Read obolo Ijik 44 Bible Online

Ijik 44 - obolo bible

Ijik 44

¹Ene ya onenisa emi igwu ikom inu me otunchit Uwu Mbuban eyi òkup me oyet, eyi òkikpọ agan̄ mbum-ura. Egogon otunchit ya ikam.

²Okumugwem onenitumu inyi emi ibe, “Ebegogon otunchit keyi ikam, kpebegwuku, ene geege ìkpoje itibi iraka inin̄. Mije, Okumugwem, Awaji ebi Ijeren, ìje me ere ya itibi iraka inin̄. Eya orọ, ebegogon ikam.

³Ire, ogwu ibot mkpulu môkọt ikup me emen otunchit ya irie inorie me isi Okumugwem, bak me lek îrebe ogwu ibot mkpulu. Ọmọ ìboje me agan̄ ọfọ iraka inin̄, mè ije si me agan̄ keya isibi.”

⁴Ene ya òsasa emi ije itibi otunchit agan̄ inyọn̄ inire isi Uwu Mbuban ya. Nnenikpọ, mè imun̄ ujamgbugbo Okumugwem onin̄be ijot Uwu Mbuban Okumugwem. Nrọrọn̄ ikana isi ichit me ijọn̄.

⁵Okumugwem otutumu inyi emi ibe, “Gwun̄ ebilene, tap iman̄ me lek, mè sa chieen̄ kwun̄ mun̄, mè sa utọn̄ kwun̄ nọ otutuuk inu ntumube inyi owu ofolek otutuuk orọmijọn̄ eyi Uwu Mbuban Okumugwem mè ikan kan̄ geelek. Gwuun̄ chieen̄ me lek ubọk ebekisa inin̄ Uwu Mbuban mè ubọk ebekisa isibi.

⁶Tumu nyi ebi Ijeren, ebi unye-ibot cha ibe ke Ogwukaan̄-ene Okumugwem ìtumu ibe ikeyi: ‘Enyi ebi uwu kè Ijeren, filafila inu kinyi cha, emi ǹkayaka ìdo!

⁷Enyi mîsa ebi ofifi ido, ife kpefieek afi, kpekisun̄ si inyan̄a-ibot n̄a,[27] inin̄ ere mbuban n̄a, mè isa me ikeya ififila Uwu Mbuban n̄a. Enyi, ebi ìrọrọ inu òkup ikeya ekekinyi si emi inorie, òrere okpọn̄ melek eje anam ngwugwa. Igbaalek otutuuk òchichaka inu cha enyi ekirọ, enyi ebi n̄a mîchichaka inyan̄a-ibot n̄a.

⁸Enyi kpeyaka ikikpọ chieen̄ me lek ikwaan̄ n̄a òkup me mbuban, kpan̄asi ikeya, enyi mîsa ebi ofifi ido ito ibe ekekpọ chieen̄ me lek ikwaan̄ mbuban n̄a enyi enyi.

⁹Emi Ogwukaan̄-ene Okumugwem ǹkitumu ibe ke ogwu ofifi ido geege ikafieekge afi, ìkakisusun̄ si inyan̄a-ibot n̄a, ìkponin̄ Uwu Mbuban n̄a, ikerere ogwu ofifi ido òkiluk me etete ebi Ijeren.’

¹⁰“Ebi otoko kè Libai cha ebi ìjeje ijọn̄ọ emi ere me lek, mè ije ilọ oniin̄ mgbọ ebi Ijeren ejebe ilọ oniin̄ igọọk mkpọmfaka kiban̄, ema mêsa ibot kiban̄ ibeme ijo inu kiban̄.

¹¹Ema mêkọt ikisi ikwaan̄ me Uwu Mbuban n̄a, mè ikikpọ chieen̄ me lek otunchit Uwu Mbuban, mè ikirọ ikwaan̄ me ere keya. Ema mêkigwu anam ngwugwa ewọwọp iriọk mè anam ngwugwa kechilọ inyi ebi ene, mè ikikeke me isi ebi ene ikirọ ikwaan̄ inyi ema.

¹²Ire, mije ema erọbe ikwaan̄ inyi ebi ene me isi mkpọmfaka kiban̄, mè irọ ebi Ijeren erọn̄ enin̄ emen ijo inu, eya orọ, emi mbene ubọk n̄a inyan̄a ibot ibe ke ema mêsa ibot kiban̄ ibeme ijo inu kiban̄. Emi Ogwukaan̄-ene Okumugwem ntumu.

¹³Ema kpebejeje igbet emi lek inisi ikwaan̄ inyi emi kubọk ebi ngwugwa, kpebejeje iriaak me lek inu mbuban n̄a geege, mè ìyaka ire lek inu n̄a òkup mbuban ichit. Ema mêrie esip òchichaka inu cha ema erọbe.

¹⁴Ire, mâto ema ibe ekekpọ chieen̄ me lek ikwaan̄ Uwu Mbuban, mè otutuuk inu geelek eberọ me emen kan̄.”

