Read obolo Ijik 7 Bible Online

Ijik 7 - obolo bible

Ijik 7

¹Okumugwem onenitumu inyi emi ibe:

²“Owu gwun̄ ebilene, Ogwukaan̄-ene Okumugwem ìtumu inyi ijọn̄ ido Ijeren ibe ikeyi: ‘Okputut! Okputut mgbọ îre inyi agan̄ ini eyi ijọn̄ kinyi.

³Okputut mgbọ îre enyi lek isan̄a, nchili unaan̄-ejit n̄a ibook me lek kinyi. Mâfieek oyerebet inyi enyi igọọk me lek eru kinyi, mè ikpe enyi mkpukpe ikpọ me lek filafila inu enyi erọbe.

⁴M̀kpato enyi nsan, m̀kpatele inyinyi enyi osusut. M̀bakpekpe enyi mkpukpe ikpọ me lek eru kinyi melek filafila inu òkup me etete kinyi. Enyi mêneniriọọn̄ ibe ke emi nre Okumugwem.’

⁵“Ogwukaan̄-ene Okumugwem ìtumu ibe ikeyi: Ùrioon̄ òkinu! Ùrioon̄ òkinu ge me udun̄ ge.

⁶Okputut mgbọ îre! Okputut mgbọ ya îra ire! Îra ikana ichit enyi. Ìkpọ, îta me ubọk!

⁷Ùrioon̄ îtet enyi ebi ìluk me lek ijọn̄ ya. Mgbọ ya îre, usen ya îriaak. Wọlọwọlọ înin̄ me inyọn̄ ogoon̄, ìkayaka ìre ukpo unwọọn̄ okitaan̄.

⁸Mgbọ keyi, sọntiik mgbọ gaalek osik, mânigbugbọ unaan̄-ejit n̄a ikeme enyi, mânibum otutuuk ikpele unaan̄-ejit n̄a ichit enyi me lek. M̀bafieek oyerebet inyi enyi igọọk me lek eru kinyi, mè iyaka otutuuk filafila inu kinyi cha igwook enyi me ibot.

⁹M̀kpato enyi nsan, m̀kpatele inyinyi enyi osusut. M̀bakpekpe enyi mkpukpe ikpọ me lek eru kinyi melek filafila inu òkup me etete kinyi. Enyi mêneniriọọn̄ ibe ke emi nre Okumugwem ogwu ògogon enyi akpọ ya.

¹⁰“Ìkpọ, usen ya ire eyi! Ìkpọ, îra ire! Ùrioon̄ îra irama ibum kpus. Mkpat eyi mfeen̄ îra igwook nsek inwan̄ ijot lek, ugumulek îra igwook ajakajak!

¹¹Afa îmin ikana mkpat ekisa irọ inu ikpak. Kpunu ene geege me lek kiban̄ òbosisik, kpunu ene geege me ubọk ema ewabe ire, kpunu inu ubọọn̄ mè ìre inu unye otu ewe geege òbosisik.

¹²Mgbọ ya îre, usen ya îta me ubọk. Ogwu òlelep inu ikabele ejit, ogwu onyanyam inu si ikafieek ejit, mije, uyok uyok unaan̄-ejit n̄a ìbogwook me lek otutuuk urum ebi ene.

¹³Ogwu ònyam inu ìkpoyaka igwu ikom inu me lek inu înyambe, otutuuk mgbọ ọmọ melek ogwu înyambe inyi ekupbe me ugwem. Mije, ikọ nriran yi ìkup inyi otutuuk urum ene, kpebekọt ifaan̄. Bak me lek ijo inu kiban̄, kpunu ogwu òbokọt isun̄ ebek ugwem kan̄.

¹⁴Ikerere ema ewuwut otita akọn̄, mè ineen̄ otutuuk nroon̄ akọn̄ geelek isun̄, ene geege ìkposibi isi akọn̄, mije, uyok uyok unaan̄-ejit n̄a ìbogwook me lek otutuuk urum ebi ene.

¹⁵“Oge akọn̄ òwa me oyet okupbe ikikpọ ema, ijo orukan̄ mè akọn̄ òwa me emen ama. Ebi inan̄a me emen ama isibi, mênin̄ me otu oge akọn̄, ebi ikup me emen ama, ijo orukan̄ mè akan̄ môkpan̄ ema isan̄a.

¹⁶Ebi ikọt inwọnọ, mêliliin̄ ifon inyọn̄ ogoon̄, ogwu ikup, môkito ito kubọk ekerekwukwu emen iteke, mije ijo inu ọmọ orọbe.

¹⁷Ubọk ene geelek môriọkọ igwook, ukot ene geelek môwọ kubọk mun̄.

¹⁸Ema mêtap ofọnti ufieejit, ukpook môninin̄ ijot ema emen, esip môdedeke ema isi, mêkwọkwọkọ ema ibot irọt.

¹⁹Ema mêtọọn̄ alata okuket kiban̄ ifiin̄ me lek oniin̄, alata araran̄ kiban̄ môkana inu òchachaka mbuban. Alata okuket mè alata araran̄ kiban̄ cha ìkpokọt inyan̄a ema me usen uyok uyok unaan̄-ejit Okumugwem. Inu kecha ìkposiki ema uraafiọọn̄ me lek, ìkpojojot si ema owot, mije, îre inu cha orọ mè ema etọbọ ukot enan̄a erọn̄ enin̄ me ijo inu.

²⁰Ujuja inu mbala-lek kiban̄ cha ema ekisa igugo lek ke ema esa irom òchichaka inu cha mè mbuban mkpọmfaka cha. Eya orọ, mârọ inyi inu chi ikana mbuban inu inyi ema.

²¹Mâkana inu cha itap me ubọk ebi ichen, inyi efum, mè isa inyi ebi ikpak me linyọn̄ ekpulu me akọn̄ esa efon. Ebiba mênenififila inu cha isan̄a.

²²Emi mâda isi n̄a isan̄a me lek kiban̄, ema mêfififila ere nlelet emen uwu n̄a, ebi inọ afa mêninin̄ emen uwu n̄a, mè ififila si.

²³“Ìnen̄e mkpọn ìsun̄, mije, eje ebi ekpan̄be ìjojot lek ijọn̄, inu afa si ìgagak emen ama.

²⁴Mâsa ido ìwawa ikpak me lek ichit inu, inyi enebọkọ uwu kiban̄ esak. Mârọ inyi ogwu unye ikayaka ìbaan̄ alọm îkibaan̄ ya, mè irọ ibe efifila ere mbuban kiban̄ cha.

²⁵Ofaak òkinu. Ema mêweek esuuk igak, ire, kpebemun̄.

²⁶Ùrioon̄ ge môtoon̄ me inyọn̄ ge, ijo etip ge môgọọk ge. Ema mêweek ibe ogwu nriran ikpa inu îmun̄be. Ebi ngwugwa kpebeyaka ikaan̄ inu geege ema ebejeen̄. Ebi ugane kpebeyaka ikaan̄ nteme geege ebenyi ebi ene.

²⁷Ogwu ubọọn̄ ìbokup me ufieejit, ebi ilile ebekup me ugwuuk, ubọk ebi ikike me emen ama ìbokiraran. Mâsulu ema osusut ikpọ me lek eru kiban̄. Mâfieek si oyerebet inyi ema igọọk me ubọk ema ekifieek oyerebet inyi ene. Ema mêtotolek iniriọọn̄ ibe ke emi nre Okumugwem.”