Read obolo Dan 1 Bible Online

Dan 1 - obolo bible

Dan 1

¹Me òso acha ita me lek mkpulu kè Jioyakim, ogwu ubọọn̄ Juda, Nebukadineja ogwu ubọọn̄ Babilọn ojijibi akọn̄ inu Jeruselem, mè inikpa mbin akọn̄ ikana ama ya.

²Ogwukaan̄-ene onenikana Jioyakim ogwu ubọọn̄ Juda itap me ubọk kan̄. Ifufum si usini nroon̄ ikwaan̄ me Uwu Mbuban Awaji isa ifo ido Babilọn, mè isa isi igwook me emen uwu isun̄-inu òkup me lek uwu awaji kan̄.

³Usen ge, ogwu ubọọn̄ Babilọn oneninyi Asipenaji, òrere ogwu ibot ebi ibot ikwaan̄ kan̄, ida ibe isi ikpọ me etete ebi Ijeren cha ekpulube me akọn̄, mè igobo usini ebirieen̄ ìnan̄a me owot iman uwu ubọọn̄, mè owot iman ebi ibot mkpulu isa inu.

⁴Ìbe igobo nsabọn irieen̄ ebi kpunube ìroon̄ geege me lek, ebi ìjajaan̄ uja, mè ikaan̄ iriọọn̄-inu me emen inu geelek, ebi ìkaan̄ ifuk-ibot, mè ikigwat lek igobo inu itet, mè ikaan̄ efuuk isasa isi ikwaan̄ me uwu ogwu ubọọn̄. Îtumu si inyi Asipenaji ibe ijeen̄ ife cha usem Babilọn, mè ubọk ekifuk, mè ubọk ekige.

⁵Usen geelek, ebekinyi ife chi inorie melek miin̄ inan̄a me inyọn̄ ikasi inorie ogwu ubọọn̄. Ebejeen̄ ema inu otuuk kè acha ita, sabum ema mênibene ikisi ikwaan̄ inyi ogwu ubọọn̄.

⁶Usini me etete nsabọn irieen̄ cha ìnan̄a me Juda ìre Danien, mè Ananiya, mè Misayen, mè Ajariya.

⁷Ogwu ibot ikwaan̄ ya onyinyi ema aya erieen̄. Danien ke îgwen Belitisaja, Ananiya ke îgwen Sedarak, Misayen ke îgwen Mesak, sà Ajariya ke îgwen Abedinego.

⁸Ire, Danien otutumu ifieek me ejit kan̄ ibe ke ọmọ ìkporie inorie ogwu ubọọn̄ ya, ọmọ ìkponwọ si miin̄ ogwu ubọọn̄, inyi ọmọ ikasa me ikeya ìchaka mbuban me lek kan̄. Inenisi ibeek ogwu ibot ikwaan̄ ogwu ubọọn̄ ya ibe ikanyi ọmọ inorie ya melek miin̄ ya, inyi ọmọ ikasa me ikeya ìfifila lek kan̄.

⁹Awaji orọrọ inyi ogwu ibot ikwaan̄ ya ikaan̄ ata ejit mè ejit nsan me lek kè Danien.

¹⁰Ire, ogwu ibot ikwaan̄ ya otutumu inyi Danien ibe, “Emi ǹkifieek owot me lek nte uwu n̄a, ogwu ubọọn̄, ogwu òdọdọmọ inorie mè miin̄ kinyi. Ire enyi kperie inorie ya mè inwọ miin̄ ya, ìre enyi kperiọọn̄ ibe ke ogwu ubọọn̄ mômun̄ ibe ke lek kinyi îwọlọ igak echi ofifi nsabọn̄ irieen̄ ogbo kinyi? Ogwu ubọọn̄ mônenifieek emi ebek mije kinyi.”

¹¹Danien onenitumu inyi ogwu ogwu ibot ikwaan̄ ya otobe ibe ikikpọ ọmọ Danien, mè Ananiya, mè Misayen mè Ajariya chieen̄ me lek ibe,

¹²“Soso, kinyi eji ebi usun̄ kwun̄ inwan̄ mè mudim gaalek akọp usen sa tọ eji kpọ-nu.

¹³Usen cha isiraka, sa eji tọ me lek ebi nsabọn irieen̄ kechilọ cha ebi ìrerie inorie ogwu ubọọn̄, mè inwọ miin̄ ogwu ubọọn̄. Ikaan̄ inu omun̄be, sa me lek keya tumu fieek inu owu oborọ eji ebi usun̄ kwun̄.”

¹⁴Ogwu òkikpọ ema chieen̄ me lek ochechieek, mè initọ ema ikpọ akọp usen.

¹⁵Mgbọ akọp usen ya osobe, nsabọn irieen̄ ini chi enwọnwọn lek, mè ijaan̄ lek igak ene geelek me etete nsabọn irieen̄ kechilọ cha ebi ìrerie inorie ogwu ubọọn̄.

¹⁶Mije keyi, ogwu òkikpọ ema chieen̄ me lek osasan̄a uche inorie ogwu ubọọn̄ odọmọbe inyi ema isan̄a, mè iyaka ikinyi ema inwan̄ mè mudim gaalek.

¹⁷Awaji oneninyi nsabọn irieen̄ ini chi ifuk-ibot mè ngobo-ntet òfo me lek inu geelek ògbaan̄ me lek usem, melek iriọọn̄-inu geelek. Awaji onyinyi Danien ngobo-ntet, inyi ikikọt ibum ibot otutuuk ilaak ọkpọchieen̄ geelek, mè otutuuk mun̄umun̄ ilaak geelek.

¹⁸Mgbọ acha ita cha ogwu ubọọn̄ onyibe ibe ejeen̄ ife cha inu osobe, ogwu ibot ikwaan̄ ya onenisan̄a ema inu me isi ogwu ubọọn̄ Nebukadineja.

¹⁹Ogwu ubọọn̄ onenibubọkọ otu melek kiban̄ me ge me ge, mè imun̄ ibe ke kpunu ene geege me etete otutuuk kiban̄ òbet lek Danien, mè Ananiya, mè Misayen, mè Ajariya. Eya orọ, igogobo ema ibe ekesi ikwaan̄ enyi ọmọ.

²⁰Ogwu ubọọn̄ oneniweek imun̄ ibe, me inu geelek ofolek iriọọn̄-inu mè ngobo-ntet, ke nsabọn irieen̄ ini chi mînwọn akọp mgbọ igak ebi nriroon̄ mè ebi ǹcha geelek ìkup me otutuuk ama ubọọn̄ kan̄.

²¹Danien obabia me uwu ogwu ubọọn̄ ikisi ikwaan̄ mege ire adasi acha ogwu ubọọn̄ Sarọs obenebe ikikpulu.