Read obolo Dan 4 Bible Online

Dan 4 - obolo bible

Dan 4

¹Îre emi ogwu ubọọn̄ Nebukadineja nkige ikpa keyi ijet otutuuk ebi ife geelek, mè ebi ido geelek, mè ebi otu usem geelek, ebi ìluk me ere geelek me linyọn̄: Esuuk mè ibọbọọn̄ ubọọn̄ ikup inyi enyi otutuuk!

²Ejit îbele emi enenen irọrọ inyi enyi eriọọn̄ ikwaan̄ ukechieen̄ mè uyeke uyeke inu echi Awaji Ogwu Òbebene Ichit orọbe inyi emi.

³Ikwaan̄ ukechieen̄ kan̄ cha îmiin̄ enenen, uyeke uyeke ikwaan̄ kan̄ cha îkaan̄ unye enenen! Ama ubọọn̄ kan̄ ìkikup ire mgbọ ikakaan̄ge itata; mkpulu kan̄ ìkekeke inye, nan̄a me ukot re me ukot.

⁴Emi, Nebukadineja, ǹkup me uwu n̄a me utelelek mè ubelejit, inu okekije ijaan̄ emi me lek me emen uwu ubọọn̄ n̄a.

⁵Usen ge, nnenimun̄ ilaak ge òtetet emi ukpook. Ike nlaakbe me inyọn̄ mkpilaak n̄a me eririeen̄ usen ge, mmun̄ ilaak ọkpọchieen̄, mè ikeek ekiket òtatap emi ukpook me emen enenen.

⁶Eya orọ, nraria ibe esa otutuuk ebi ìriọọn̄ inu Babilọn enu me isi n̄a, mè enebum ibot ilaak ya enyi emi.

⁷Mgbọ ebi ìkiroon̄ nriroon̄, mè ebi ìkitet ǹcha, mè ebi ìkisa ntoronyan̄ ido ido-inu, mè ebi ìkido ido-inu cha enube me isi n̄a, nneniben ilaak ya ikpa ijeen̄ ema. Ire, ema kpekọt ibum ibot ilaak ya inyi emi.

⁸Me òta kan̄, Danien onunu me isi n̄a, nneniben ilaak ya ikpa ijeen̄. (Ekigwen ọmọ Belitisaja, mije, esa ọmọ isan̄a awaji n̄a. Ekwukwu ebi kè awaji ìkup mbuban ọmọ òwa me emen kan̄.)

⁹Nnenibe ọmọ, “Belitisaja, owu ogwu ibot ebi ìkiroon̄ nriroon̄ geelek, nriọọn̄ ibe ke owu okaan̄ ekwukwu ebi kè awaji ìkup mbuban me emen kwun̄, ke kpunu udọk udọk inu geege òkiyọyọt owu me lek ibubum ibot. Mâkpa ilaak ya mmun̄be inyi owu, mè owu òbum ibot ònyi emi. Ilaak ya ìre ikeyi:

¹⁰Mgbọ nlaakbe me inyọn̄ mkpilaak, mmumun̄ ilaak ọkpọchieen̄. Me emen ilaak ya, mbene chieen̄ ikpọ, mè imun̄ uti ile ge okekebe me isi n̄a me eden̄ eden̄ linyọn̄, mè ijọn̄ọ ichep me inyọn̄.

¹¹Uti ile ya onenitibi imin, mè inye lek, mè ijọn̄ọ ichak me akpa isinyọn̄. Ebilene ekekikup me otutuuk ere geelek me linyọn̄ imun̄ uti ya.

¹²Inwan̄ uti ya îjaan̄ uja, mfut ojojot otutuuk inyọn̄ kan̄, mfut kan̄ orere inorie òsoso otutuuk ebi linyọn̄ irerie ijot owot. Ebi kè anam oron ekekilet lek me irak kan̄, ebi kè ofut òwulu me inyọn̄ ekekinama uwu me lek otu agọọk kan̄. Otutuuk inu geelek òkifuuk efuuk ugwem ekikaan̄ inorie kiban̄ inan̄a me lek uti ile ya.

¹³“Ike nlaakbe me inyọn̄ mkpilaak n̄a ikimumun̄ ilaak ya, mmumun̄ ogwu etip[1] ge òkup mbuban okinan̄a me emen inyọn̄ ikwala isibi inu.

¹⁴Ogwu etip ya onenitaan̄ ukpo ikitumu ibe, ‘Fieek uti ya to, mè sọp otu agọọk kan̄ cha san̄a, mè gen̄ inwan̄ kan̄ san̄a me lek, mè yiyala mfut kan̄ cha. Lilaba anam oron cha san̄a me irak kan̄, mè lilaba si ofut cha san̄a me lek otu agọọk kan̄.

