Read obolo Dan 10 Bible Online

Dan 10 - obolo bible

Dan 10

¹Me òso acha ita me lek mkpulu kè Sarọs ogwu ubọọn̄ Pesia, Awaji onenichili inu ijeen̄ Danien, ogwu ekigwen si Belitisaja. Etip ilaak ya ìre atikọ, ilaak ya ìkijeen̄ ikpele akọn̄ òbonunu. Danien orọriọọn̄ inu ilaak ya osibibe. Ìgobo ibot ilaak ya itet me emen ilaak ọkpọchieen̄.

²Me ike mgbọ ya, emi Danien, ǹkup me ufieejit nde ita.

³Ǹkarie ata inorie geege, ǹkachak anam mè ìre miin̄ geege me otu, ǹkakeken si aran̄ geege me akpalek n̄a mege nde ita cha osobe.

⁴Me òso akọp usen iba mè ini me adasi onyan̄ me acha ya, nnenikeke me otu mun̄ okwaan̄ ile, òrere okwaan̄ Tigiris.

⁵Nnenibene chieen̄ imun̄ enerieen̄ ge òtap ofọnti lilin̄ okekebe me isi n̄a, mè itobo fanti me ebon. Fanti ya, esa atalek alata araran̄ ònan̄a me Ufaji irọ.

⁶Akpalek ene ya ìkup unwan unwan kubọk ewuuk ekigwen karasolet, isi kan̄ okekikebe mèrèmèrèp kubọk omumen inyọn̄, chieen̄ iba kan̄ okekisak kubọk ukan̄ nlak, ubọk iba kan̄ mè ukot iba kan̄ ekimumen kubọk ekwe esabe ukan̄ ikala, ida kan̄ okekitaan̄ kubọk ida okput owuwa ene.

⁷Emi Danien gaalek mmun̄ ilaak ọkpọchieen̄ ya. Ebi melek n̄a ekupbe me ere ya kpemun̄. Ire, uga ukpook otetet ema, ema elilim isi iweek ere ilet-lek.

⁸Iyayaka inisik emi gaalek, nkekikpọ ilile inu ya òkirọ me ilaak ọkpọchieen̄ ya, efuuk otata isan̄a emi me emen, isi n̄a owọwọlọ kubọk ogwu òbokwukwu, unye geege ìkayaka ìsik emi me emen.

⁹Nnọnọ ida ene ya okitumu ikọ. Mgbọ nkigban̄ inu îkitumu, ilaak obenbe emi, nlalaak idọk, ike nkanabe isi ichit me ijọn̄.

¹⁰Ìkafiin̄, ubọk ene ge onenitet emi ibene igwuun̄, nkakana ikwuun̄ melek ubọk n̄a mè akpatukot n̄a me ijọn̄, mè ikiran.

¹¹Ene ya onenitumu inyi emi ibe, “Danien, owu ogwu Awaji omabe enenen, rieen̄ utọn̄ gban̄ ikọ mbatumu inyi owu. Nan̄a keke keke me ukot kwun̄, ke Awaji ìria emi inu me lek kwun̄.” Mgbọ îtumube ikọ ya inyi emi, nnanan̄a ikeke me ukot, mè ikiran.

¹²Inenitumu inyi emi ibe, “Danien, katet ukpook! Karake adasi usen ya owu ogelebe lek isiki me isi Awaji kwun̄ ikibeek mbeek ibe mè Awaji irọ inyi owu ògobo inu chi òtet, Awaji înọ mbeek kwun̄. Îre mije mbeek kwun̄ cha ke emi nnu.

¹³Ire, mgbọ nkinu, ogwu ibot ebi ijo erumun̄ ìkikpulu ido Pesia okekeke ikput emi otuuk kè akọp usen iba mè ge, ìkachieek ibe emi ǹraka. Ire, Maiken, ge me lek ebi ibot ebi osat Awaji, onunu initap ubọk inyi emi, mije, etetet emi ikaan̄ me ere ya, me ere ebi ubọọn̄ Pesia.

¹⁴Mgbọ keyi, ǹnu inenikpa inu òbosibi inyi ebi kinyi me mgburudun̄ mgbọ iwele ijeen̄ owu, mije, ilaak ọkpọchieen̄ ya ìkup inyi mgbọ òkup me isi.”

¹⁵Mgbọ îkitumu ikọ chi inyi emi, ǹkakana isi ichit me ijọn̄, mè ikup kubọk ogwu mbuuk, ǹkasan̄a amọn geege.

¹⁶Ogwu ge òkup kubọk ebilene oneninyana ubọk ichak emi me ukpọk otu, nchichili otu, mè ibene ikitumu ikọ inyi ogwu òkeke me isi n̄a ibe, “Ogwu nte, ilaak ọkpọchieen̄ ya mmun̄be îtap emi ukpook ijot emen, mè iwọ emi lek enenen.

¹⁷Ogwu nte, emi ogwu usun̄ kwun̄ m̀bajeje ikọt itumu ikọ melek kwun̄ ni? Unye geege ìkayaka ìkup emi me emen, ǹkayaka ìkọt ìfuuk efuuk.”

¹⁸Ogwu òbet lek ebilene ya okpọkpọk ichak emi ubọk me lek, mè itap emi unye me emen.

¹⁹Ene ya obebe emi, “Ogwu Awaji omabe enenen, katet ukpook. Kaan̄ esuuk, nye lek, mè kat ejit!” Mgbọ îkitumu ikọ ya melek n̄a, efuuk oninin̄ emi emen. Nnenibe ọmọ, “Ogwu nte, tumu ikọ nyi emi ǹnọ, mije, owu otap emi unye me emen.”

²⁰Ogwu ene ya onenido emi ibe, “Ìre oriọọn̄ inu òrọrọ nnube me lek kwun̄? Sọnja mgbọ, mâgwu ikom isi itim akọn̄ me lek ogwu ibot ebi ijo erumun̄ ìkikpulu ido Pesia. Nsitim eya isan̄a, ogwu ibot ebi ijo erumun̄ ìkikpulu Giris mônunu akọn̄ eyi kan̄.

²¹Kpunu ene geege òbobieen̄ emi udun̄ me lek akọn̄ chi, ilọ me lek kè Maiken, ogwu ibot ebi osat ìkikpulu ebi Ijeren. Ire, gban̄! Mâkpa inu egebe me emen Ikpa Atikọ inyi owu.