Read obolo Ijik 41 Bible Online

Ijik 41 - obolo bible

Ijik 41

¹Ene ya onenisa emi inu me 18 Ere Mbuban, mè initọ ubọk afọn̄; uwele kan̄ orere ejit ge mè agbagba otubọk gweregwen me agan̄ ge, mè ejit ge mè agbagba otubọk gweregwen si me agan̄ keyilọ; òrere uwele Akpatan̄ Mbuban.

²Isotu kan̄ ìre ejit iba mè agbagba otubọk gweregwen me uwele, akpọk agba uwu òkup me agan̄ iba kan̄ orere ejit ge mè agbagba otubọk ita me agan̄ ge, mè ejit ge mè agbagba otubọk ita me agan̄ keyilọ. Îtọ si Ere Mbuban ya, ujọn̄ọ kan̄ orere akọp ejit, sà uwele kan̄ ore ejit go.

³Ineniraka inin̄ ere mbuban òkup me emen emen, mè itọ ubọk afọn̄, agbagba otubọk gweregwen. Îtọ si isotu, ubene kan̄ orere ejit ge mè agbagba otubọk onaan̄ge; agba uwu òkup me agan̄ iba isotu ya ore ejit ge mè agbagba otubọk gweregwen me uwele.

⁴Îtọ si ere ya me lek kan̄, ujọn̄ọ kan̄ orere ejit go, uwele kan̄ orere si ejit go me agan̄ isi Ere Mbuban. Inenitumu inyi emi ibe, “Ere keyiyi ore Ere Òkup Mbuban Ichit.”

⁵Inenitọ agba uwu Uwu Mbuban ya, akpọk kan̄ orere ejit ge mè agbagba otubọk gweregwen; uwele eyi agwut agba oyet ge ge òkakat ikana Uwu Mbuban ya, orere ejit ge ge.

⁶Agwut agba oyet cha ìre inyọn̄ ita ita, ge me inyọn̄ ge. Akọp agwut ita akọp agwut ita okup me ukpa inyọn̄ ge. Mîtap agọm ikat ikana agba uwu Uwu Mbuban ya, isa irirak agwut cha ikaan̄, inyi urak kiban̄ ikakup me emen agba uwu Uwu Mbuban ya.

⁷Ike ekinene agwut agba oyet cha inan̄a me inyọn̄ ire inyọn̄, ikeya ke agwut cha okiwele. Agọm cha enamabe ikat ikana Uwu Mbuban ya ìkup nkikeek nkikeek, ikeya si ke uwele agwut cha okitap inu me lek ike ekinene ifo inyọn̄. Otitop ekisa inene ifo inyọn̄ ìnan̄a me ijọn̄ ije itibi etete isi ire agan̄ inyọn̄.

⁸Mmun̄ ibe ke Uwu Mbuban ya îkaan̄ okpurukpu òbebene inan̄a me ijọn̄ ikat ikana; eya ore ọdọ inyi agwut agba oyet cha. Ubene kan̄ ìre ujọn̄ọ uti itọ-inu ya ge, òrere ejit ge mè agbagba otubọk gweregwen.

⁹Akpọk agba uwu agwut agba oyet cha ìre ejit ge mè agbagba otubọk ita. Agbagba òkup me etete agwut agba oyet cha me lek Uwu Mbuban

¹⁰melek agwut ebi ngwugwa ìre ejit go me uwele ikat ikana Uwu Mbuban ya.

¹¹Isotu iba okup ekisa ije inan̄a me agbagba ya inin̄ agwut agba oyet cha, isotu ge okup me agan̄ inyọn̄, sà ge okup me agan̄ osiki. Uwele agbagba òkup me ere ya ìre ejit ge mè agbagba otubọk ita ikat ikana.

¹²Uwu òkikpọ oyet egep Uwu Mbuban me ibot agan̄ ichep-ura ìre akọp mè ejit jaaba mè agbagba otubọk gweregwen me uwele. Akpọk agba uwu ya ìre ejit ge mè agbagba otubọk ita ikat ikana, ujọn̄ọ kan̄ orere akọp ejit iba mè iba mè agbagba otubọk gweregwen.

¹³Inenitọ Uwu Mbuban ya, ujọn̄ọ kan̄ orere akọp ejit iba mè go; oyet egep Uwu Mbuban, melek uwu òkup me agan̄ osiki, mè mgban kan̄, orere si akọp ejit iba mè go me ujọn̄ọ.

¹⁴Uwele agan̄ isi Uwu Mbuban ya melek oyet egep kan̄ eyi agan̄ mbum-ura orere akọp ejit iba mè go.

¹⁵Inenitọ ujọn̄ọ uwu òkikpọ oyet egep Uwu Mbuban ya me agan̄ udun̄, igbaalek agba oyet cha òkup me agan̄ iba kan̄, isisibi akọp ejit iba mè go. Ere Mbuban mè Ere Òkup Mbuban Ichit melek ọfọ òkikpọ oyet egep,

¹⁶igbaalek inyọn̄ isotu otunchit, mè nruruk cha, mè agba oyet cha òkakat ikana agwut agba oyet ita cha, esa uwot igbaka ichit ibene me ijọn̄ ire lek nruruk, mè isa si ichit lek nruruk cha.

¹⁷Me agan̄ oyet me inyọn̄ ibot isotu ekije inin̄ Ere Òkup Mbuban Ichit, melek otutuuk agba uwu ikat ikana Ere Mbuban mè Ere Òkup Mbuban Ichit,

¹⁸mîkọ ebi mbem emen inyọn̄ mè uti asaak ijot, uti asaak ge me etete ebi mbem emen inyọn̄ iba. Ebi mbem emen inyọn̄ cha geelek ìkaan̄ isi iba.

¹⁹Isi òbet lek isi ene okikpọ uti asaak me agan̄ ge, sà isi òbet lek isi egbe àtat okikpọ uti asaak me agan̄ keyilọ. Ikeya ke ekọ ema ikat ikana otutuuk emen Uwu Mbuban ya.

²⁰Ibene me ijọn̄ isi ire inyọn̄ ebek isotu, ekọkọ ebi mbem emen inyọn̄ melek uti asaak ijot lek agba uwu Ere Mbuban ya.

²¹Ubọk afọn̄ isotu Ere Mbuban ya ìkaan̄ isi ini, ikeya si ke ubọk afọn̄ isotu Ere Òkup Mbuban Ichit okup.

²²Esa uwot irọ ntook; ubene kan̄ ìre agbagba otubọk onaan̄ge, sà ujọn̄ọ kan̄ ore agbagba otubọk gweregwen, uwele kan̄ si orere agbagba otubọk gweregwen. Otu utọn̄ kan̄, mè ebon kan̄,[24] mè agba kan̄ ìre uwot. Ene ya onenitumu inyi emi ibe, “Eyiyi ìre ikasi òkup me isi Okumugwem.”

²³Ere Mbuban mè Ere Òkup Mbuban Ichit ekaan̄ isotu iba iba.

²⁴Afọn̄ okpọkọ iba iba okup me lek isotu cha, afọn̄ òkigwuku inyi isi mè udun̄.

²⁵Mîkọ ebi mbem emen inyọn̄ melek uti asaak me lek isotu Ere Mbuban ya kubọk ekọbe me lek agba uwu ya. Okwukwek esabe uwot igon ke esa ichit isi ọfọ me agan̄ oyet Uwu Mbuban ya.

²⁶Mîtap nruruk ekọbe uti asaak me isi iba kiban̄ ikat ikana lek agba uwu ọfọ ya. Mîtap si okwukwek uwot cha iso lek agwut agba oyet Uwu Mbuban.