̄ òkup me emen otunchit agan̄ emen mîkaan̄ owuwa nruruk ikat ikana. Ikeya si, ọfọ ya si îkaan̄ nruruk echi kan̄. Otutuuk nruruk ìkup me agan̄ emen oyet egep. Me lek agba uwu cha òkup me etete ere ebi mbem cha, mîgwook uti asaak uti asaak ijot lek isa ibala.

¹⁷Ene ya onenisa emi inu me oyet egep agan̄ oyet. Mmumun̄ enamabe agwut mè agba oyet ikana oyet egep ya okokop; akọp agwut ita okup me agba oyet ya.

¹⁸Agba oyet ya îchak me lek otunchit cha, mè ijọn̄ọ ìkike melek otunchit cha. Eyiyi ore agba oyet eyi òsisiki.

¹⁹Inenibene me isi otunchit òsisiki itọ uwele kan̄ inire isi oyet egep eyi agan̄ emen, isisibi akọp ejit iba mè go, me agan̄ mbum-ura mè agan̄ inyọn̄.

²⁰Îtọ si ujọn̄ọ mè uwele otunchit òkikpọ agan̄ inyọn̄ me lek oyet egep agan̄ oyet.

²¹Ere ebi mbem ita okup me agan̄ ge, ita si okukup me agan̄ keyilọ. Ere ebi mbem chi melek agba uwu òkup me etete kiban̄ mè ọfọ kan̄ cha ìre ujọn̄ọ mè uwele yaage melek otunchit eyi adasi, ujọn̄ọ ìre akọp mè ejit iba mè agbagba otubọk gweregwen, sà uwele ore ejit gweregwen mè agbagba otubọk ita.

²²Nruruk kan̄ geelek, mè ọfọ kan̄ mè uti asaak egwookbe isa ibala, ìwele ìkike melek otunchit òkikpọ agan̄ mbum-ura. Otitop jaaba ke ekisa inene isi lek otunchit yi; ọfọ kan̄ ìkup me ibot agan̄ òkikpọ oyet egep ya.

²³Otunchit eyi oyet egep agan̄ emen ìkikpọ otunchit agan̄ inyọn̄, ikeya si ke otunchit agan̄ mbum-ura okikpọ otunchit agan̄ inyọn̄. Ibebene me otunchit eyi oyet egep itọ ire lek otunchit agan̄ mbum-ura, isisibi akọp ejit iba mè go.

²⁴Ene ya osasa emi inu me agan̄ osiki, mmumun̄ otunchit oniin̄ agan̄ osiki. Inenitọ ubọk afọn̄ otunchit keya, mè itọ ọfọ kan̄, ujọn̄ọ kiban̄ mè uwele kiban̄ orere ikike me lek echi kechilọ cha.

²⁵Otunchit ya melek ọfọ kan̄ mîkaan̄ si nruruk ikat ikana kubọk echi kechilọ okaan̄be; ujọn̄ọ ìre akọp mè ejit iba mè agbagba otubọk gweregwen, sà uwele ore ejit gweregwen mè agbagba otubọk ita.

²⁶Otitop jaaba ke ekisa inene ire lek otunchit ya, ọfọ kan̄ ìkup me ibot agan̄ òkikpọ oyet egep ya. Îkaan̄ si uti asaak egwookbe isa ibala lek, ge me agan̄ ge, ge me agan̄ keyilọ.

²⁷Oyet egep agan̄ emen îkaan̄ otunchit òkikpọ agan̄ osiki. Ene ya otọtọ ibene me lek otunchit ya isi ire lek otunchit òkup agan̄ oyet me agan̄ osiki, isisibi akọp ejit iba mè go.

²⁸Inenisa emi itibi otunchit agan̄ osiki inin̄ me oyet egep agan̄ emen, mè itọ otunchit osiki ya, ujọn̄ọ kan̄ mè uwele kan̄ orere si ìkike melek echi kechilọ.

²⁹Ere ebi mbem kan̄ cha, mè agba uwu òkup me etete kiban̄, mè ọfọ kan̄ ìre ìkike me ujọn̄ọ mè uwele melek echi kechilọ. Otunchit ya melek ọfọ kan̄ mîkaan̄ nruruk me lek ikat ikana. Ujọn̄ọ otunchit ya ìre akọp mè ejit iba mè agbagba otubọk gweregwen, uwele kan̄ orere ejit gweregwen mè agbagba otubọk ita.

³⁰Ọfọ cha òkup me lek otunchit cha òkukup ikana oyet egep agan̄ emen ìre ejit gweregwen mè agbagba otubọk ita me ujọn̄ọ, mè ejit ge mè agbagba otubọk ita me uwele.

³¹Ọfọ kan̄ ìkikpọ oyet egep agan̄ oyet; mîgwook uti asaak isa ibala ubọk afọn̄ otunchit kan̄; otitop jeeta ke ekisa inene isi ire lek.

³²Isasa emi inu oyet egep agan̄ emen eyi agan̄ mbum-ura, mè itọ si otunchit keya, irere ìkike me ujọn̄ọ mè uwele melek echi kechilọ.

³³Ere ebi mbem kan̄, mè ubọk afọn̄ otunchit kan̄, mè ọfọ kan̄ ìre si ìkike me ujọn̄ọ mè uwele. Otunchit ya melek ọfọ kan̄ mîkaan̄ si nruruk me lek ikat ikana. Ujọn̄ọ kan̄ ìre akọp mè ejit iba mè agbagba otubọk gweregwen, uwele kan̄ orere ejit gweregwen mè agbagba otubọk ita.

