Read obolo Ijik 45 Bible Online

Ijik 45 - obolo bible

Ijik 45

¹“Mgbọ enyi isiroon̄ nriroon̄ isa iche ijọn̄ inyi ebi ene me ìrot, enyi mêsan̄a agan̄ ge isun̄ esese inyi Okumugwem kubọk ijọn̄ òkup me mbuban. Ujọn̄ọ kan̄ môre obop ejit gweregwen mè efit ejit iba mè akọp ejit go, sà uwele kan̄ obore obop ejit go. Otutuuk okike lek ijọn̄ keya ìbore ijọn̄ òkup mbuban.

²Me lek okike ijọn̄ keyi, mêfieek okpọkọ isan̄a isun̄ inyi Uwu Mbuban; okpọkọ ya ìbore ikike me agan̄ ini kan̄, efit ejit mè akọp ejit iba mè ejit go. Môkaan̄ eden̄ oyet òwewele iso akọp mè ejit iba mè okpọkọ ikat ikana.

³Me lek ijọn̄ òkup mbuban ya, mêtọ obop ejit gweregwen mè efit ejit iba mè akọp ejit go me ujọn̄ọ, mè obop ejit iba mè efit ejit go me uwele isan̄a isun̄ esese. Ere keyi ke Uwu Mbuban, òrere ere òkup mbuban ichit, obokup.

⁴Ere keya ìbore okpọkọ ijọn̄ òkup me mbuban eyi òkup inyi ebi ngwugwa, ebi ìkirọ ikwaan̄ me ere mbuban, mè ebi ìkije iriaak me lek Okumugwem inikirọ ikwaan̄ me isi kan̄. Ere keya ke uwu kiban̄ obokup, mè ire si ere mbuban inyi ere Uwu Mbuban obokup.

⁵Mêtọ si ofifi ijọn̄ inyi ebi otoko kè Libai, ebi ìkirọ ikwaan̄ me Uwu Mbuban; eya môre eyi kiban̄ ema mêsabe ikinama ama iluk. Ujọn̄ọ ijọn̄ keya môre obop ejit gweregwen mè efit ejit iba mè akọp ejit go, uwele kan̄ môre obop ejit iba mè efit ejit go.

⁶“Enyi mêfieek ijọn̄, obop ejit mè efit ejit iba mè akọp ejit go me uwele, mè akọp obop ejit iba mè obop ejit mè efit ejit iba mè akọp ejit go me ujọn̄ọ, me agba lek okpọkọ ijọn̄ ere mbuban ya, isa inyi ama. Ijọn̄ keyi ìbokup inyi otutuuk uwu kè Ijeren.

⁷“Ogwu ibot mkpulu môkaan̄ ijọn̄ òje me otubọk ijọn̄ ere mbuban me agan̄ ge, melek otubọk ijọn̄ ebi ama me agan̄ keyilọ. Bene me agba agan̄ ichep ura, ijọn̄ ya mônyana inyi agan̄ ichep ura, mè ibene si me agba agan̄ mbum-ura inyana inyi agan̄ mbuban ura. Môbene me agan̄ ichep-ura ilibi ujọn̄ọ ujọn̄ọ ifo otubọk okike agan̄ mbum-ura isi ije ugban ugban melek ijọn̄ ge me etete ijọn̄ echi ebi otoko otoko cha.

⁸Ijọn̄ keyi môre uche ijọn̄ eyi ogwu ibot mkpulu me Ijeren. Ebi ibot mkpulu n̄a kpebeyaka ikpọk ikitutuku ebi n̄a, ire, ema mêtele ebi uwu kè Ijeren ekaan̄ uche ijọn̄ egọọk me otoko kiban̄.

⁹“Ogwukaan̄-ene Okumugwem ìtumu ibe ikeyi: Enyi ebi ibot ebi Ijeren, enyi mîra irọ ikem! Ìtele ubọk me lek irọrọ inu afa mè itututuku ene, mè ìkirọ inu ònenenen mè inu òtatat. Ikayaka ìtet ebi n̄a inu kiban̄ ìbọkọ. Emi Ogwukaan̄-ene Okumugwem ntumu.

¹⁰Ìsa okwukwut itọ inu òtatat, mè alala òmimin iso, mè ewop òsoso ikeke ìkitọ inu.

¹¹Alala cha mè ewop cha mêre ìkike mè ìkeke. Ewop ge môre irek ge me akọp irek oma,[28] alala ge môre irek ge me lek akọp irek oma. Oma môre otitọ eyi ebekisa alala melek ewop itọ me lek, inyi mêkiriọọn̄ mè ìre îtat mè ìre ìkatat.

