Read obolo Ijik 8 Bible Online

Ijik 8 - obolo bible

Ijik 8

¹Me òso usen go me emen onyan̄ gweregwen me òso acha gweregwen, emi me uwu n̄a nkupbe, ebi ugane Juda òwa si ekupbe me isi n̄a. Me ekakpọge chieen̄, unye Ogwukaan̄-ene Okumugwem okakana ichit emi me ere ya.

²Nnenikpọ, mè imun̄ inu ge òbet lek ebilene. Bene me ere òbet lek ebon kan̄ siki fo ijọn̄, ìbet lek ukan̄. Bene me ebon ya fo inyọn̄, ìkitoon̄ kubọk alata òreren̄e igeen̄.

³Ineninyana inu òbet lek ubọk, mè itet emi me lek ijeek ibot n̄a. Ekwukwu Awaji ojijibi emi ibene me lek efet me etete ijọn̄ melek inyọn̄, mè isa emi me ilaak ọkpọchieen̄ eyi Awaji isi ito me Jeruselem, me isotu otunchit agan̄ inyọn̄ eyi oyet egep agan̄ emen emen. Ere keya ke mkpọmfaka òkirọ Awaji ikaan̄ mba-ejit okeke.

⁴Me ere ya, nnenimun̄ ujamgbugbo Awaji ebi Ijeren, kubọk mmun̄be me adasi mgbọ me lek òla ijọn̄ ya.

⁵Inenibe emi, “Gwun̄ ebilene, bene-nu chieen̄ kpọ agan̄ inyọn̄.” Mbebene chieen̄ ikpọ agan̄ inyọn̄, mè imun̄ mkpọmfaka òkirọ Awaji ikaan̄ mba-ejit okupbe me isotu otunchit ntook ngwugwa me agan̄ inyọn̄ ya.

⁶Iyayaka ibe emi, “Gwun̄ ebilene, ìre omun̄ inu ema ekirọ? Omun̄ uga òchichaka inu ebi uwu kè Ijeren ekirọ me ere eyi, isasa ilap emi ijọn̄ọ ere me Uwu Mbuban n̄a gaalek? Ìkatata, owu mômun̄ owuwa uga òchichaka inu ògagak eya.”

⁷Inenisa emi inu me isotu oyet egep. Nnenikpọ, mè imun̄ udọn̄ ge me agba uwu.

⁸Ibebe emi, “Gwun̄ ebilene, bum-nu agba uwu ya.” Mgbọ mbumbe agba uwu ya, mmumun̄ isotu ge me ere ya.

⁹Ibebe emi, “Tibi raka nin̄, si kpọ ikpak ikpak òchichaka inu ema ekirọ me ere ya.”

¹⁰Ntitibi iraka inin̄ ere ya, mè imun̄ owuwa filafila inu egwookbe ichit lek agba uwu cha gbak. Mîgwook kpa lek kpa lek inu òkinyinyọnọ me ijọn̄, mè òchichaka anam, mè otutuuk mkpọmfaka ebi uwu kè Ijeren.

¹¹Mmumun̄ akọp ebi ugane jaaba ebi uwu kè Ijeren ekekebe me isi inu cha, melek Jayajania gwun̄ kè Safan me etete kiban̄. Ogwu ikup, ìkakaan̄ ngigọ nsensi me ubọk, nsensi cha okekibumu efit oduku utop olu ikifo inyọn̄.

¹²Inenibe emi, “Gwun̄ ebilene, ìre owu omun̄ inu ebi ugane uwu kè Ijeren ekupbe me emen udun ikirọ, ogwu ikup, me agwut yọk kan̄? Mije, ema ekibe, ‘Okumugwem ìkamun̄ eji. Okumugwem îjit ido kiji itele.’ ”

¹³Ikpọkpọk itumu inyi emi ibe, “Owu mômun̄ ema ekirọ filafila inu ògagak echichi.”

¹⁴Inenisa emi isi isotu otunchit Uwu Mbuban Okumugwem eyi agan̄ inyọn̄, nsisi imun̄ ebibaan̄ ekweekbe irek ikito ito inyi Tamuji.[1]

¹⁵Inenitumu inyi emi ibe, “Gwun̄ ebilene, ke ora imun̄ eyiyi? Owu mômun̄ filafila inu ògagak echichi.”

¹⁶Inenisa emi inu me oyet egep agan̄ emen emen eyi Uwu Mbuban Okumugwem. Me ere ya, me otu isotu Uwu Mbuban Okumugwem, me etete ọfọ melek ntook, mmumun̄ ebi ene òsoso akọp ene iba mè go ekupbe. Ema eyaka udun̄ ida Uwu Mbuban Okumugwem, mè iyaka isi ida agan̄ mbum-ura, mè ikitọbọ ebum inyi ura me agan̄ mbum-ura.

¹⁷Inenibe emi, “Gwun̄ ebilene, ìre owu omun̄ eyiyi? Ìre ebi uwu kè Juda emọnọ ibe ke filafila inu kechi ema ekirọ me ere yi ìre sọntiik inu mọnọ? Ema mîrọ inu afa ijot otutuuk ere geelek me ido, mè ikpọkpọ ikirọ inyi ejit inaan̄ emi. Otu agọọk uti ire echa ema ekiteen̄ inwunwan̄ me inwọm kiban̄!

¹⁸Eya orọ, emi m̀basa me unaan̄-ejit isulu ema osusut. M̀kpato ema nsan, m̀kpatele inyinyi ema osusut. Ema mêtaan̄ ukpo me utọn̄ n̄a igak, m̀kpagban̄ ida kiban̄.”