³⁴Ọfọ kan̄ ìkikpọ otunchit agan̄ oyet. Mîgwook uti asaak isa ibala ubọk afọn̄ otunchit kan̄ agan̄ iba; otitop jeeta ke ekisa inene isi ire lek.

³⁵Inenisa emi inu me otunchit agan̄ inyọn̄ initọ eya, irere ìkike me ujọn̄ọ mè uwele melek echi kechilọ.

³⁶Ere ebi mbem kan̄ mè ubọk afọn̄ kan̄ mè ọfọ kan̄ orere si ìkike melek echi kechilọ. Îkaan̄ si nruruk me lek ikat ikana; ujọn̄ọ kan̄ orere akọp mè ejit iba mè agbagba otubọk gweregwen; sà uwele kan̄ ore ejit gweregwen mè agbagba otubọk ita.

³⁷Ere ebi mbem kan̄ ìkikpọ oyet egep agan̄ oyet; mîgwook uti asaak isa ibala ubọk afọn̄ otunchit kan̄ agan̄ iba; otitop jeeta ke ekisa inene.

³⁸Agwut ge melek isotu òwa me lek ọfọ geelek òkup me agba otunchit geelek me agan̄ emen. Emen agwut cha ke ekigwọk inu ngwugwa ewọwọp geelek.

³⁹Me emen ọfọ òkup me lek otunchit ya, ikasi itoon̄-inu iba iba òwa me agba agan̄ iba kan̄. Me inyọn̄ ikasi cha ke ekigwu anam ngwugwa ewọwọp iriọk, mè anam ngwugwa ijo inu, mè echi ngwugwa awọ.

⁴⁰Me ntut agan̄ oyet, agan̄ ekije isi lek isotu otunchit agan̄ inyọn̄, me agba lek ọfọ otunchit ya, ikasi iba okup me agan̄ ge, ikasi iba si okukup me agan̄ keyilọ.

⁴¹Ikasi ini okup me agba otunchit agan̄ ge, sà ikasi ini si okup me agba agan̄ keyilọ; isisibi ikasi jeeta me agba ọfọ ya. Inyọn̄ ikasi cha ke ekitoon̄ anam ngwugwa igwu.

⁴²Îkaan̄ si ofifi ikasi ini òkukup, echi esabe ewuuk erọrọkọ irọ. Inyọn̄ ikasi kechi ke ekisun̄ nroon̄ ikwaan̄ ekisa igwu anam ngwugwa ewọwọp iriọk mè echi ofifi chieen̄ ngwugwa. Ujọn̄ọ kiban̄ ge ge ìre agbagba otubọk ini mè okpọkọ, uwele kiban̄ orere si agbagba otubọk ini mè okpọkọ, sà ubene kiban̄ ore agbagba otubọk ita.

⁴³Mîjijen ukọọk otu iba ikana me lek ikasi cha ikat ikana ere ekijeen̄ anam cha egwube. Ujọn̄ọ ukọọk cha ge ge ìre agbagba otubọk ge. Inyọn̄ ikasi cha ke ekitoon̄ ufuk anam ngwugwa cha ibak.

⁴⁴Mîtap agwut iba inyi ebi okwa me emen oyet egep agan̄ emen eyi òkup me isi isi, agwut ge okup me agba lek otunchit agan̄ inyọn̄ ikiyaka isi ida agan̄ osiki, sà ge okup me agba lek otunchit agan̄ mbum-ura ikiyaka isi ida agan̄ inyọn̄.

⁴⁵Ene ya onenitumu inyi emi ibe, “Agwut keyi òkiyaka isi ida agan̄ osiki ìkup inyi ebi ngwugwa ebi ìkikpọ chieen̄ me lek ikwaan̄ Uwu Mbuban.

⁴⁶Agwut eyi òkiyaka isi ida agan̄ inyọn̄ okup inyi ebi ngwugwa ebi ìkikpọ chieen̄ me lek ikwaan̄ lek ntook. Ebibi ìre bọn kè Jadọk, ìrere ebi otoko kè Libai, ebi ìkije igbet lek Okumugwem inikisi ikwaan̄ inyi.”

⁴⁷Inenitọ oyet egep ya, agba ini cha orere ikike, akọp ejit iba mè go me ujọn̄ọ, akọp ejit iba mè go si me uwele. Me isi Uwu Mbuban ya ke ntook ya okup.

⁴⁸Inenisa emi inu me ọfọ lek Uwu Mbuban, mè initọ ubọk afọn̄ ọfọ ya, uwele kan̄ orere ejit ge mè agbagba otubọk ita me agan̄ ge, mè ejit ge mè agbagba otubọk ita si me agan̄ keyilọ. Uwele isotu ya ìre ejit ita mè agbagba otubọk gweregwen, sà agba uwu òkup me etete kiban̄ ge ge ore agbagba otubọk onaan̄ge me agan̄ ge ge.

⁴⁹Ujọn̄ọ ọfọ ya ìre ejit go, sà uwele kan̄ ore ejit ita. Ekije me lek otitop inene isi ire lek. Mîtap atà me lek ubọk afọn̄ cha agan̄ iba.