¹⁵Ire, sa okwukwut melek ekwe bọp ebon kan̄ mè ugwun̄-ijọn̄ kan̄ kam, mè tele inyi ibia me ijọn̄ me etete mbubet otu oron. “ ‘Kè mbat ònan̄a me isinyọn̄ ireke ọmọ lek, mè ọmọ ikiluk melek ebi kè anam oron me emen oron.

¹⁶Enwene ejit kan̄. Esan̄a ejit ebilene esan̄a me emen kan̄, mè esa ejit anam oron etap ọmọ me emen, inyi ikaan̄ ejit anam isa iluk acha jaaba.[2]

¹⁷“ ‘Ifieek oyerebet yi ìje me otu ebi etip inu, ema ebi ìkup me mbuban esa otu oyerebet yi inilook, inyi ebi ìkup me ugwem esa me ikeyi eriọọn̄ ibe ke îre Awaji Ogwu Òbebene Ichit okitọ ikọ me ama ubọọn̄ ebilene geelek. Ogwu òneme ọmọ ke îbene ito me ibot mkpulu ama ubọọn̄ geelek, ikerere ogwu ògegele isiki ichit me etete ebilene.’

¹⁸“Eyi ore ilaak emi, ogwu ubọọn̄ Nebukadineja, mmun̄be. Mgbọ yi, owu Belitisaja, bum ibot nyi emi, mije, kpunu ene geege me etete ebi ìriọọn̄ inu me ido n̄a òbokọt ibum ibot ilaak yi inyi emi. Ire, owu môkọt, mije, ekwukwu ebi kè awaji ìkup mbuban òwa me emen kwun̄.”

¹⁹Mgbọ Danien (ogwu erieen̄ kan̄ orebe Belitisaja) onọbe ilaak yi, îsisik ọmọ lek enenen sọn̄ mgbidim mgbọ, ekiket kan̄ otatap ọmọ ukpook igak emen. Mije keya, ogwu ubọọn̄ onenibe ọmọ, “Belitisaja, kachieek ibe ilaak yi isisaak owu, kachechieek si ibe ibot ilaak yi itap owu ukpook me emen.” Belitisaja ofọfọọk ibe, “Ogwu nte n̄a, mebe ke ilaak yi mè ibot kan̄ ìrọn̄ inyi ebi ochicha kwun̄, kè ònwọn!

²⁰Uti ile ya owu omun̄be, eyi òtitibi imin, mè inye lek, mè ijọn̄ọ ichak me akpa isinyọn̄, eyi ekikup me otutuuk ere geelek me linyọn̄ ikimun̄ ya,

²¹eyi òkakaan̄ ujuja inwan̄ mè mfut ijot lek gboi, eyi mfut kan̄ orebe inorie inyi otutuuk linyọn̄, eyi òrere ere ebi kè anam oron ekiniluk, mè ere ebi kè ofut òwulu me inyọn̄ ekininama uwu me lek otu agọọk kan̄ iluk ya,

²²ogwu ubọọn̄, owu ore uti ile ya! Owu otibi imin mè inye lek; umin kwun̄ îtibi mege ichak me akpa isinyọn̄, mkpulu kwun̄ îsan iwele ire ntutun̄ ere geelek me linyọn̄.

²³“Ogwu ubọọn̄, owu omun̄ ogwu etip ge òkup me mbuban okinan̄a me emen inyọn̄ isibi inu, mè ikitumu ibe, ‘Cho uti ya to, mè jijaka gwook, ire, juuk ebon uti ya melek ugwun̄-ijọn̄ kan̄ tele me ijọn̄, mè sa okwukwut melek ekwe bọp kam, mè mbubet itibi ikana. Kè mbat ònan̄a me inyọn̄ ireke ọmọ lek, mè ikiluk kubọk ebi kè anam oron mege acha jaaba.’

²⁴“Ogwu ubọọn̄, ibot ilaak ya melek ikan eyi Awaji Ogwu Òbebene Ichit otapbe ikeme owu, nte uwu n̄a ìre ikeyi:

²⁵Mêrieen̄ owu isibi inan̄a me etete ebilene, owu môsi iluk me emen oron me etete ebi kè anam oron. Owu môkitaka mbubet kubọk ebi kè eriembuuk, mbat ònan̄a me inyọn̄ môkireke owu lek. Acha jaaba môraka, mege ire mgbọ owu mônọbe lek, mè iniriọọn̄ ibe ke Awaji Ogwu Òbebene Ichit okitọ ikọ me otutuuk ama ubọọn̄ ebilene geelek, mè ikisa ama ubọọn̄ cha inyi ene geelek òneme ọmọ ibe ikpulu.

²⁶Ida ya eyi òbe mè ejuuk ebon uti ya melek ugwun̄-ijọn̄ kan̄ etele, ìsibi ibe ke mêyaka ama ubọọn̄ kwun̄ inyi owu, mgbọ owu osiniriọọn̄ ibe ke îre Awaji òkup me Emen Inyọn̄ okikpulu.

