Read obolo Dan 12 Bible Online

Dan 12 - obolo bible

Dan 12

¹“Me ike mgbọ ya, Maiken ogwu ibot ebi osat ogwu òkikput lek ebi kinyi mônenikana isibi. Mgbọ ya ìbore mgbọ ufieejit òfefieek ichit, eyi kperarak imun̄ mbet kan̄ karake ido geelek obenebe ikup na re mgbọ ya. Ire, me mgbọ ya, mêneninyan̄a otutuuk ebi kinyi, ebi mêmun̄be erieen̄ kiban̄ egebe me emen ikpa ya, isibi.

²Ogbogbo ebi ìkwakwaan̄, efuun̄be me emen ijọn̄, mênan̄a ikeke. Usini kiban̄ mênan̄a ikeke inin̄ me ugwem ikakaan̄ge itata, sà usini ebenan̄a ikeke inin̄ me esip mè ochak eyi ikakaan̄ge itata.

³Ebi ìriọọn̄ inu mêtoon̄ kubọk utoon̄ akpa isinyọn̄. Ebi ìrọrọ inyi owuwa ene ekana ebi ata irọrọ mêkitoon̄ kubọk ntoronyan̄ ire mgbọ geelek mgbọ geelek.

⁴Ire, owu Danien, chit ikọ yi, mè gọm otu ikpa yi chit mege isi ire mgbọ òta mgbọ ya môrebe. Owuwa ebilene mêkinya ikana ere geelek, ifuk-ibot inu ekween̄be môkekitibi imin.”

⁵Emi Danien nnenibene chieen̄, mè imun̄ ofifi ene iba ekekebe me agba okwaan̄ ya, ene ge me agan̄ ge, ene ge me agan̄ keyilọ.

⁶Ene ge me lek kiban̄ onenido ogwu òtap ofọnti lilin̄ mè ikeke me inyọn̄ mun̄ okwaan̄ ya, ibe, “Ìre uyeke uyeke inu chi ìbokup isi ire mgbọ owa sabum mônirọ iso?”

⁷Ogwu osat òkeke me inyọn̄ mun̄ okwaan̄ ya obebene ubọk kan̄ agan̄ ulom mè ubọk kan̄ agan̄ ujit ifo inyọn̄, mè inyan̄a ibot me erieen̄ Awaji ogwu òkup me ugwem ire mgbọ geelek, ibe, “Inu chi môbọkọ acha ita mè okpọkọ.[11] Mêdadasi isisaak ebi mbuban Awaji ita efuuk me emen isan̄a, sabum òta mgbọ ya ònonu.”

⁸Nnọ inu geelek ogwu osat ya otumube, ire, ǹkakọt ìgobo ikọ kan̄ ìtet. Nnenido ọmọ ibe, “Ogwu nte uwu, ìre mgburudun̄ inu chi ìbokukup?”

⁹Inenifọọk emi ibe, “Danien, je si mbubeek kwun̄, mije, echichit ikọ chi geelek, mè igọm ikam, inyi ikup ikeya mege ire mgburudun̄ mgbọ.

¹⁰Mêgwọk owuwa ene, mè irọ inyi etana, mè ekakaan̄ okpa geege me ugwem. Ire, ebi ikpak ebekpọkpọ ikiwa ikpak me lek inyi isi, kpebekọt igobo inu geege itet. Ebi ìriọọn̄ inu gaalek ebekọt iriọọn̄ ibot inu chi geelek.

¹¹“Bene me mgbọ mêgbanbe ibe ekayaka ìgwa ngwugwa ekigwa usen geelek na re mgbọ mêyikbe òchichaka inu eyi òkitap mfufiat, ìbosibi obop mè efit usen iba mè akọp usen onaan̄ge.

¹²Uga ubelejit môkup inyi ogwu geelek òkakat ejit ikup ikikpọ, mege obop mè efit usen ita mè akọp ita mè go môsobe.

¹³“Mgbọ keyi, owu Danien, fo, mè keke nye mege re òta! Owu môlaak itap efuuk. Mgbọ usen ya isinire, me òta mgbọ, owu môjomo me mkpa, mè inibọkọ ìrot eyi esun̄be iban owu.”