¹²Sekeli ge môre akọp gera iba. Akọp sekeli iba, melek akọp sekeli iba mè go, melek akọp mè sekeli go, môre ìkike melek mina ge.

¹³“Eyiyi ìre ọkpọkpọ inyinyi enyi ebekinyi: Irek ge me irek gweregwen alala itọ inu ge ònan̄a me lek oma akpa wit ge, mè irek ge me irek gweregwen ònan̄a me lek oma akpa balì ge.

¹⁴Ìkeke aran̄ ebekinyi, eyi ebekisa ewop itọ, ìbore irek ge me akọp irek ewop ge ònan̄a me lek koru ge, òrere akọp ewop mè ìre oma ge, mije, akọp ewop ìre ìkike melek oma ge.

¹⁵Mênyi si arọọn̄ ge me lek urum efit arọọn̄ iba geelek ònan̄a me ata ijọn̄ mbubet mun̄ okireke ijaan̄ me ido Ijeren. Echichi ke ebesa ikigwa ngwugwa akpa, mè ngwugwa ewọwọp iriọk, mè ngwugwa esuuk, inyi ekesa erọ esuuk me ibot ebi Ijeren. Emi Ogwukaan̄-ene Okumugwem ntumu.

¹⁶Otutuuk ene me ido, mege ire lek ogwu ibot mkpulu me Ijeren, ebekinyinyi ọkpọkpọ inyinyi keyi iso.

¹⁷Îre ikwaan̄ ogwu ibot ikekinyi ngwugwa ewọwọp iriọk, mè ngwugwa akpa, mè ngwugwa miin̄ egwogwook me ijọk geelek, mè aya onyan̄ geelek, mè Usen Mbuban geelek, mè otutuuk ijọk ibot acha ebi uwu kè Ijeren geelek. Ọmọ obokinyi ngwugwa ijo inu, mè ngwugwa akpa, mè ngwugwa ewọwọp iriọk, mè ngwugwa esuuk, inyi mêsabe ikirọ esuuk me ibot ebi uwu kè Ijeren.

¹⁸“Ogwukaan̄-ene Okumugwem ìtumu ibe ikeyi: Me adasi usen me okpa onyan̄, enyi mêkisa gwun̄ orie eriembuuk eyi kpunube ìroon̄ me lek isa inigbama lek Uwu Mbuban.

¹⁹Ogwu ngwugwa môsa usini me lek eje anam ngwugwa ijo inu ya igbama me lek ubọk afọn̄ isotu Uwu Mbuban, mè agba ini eyi agọm agan̄ inyọn̄ me lek ntook, mè ubọk afọn̄ isotu otunchit oyet egep agan̄ emen.

²⁰Enyi mêkirọ si ikeyi me òso usen jaaba me onyan̄ ya inyi ogwu geelek òrọrọ ijọ inu me mfat mè ìre me ikariọọn̄ge, mè isa me ikeya irọ esuuk me lek Uwu Mbuban.

²¹“Me òso akọp mè usen ini me okpa onyan̄, enyi mêkisun̄ orirọ Iraraka, ijọk usen jaaba. Me otutuuk mgbọ ya, enyi ebekitaka fituru ekatapge olat me lek.

²²Me usen ya, ogwu ibot mkpulu mônyi orie eriembuuk ge eyi mêsabe igwa ngwugwa ijo inu me ibot kan̄ mè ibot otutuuk ebi ido.

²³Usen geelek me emen usen jaaba eyi ijọk ya, ogwu ibot mkpulu môkinyi orie eriembuuk jaaba mè orie arọọn̄ jaaba kpunube ìroon̄ me lek, inyi ekesa egwa ngwugwa ewọwọp iriọk enyi Okumugwem, mè ikinyi si orie ebot ge me usen, inyi ekesa egwa ngwugwa ijọ inu.

²⁴Môkinyi si inyinyi ngwugwa akpa, ogbokot akpa ge me ibot orie eriembuuk ge ge, mè ogbokot akpa ge me ibot orie arọọn̄ ge ge, igbaalek iko aran̄ ini ini òbokije me lek ogbokot akpa ge ge cha.

²⁵“ ‘Me ijọk Uwu Nlak, ijọk eyi òkibene me akọp mè usen go me òso onyan̄ jaaba, ogwu ibot mkpulu môkirọ si ikeya usen jaaba ikpọ me lek ngwugwa ijo inu, mè ngwugwa ewọwọp iriọk, mè ngwugwa akpa melek aran̄ òje me lek.