Read obolo Ijik 5 Bible Online

Ijik 5 - obolo bible

Ijik 5

¹“Gwun̄ ebilene, mọnọ oge akọn̄ òrereke sa rọ akwaan̄ ogwu òsọp ijeek, mè sa kwọkọ ijeek ibot kwun̄ mè ifet otu kwun̄ san̄a, mè mọnọ otitọ sa tọ ijeek cha che irek ita.

²Osikpa mbin ikana ama ya iso otu ifuk usen, sa ukan̄ wọp ijeek cha, irek ge me lek irek ita, me eden̄ ama ile ya ogwookbe me lek okpungwu ya. Mọnọ oge akọn̄ sa kikeen̄ irek ge kana ama ya. Ben irek ge òsisik ya fiaak fiin̄ me emen efet. Mije emi mâwọọk oge akọn̄ isa igọọk ema.

³Ire, mọnọ ukut ijeek inen mè inen me lek echi ofiaakbe ifiin̄ me lek efet ya kat tap me ufan̄a ofọnti kwun̄.

⁴Ofifi si, mọnọ ukut inen mè inen me lek tọp tap me ukan̄, mè wọp taka riọk. Ukan̄ mônan̄a me lek kiban̄ ibumu inin̄ lek otutuuk uwu kè Ijeren.

⁵“Ogwukaan̄-ene Okumugwem ìtumu ibe ikeyi: Kpọ, îre emi nsun̄ Jeruselem yi me etete ebi ife geelek, owuwa ido egbagban ikana ọmọ.

⁶Ire, ọmọ înye ibot ikeme ikan n̄a mè orọmijọn̄ n̄a, mè irọ inu ikpak igak ebi ife geelek mè ebi ido geelek ìkakana ọmọ okokop. Îjit ikan n̄a, mè ijit si igọgọọk orọmijọn̄ n̄a.

⁷“Eya orọ, Ogwukaan̄-ene Okumugwem ìtumu ibe ikeyi: Owu Jeruselem ofieek igak ebi ido ìkakana owu cha. Owu òkakigọọk orọmijọn̄ n̄a, òkakisun̄ ikan n̄a. Òkakirọrọ si orọmijọn̄ ebi ido cha òkakana enyi.

⁸“Mije keya, Ogwukaan̄-ene Okumugwem ìtumu ibe ikeyi: Emi me lek n̄a si m̀bajeje ikeme owu, Jeruselem. M̀basusulu owu osusut, inyi otutuuk ido cha emun̄.

⁹Mije òchichaka inu cha orọbe, mârọ owu inu eyi ǹkararak ìrọ, eyi m̀kpayayaka ikpọk irọ si ofifi.

¹⁰Eya orọ, ute môtaka ogwu gwun̄ me emen kwun̄, gwun̄ si môtaka ogwu ute. Mânyi owu osusut, mè iyiyala ebi kwun̄ ebi mêsikbe ichieen̄ ita me ntutun̄ ere geelek me linyọn̄.

¹¹Eya orọ, kè lek ugwem n̄a, mije owu osabe mbuban mkpọmfaka kwun̄ mè òchichaka inu kwun̄ cha inififila Uwu Mbuban n̄a, emi m̀bafifiik chieen̄ irọ owu inaan̄ me lek. M̀kpato owu nsan, m̀kpatele inyinyi owu osusut. Emi Ogwukaan̄-ene Okumugwem ntumu.

¹²Irek ge me irek ita me lek ebi kwun̄ mêkwaan̄ me ijo orukan̄ mè akan̄ me emen kwun̄. Irek ge me irek ita ebekwaan̄ me otu oge akọn̄ me udun̄ mgban kwun̄. Irek ge me irek ita òsisik, m̀bayiyiyala ichieen̄ me ntutun̄ ere geelek me linyọn̄, mè iwọọk oge akọn̄ isa igọọk ema.

¹³“Unaan̄-ejit n̄a mônenita, uyok uyok unaan̄-ejit n̄a me lek kiban̄ mônenitọọk, bak me lek nra isan̄a useen̄. Mgbọ nsibum unaan̄-ejit n̄a igwook ema me lek isan̄a, ema mênenitolek iriọọn̄ ibe ke emi Okumugwem ǹsa me mba-ejit itumu ikọ inyi ema.

¹⁴“Ofifi kan̄, mârọ owu Jeruselem òkana ǹrioon̄ mè inu ochak me etete ebi ido òkukup ikana owu, mè òkup si ikeya me chieen̄ ebi geelek ìkije iraka.

¹⁵Mgbọ nsisulu owu osusut me unaan̄-ejit mè uyok uyok unaan̄-ejit, mè ikan̄ inu inyi owu unye unye, owu môre inu esip, mè inu ichak imọm, mè ire si inu isasa itaba ubọk me utọn̄, mè inu urimi, isa inyi ido cha òkukup ikana owu. Emi Okumugwem ntumu.

¹⁶Mgbọ nsisook ijo oraan̄ n̄a ya òkikpan̄ ene, òrere akan̄, itap owu me lek, m̀baria ibe inijijaka owu. M̀bakirọrọ ibe akan̄ ya ikpọkpọ ikinye, mè igon oniin̄ okisa ikaan̄ inorie kwun̄ ichit.

¹⁷Mâria akan̄ mè anam oron echi afa ijet owu. Ema mêkpaan̄ bọn kwun̄ isan̄a itele owu. Ijo orukan̄ mônin̄ me etete ebi kwun̄, eje ene môkekigbuk me emen kwun̄, mâsa si oge akọn̄ inijijaka owu. Emi Okumugwem ntumu.”