¹⁵Ire, ebi ngwugwa ìrere ebi otoko kè Libai, ebi owot iman kè Jadọk, ebi ìkekeke inye ikirọ ikwaan̄ me Uwu Mbuban n̄a me mgbọ ebi Ijeren ejebe ilọ oniin̄, mè ijit emi itele, ema mêje igbet emi lek inirọ ikwaan̄ me isi n̄a. Ema mêkeke me isi n̄a ikisa okpọn̄ mè eje igwa ngwugwa inyi emi. Emi Ogwukaan̄-ene Okumugwem ntumu.

¹⁶Ema gaalek ebenin̄ Uwu Mbuban n̄a; ema gaalek ebeje igbet lek ikasi n̄a inirọ ikwaan̄ me isi n̄a, mè ikikpọ chieen̄ me lek ikwaan̄ n̄a.

¹⁷“ ‘Ema isinin̄ me otunchit oyet egep agan̄ emen, ema ebetap ofọnti lilin̄; kpebetap ofọnti inwọọn̄ anam isa isi ikwaan̄ me otunchit oyet egep agan̄ emen, mè ìre me emen Uwu Mbuban.

¹⁸Ema ebesa akisi lilin̄ ibọp ibot kiban̄, mè ikwun si ekwut lilin̄ me irak ebon. Ema kpebetap inu geege môsibibe ema egwurugwu me lek.

¹⁹Mgbọ ema isibenan̄a isibi isi oyet egep agan̄ oyet, ere ebi ene ekikup, ema mêwọọk ofọnti ema ekisa isi ikwaan̄ cha isun̄ me emen agwut mbuban cha, mè itap ofifi ofọnti, inyi ema ekasa ofọnti ikwaan̄ cha ìsi ìrọ ebi ene ekup me mbuban.

²⁰“ ‘Ema kpebekwọkọ ijeek irọt me ibot, kpebetetele si ibe ijeek kiban̄ itibi ijọn̄ọ, ire, ebekisọsọp ijeek ibot kiban̄ igele.

²¹Ogwu ngwugwa geege ìkponwọ miin̄ mgbọ înin̄be oyet egep agan̄ emen.

²²Ogwu ngwugwa geege ìkpodo nwakpa, mè ìre enenwaan̄ ogwu olom ojitbe, me lek nwa. Ire, ìbodo obaak enenwaan̄ ikariọọn̄ge enerieen̄, òrere gwun̄ owot Ijeren, mè ìyaka ire nwakpa ogwu ngwugwa, ogwu ogwu olom okwube itele.

²³Ebi ngwugwa ebejeen̄ ebi n̄a esese òkup me lek inu òkup mbuban mè inu ikakupge mbuban, mè irọ ebi n̄a ekọt ekeriọọn̄ inu orieen̄ okupbe me lek mè inu orieen̄ ikakupge me lek.

²⁴“ ‘Ire gọlọgọlọ isibi, îre ema ebekitet ineen̄ kubọk ebi oyerebet, mè ifieek oyerebet igọọk ubọk oyerebet n̄a. Ema mêkisun̄ otutuuk ikan n̄a mè orọmijọn̄ n̄a ofolek ijọk geelek ekirie, mè ikisun̄ Usen Mbuban n̄a geelek me mbuban.

²⁵“ ‘Ogwu ngwugwa geege ìkpoje iriaak me lek nkwukwu ene, inyi mbuban ikachaka ema me lek. Ire, ire ogwu òkwukwu ya ìre nte kan̄ mè ìre nga kan̄, mè iyaka ire gwun̄ kan̄ enerieen̄ mè ìre gwun̄ kan̄ enenwaan̄, mè ìre ngwan̄ kan̄ enerieen̄ mè ìyaka ire ngwan̄ kan̄ enenwaan̄ ogwu ikakaan̄ge olom nu, ogwu ngwugwa môkọt ichaka mbuban me lek kan̄ bak me lek ebibi.

²⁶Isigwọk ọmọ lek isan̄a, môkup usen jaaba iraka sabum òbene ikwaan̄.

²⁷Usen cha isiso, usen ọmọ obosi oyet egep agan̄ emen eyi Uwu Mbuban isi irọ ikwaan̄ me ere mbuban, môgwa ngwugwa ijo inu me ibot kan̄. Emi Ogwukaan̄-ene Okumugwem ntumu.

²⁸“ ‘Ire me lek ìrot ebi ngwugwa, emi nre ìrot kiban̄. Enyi kpebenyi ema inu-nkaan̄ geege me Ijeren, emi nre inu-nkaan̄ kiban̄.

²⁹Ema ebekirie uche ngwugwa akpa, mè ngwugwa ijo inu, mè ngwugwa awọ. Ofifi si, inu geelek òrere inu oniin̄ akọn̄ me Ijeren, ema ebekikaan̄.

³⁰Otutuuk adasi mfut geelek ònwọnwọn ichit, mè otutuuk inyinyi kinyi geelek òsibi esese, ìbore eyi ebi ngwugwa. Enyi mêkinyi ema si adasi fituru enyi efukube, inyi ugbana ikigwook me uwu kinyi.

³¹Ebi ngwugwa kpebetaka inu geege òkup me lek kan̄ ikwu, mè ìre unọn, mè ìre anam, mè ìre echi anam afa ochimbe ikpan̄.’ ”