Read obolo Dan 6 Bible Online

Dan 6 - obolo bible

Dan 6

¹Dariọs onenigobo ebi ibot mkpulu, efit mè akọp ene iba, ito, ibe ekekpulu efit mè akọp agan̄ iba òkup me ama ubọọn̄ kan̄,

²mè inigobo si ofifi ilile ebi ibot mkpulu ìbebene igak ebiba, ene ita, ito, ibe ekekpọ chieen̄ me lek kè ebiba. Ene ge me lek ene ita chi ìre Danien. Îre ema ekikpọ chieen̄ me lek inu geelek ebi ibot mkpulu agan̄ cha ekirọ, inyi ebi ibot mkpulu cha ekarọ inu ogwu ubọọn̄ ikamage.

³Danien onenikirọ ijaan̄ enenen igak otutuuk ilile ebi ibot mkpulu iba kechilọ, mè otutuuk ebi ibot mkpulu agan̄ cha geelek, bak me lek esese ekwukwu eyi îkaan̄be. Mije keya, ogwu ubọọn̄ onenitọt ibebene Danien ifo inyọn̄, inyi inire ogwu ibot mkpulu me otutuuk ama ubọọn̄ ya.

⁴Mije keya, ilile ebi ibot mkpulu iba kechilọ, mè ebi ibot mkpulu agan̄ cha, ekekiweek inu ebesa itoon̄ Danien ikọ sa me ubọk mkpulu kan̄. Ire, kpekọt iweek inu geege imun̄. Ema kpemun̄ ngan geege me ugwem kè Danien, mije, ọmọ ìre ogwu ògbegbe utoon̄-ejit. Kpunu ngan mè mfeen̄ geege me ugwem kan̄.

⁵Ife cha enenibe, “Eji kpebekaan̄ inu geege ebesa itoon̄ Danien yi ikọ, îtata inu ògbaan̄ me lek Awaji kan̄.”

⁶Ilile ebi ibot mkpulu cha, mè ebi ibot mkpulu agan̄ cha enenigbaan̄ itọt, mè isi lek ogwu ubọọn̄ isi itumu inyi ibe, “Ogwu ubọọn̄ Dariọs, luk ujọn̄ọ ugwem!

⁷Otutuuk kiji, ilile ebi ibot mkpulu, mè ebi mkpulu agan̄, mè ebi mkpulu ido, mè ebi nteme, mè ebi ibot otu agọọk, eji otutuuk mîgbaan̄ ichieek ibe mè owu ogwu ubọọn̄ òtap ikan, mè ònyi ida ibe, bene me cherekeyi mege isi ire akọp usen ita òkup me isi, ene geelek òrariaak uriaak inyi ofifi awaji, mè ìyaka ire ebilene, ilọ me lek kwun̄ ogwu ubọọn̄, eben ene ya etọp etap me emen udọn̄ egbe àtat.

⁸Mgbọ keyi, ogwu ubọọn̄, tap ikan yi, mè ge tap me ikpa, inyi ene geege ikakọt ìnwene, ike orọmijọn̄ ikan ebi Midia mè ikan ebi Pesia okupbe, mè ekakọt si ìgwak.”

⁹Ogwu ubọọn̄ Dariọs otatap ikan ya, mè ige itap me ikpa.

¹⁰Mgbọ Danien onọbe ibe ke mîtap ikan ya, mè ige itap me ikpa, inenene isi agan̄ inyọn̄ me lek uwu ere îlukbe, mè inin̄ agwut eyi nruruk kan̄ ochilibe ikikpọ Jeruselem. Ikukup me ere ya ikitọbọ ekpe iriaak uriaak mgbọ ita ita me usen, mè ikinyi Awaji itọn̄, ike îkiwuuk lek irọ.

¹¹Ife chi enenigbaan̄ ije, mè isi imun̄ Danien okiriaak uriaak, mè ikibeek mbeek me ubọk Awaji kan̄.

¹²Ema egwugwu ikom isi lek ogwu ubọọn̄, mè itumu inyi ibe, “Ogwu ubọọn̄, ìre owu òkafat ìtap ikan ibe, mege akọp usen ita òkup me isi, ene geelek òrariaak uriaak inyi ofifi awaji, mè ìre ebilene, ilọ me lek kwun̄ ogwu ubọọn̄, eben ene ya etọp etap me emen udọn̄ egbe àtat?” Ogwu ubọọn̄ ofọfọọk ibe, “Iin̄! Ikan ya ìkekeke inye, igọọk me orọmijọn̄ ikan ebi Midia mè ikan ebi Pesia, kpebekọt inwene.”

¹³Ema enenibe ogwu ubọọn̄, “Danien ogwu usun̄ akọn̄ ònan̄a me Juda, ìkakigban̄ utọn̄ ìnyi owu, ogwu ubọọn̄, ìkasisiki si ibot ìnyi ikan owu otapbe, mè ige isibi. Ìkpọkpọ ikiriaak uriaak kan̄ mgbọ ita ita usen geelek.”

¹⁴Ejit osisisaak ogwu ubọọn̄ enenen mgbọ înọbe ikọ yi. Ibebene ikiweek ike ìbosa inyan̄a Danien isibi. Îsa ikana igak, mege ura ochepbe, ìkamun̄ irek.