²⁷Eya orọ, ogwu ubọọn̄, nye lek bọkọ nteme n̄a: Tele otutuuk ijo inu cha okirọ, mè kirọ inu òtatat. Tele ugwem afa kwun̄ cha, mè kikaan̄ ata ejit me lek ebi ekirọ ikeme. Usini mgbọ, inu òkije ijaan̄ owu me lek mgbọ keyi môkpọkpọ ikijaan̄ inyi isi.”

²⁸Otutuuk inu chi îrọ iso me ugwem ogwu ubọọn̄ Nebukadineja.

²⁹Akọp mè onyan̄ iba îraka me lek. Usen ge, ogwu ubọọn̄ onenikije me inyọn̄ otoon̄ uwu ogwu ubọọn̄ me Babilọn,

³⁰mè ikitumu ibe, “Ìre ìkafat ìre ikpele ama Babilọn ya eyi emi nnamabe isa irọ ere nluk ogwu ubọọn̄ ire eyi? Emi me lek n̄a nsa ikpele unye n̄a inama, inyi ebi ene esa me ikeya emun̄ umin n̄a melek umin eyi mkpulu n̄a. Ìre ìkafat ìre ama ya ire eyi?”

³¹Ogwu ubọọn̄ òkitumu ikọ ya me otu, ida ge onanan̄a me emen inyọn̄ ikitaan̄ ibe, “Ogwu ubọọn̄ Nebukadineja, ikọ etumube ifieek òfo me lek kwun̄ ìre ikeyi: Mîbọkọ unye mkpulu kwun̄ isan̄a owu me ubọk.

³²Mêrieen̄ owu isibi inan̄a me etete ebilene, owu môsi iluk me emen oron me etete ebi kè anam oron. Owu môkitaka mbubet kubọk ebi kè eriembuuk. Acha jaaba môraka, mege ire mgbọ owu mônọbe lek, mè iniriọọn̄ ibe ke Awaji Ogwu Òbebene Ichit okitọ ikọ me otutuuk ama ubọọn̄ ebilene geelek, mè ikisa ama ubọọn̄ cha inyi ene geelek òneme ọmọ ibe ikpulu.”

³³Mgbọ yaage, inu ya etumube ibak Nebukadineja orọrọ iso. Ererieen̄ ọmọ isibi inan̄a me etete ebilene, ikekitaka mbubet me oron kubọk eriembuuk. Mbat ònan̄a me inyọn̄ okekireke ọmọ lek, mege inwọọn̄ lek kan̄ otitibi ijọn̄ọ kubọk akukọ igo, sà abọm kan̄ otibi ijọn̄ọ kubọk abọm unọn.

³⁴“Mgbọ mgbọ ya osobe, emi Nebukadineja, nnenibene chieen̄ ikpọ inyọn̄. Mgbọ yaage, nnọnọ lek. Nneninyi Awaji Ogwu Òbebene Ichit itọn̄, mè inyi ọmọ umin, mè itọn̄ ujamgbugbo kan̄, ọmọ ogwu òkup me ugwem ire mgbọ geelek. “Mkpulu kan̄ ìre mkpulu eyi ìkakaan̄ itata; ama ubọọn̄ kan̄ ìkikup nan̄a me ukot re me ukot.

³⁵Otutuuk ebi linyọn̄ keyi kpekup me lek inu geege me isi kan̄. Otutuuk unye geelek òkup me emen inyọn̄, mè otutuuk ebilene ìkup me linyọn̄, ìkisa ema irọ inu geelek òneme ọmọ. Kpunu ogwu òbokọt igban ọmọ, kpunu ogwu òbokọt ido ọmọ ibe, ‘Ìre kpasi inu ke orọ ikeyi?’

³⁶“Mgbọ yaage nnọbe lek, nyayaka ikpọk ikaan̄ umin n̄a mè òrirọ n̄a, melek ama ubọọn̄ n̄a mè otutuuk umin kan̄ mè uja kan̄. Ebi nteme n̄a mè ebi ibot ikwaan̄ n̄a eneniweek emi imun̄, mè ikpọk ibene emi itoon̄ me inyọn̄ ogboon̄ ubọọn̄ n̄a. Nneniyaka imin igak adasi mgbọ.

³⁷Mgbọ keyi, emi Nebukadineja, ǹkinyi Ogwu Ubọọn̄ emen inyọn̄ itọn̄, mè ikinyi ọmọ umin, mè ikitọn̄ ujamgbugbo kan̄, mije, inu geelek îkirọ ìkitatat, otutuuk oniin̄ kan̄ ìre unen. Otutuuk ebi ugumu geelek, ọmọ môkọt ikeme isiki.”