¹⁵Ebi ife cha enenigbaan̄ ije isi lek ogwu ubọọn̄, mè inibe ọmọ, “Ogwu ubọọn̄, kawuuk ibe, igọọk me lek orọmijọn̄ ikan ebi Midia mè ikan ebi Pesia, ikan geelek ogwu ubọọn̄ otapbe, mè ige isibi, ke kpekikọt inwene.”

¹⁶Eya orọ, ogwu ubọọn̄ onyinyi ida, esisi itet Danien, mè isa isi itọp itap me emen udọn̄ egbe àtat. Ogwu ubọọn̄ otutumu inyi Danien ibe, “Kè Awaji kwun̄ ya, ogwu owu okitọbọ ebum inyi mgbọ geelek, inyan̄a owu!”

¹⁷Enenikpukpọt ewuuk ge ichit otu udọn̄ egbe àtat ya, ogwu ubọọn̄ osasa mkpọtubọk iman̄ òriọọn̄ kan̄ ikeme me lek ewuuk ya, otutuuk ebi ibot ikwaan̄ kan̄ esasa si mkpọtubọk iman̄ òriọọn̄ kiban̄ ikeme si me lek, inyi ene geege ikakọt ìnwene irek kè Danien.

¹⁸Ogwu ubọọn̄ ogwugwu ikom ifo uwu ubọọn̄ kan̄. Ìkachieek ibe enekwak nkwukwak esa ebele ọmọ ejit, ike ekiwuuk lek irọ, ìkachachak si inu geege me otu. Ilaak geege ìkanin̄ si ọmọ chieen̄ otutuuk eririeen̄ usen ya.

¹⁹Me ofit iwele kan̄, me agan̄ egwe, ogwu ubọọn̄ onanan̄a ikeke, mè ije ugwat-lek ugwat-lek isi otu udọn̄ egbe àtat ya.

²⁰Mgbọ îjebe igbet otu udọn̄ egbe àtat ya, itataan̄ ukpo me ida ufieejit ikibọn̄ọ Danien ibe, “Danien, ogwu ikwaan̄ Awaji ogwu òkup me ugwem, ìre Awaji kwun̄, ogwu owu okitọbọ ebum inyi mgbọ geelek, îkọt inyan̄a owu isibi me otu ebi kè egbe àtat?”

²¹Danien okukup me emen udọn̄ ya ikifọọk ọmọ otu ibe, “Jei, ogwu ubọọn̄, luk ujọn̄ọ ugwem!

²²Awaji n̄a îria ogwu osat kan̄ inu, inenichit otu ebi kè egbe àtat. Ema kpesak emi unan geege me lek, mije, emi ǹkalọ ikan geege me isi Awaji. Ikerere me isi kwun̄ si, ogwu ubọọn̄, ǹkarọ ijọ inu geege.”

²³Ogwu ubọọn̄ obebele ejit enenen, mè inyi ida ibe etaba Danien esibi me emen udọn̄ egbe àtat ya. Mgbọ etababe Danien isibi me emen udọn̄ ya, kpemun̄ unan geege me lek, mije, îtoon̄ ejit me lek Awaji kan̄.

²⁴Ogwu ubọọn̄ onyinyi ida, esasa ife cha ebi ìtotoon̄ Danien ikọ inu, ema melek otutuuk ebi nwa, mè otutuuk ebi bọn, mè itọọn̄ ema igwook me emen udọn̄ egbe àtat ya. Sabum ema enirere ijọn̄ me emen udọn̄ ya, ebi kè egbe àtat cha ewuwulu ikweek ema, mè iloon̄ ema igwak itaka, mè ikpukpuku ukwuuk kiban̄ isan̄a.

²⁵Ogwu ubọọn̄ Dariọs onenige ikpa ijet otutuuk ebi ife geelek, mè ebi ido geelek, mè ebi otu usem geelek òkup me linyọn̄ ibe: Esuuk mè ibọbọọn̄ ubọọn̄ ikup inyi enyi otutuuk!

²⁶“Ǹkinyi ikan keyi, mè ige itap me ikpa ibe, me otutuuk ere geelek me ama ubọọn̄ n̄a, ebi ene etet ukpook me lek Awaji kè Danien, mè ekenyi ọmọ ulibi. “Mije ọmọ ore Awaji òkup me ugwem, ìkukup ire mgbọ geelek; ama ubọọn̄ kan̄, kpebekọt ijijaka, mkpulu kan̄ ìbokup ire mgbọ ikakaan̄ge itata.

²⁷Ọmọ okitaba ene isibi, ọmọ si okinyan̄a ene; ọmọ okirọ uyeke uyeke inu, mè inu ukechieen̄ me emen inyọn̄, mè linyọn̄. Ọmọ otaba Danien isibi, inan̄a me otu ejeek ebi kè egbe àtat.”

²⁸Inu onenije ijaan̄ me lek kè Danien me ukot mkpulu kè Dariọs, mè ukot mkpulu kè Sarọs ogwu ubọọn̄ Pesia.