Read obolo Dan 7 Bible Online

Dan 7 - obolo bible

Dan 7

¹Me adasi acha me lek mkpulu kè Belisaja, ogwu ubọọn̄ ido Babilọn, Danien îmumun̄ ilaak ge, mè imun̄ owuwa ilaak ọkpọchieen̄ mgbọ îlaakbe me inyọn̄ mkpilaak kan̄. Îge inu cha îmun̄be itap me ikpa.

²Danien ìkpa ibe ikeyi, “Me emen ilaak n̄a me eririeen̄, mbene chieen̄, mè imun̄ unye efet ònan̄a me agan̄ ini eyi isinyọn̄ ikiwut igwook me isi mun̄, mè itap ogbururu ijot nga okwaan̄ ile.

³Ikpele anam ukpook ini òkup esese esese eneninan̄a me emen okwaan̄ ya isibi.

⁴“Eyi adasi ìbet lek egbe àtat, mè ikaan̄ uwop kubọk uwop igo. Me chieen̄ n̄a, enenigwak uwop kan̄ isan̄a, mè ibene ọmọ igwuun̄, ikekeke me ukot iba kan̄ kubọk ebilene. Eneninyi ọmọ ejit ebilene.

⁵“Nnenimun̄ òso anam ukpook iba me isi n̄a. Anam keyi ìbet lek ibo nriọk. Ìbebene lek kan̄ agan̄ ge ifo inyọn̄, kubọk unye anam òtutuun̄ ikiket anam ìbochim. Me otu kan̄, îkaan̄ mgbaramgbasi ita me agbagba ejeek kan̄. Ida ge onenitumu inyi ọmọ ibe, ‘Jibi bene, mè taka ufuk jot owot!’

⁶“Mgbọ eya orakabe, mkpọkpọ, mè imun̄ ofifi anam ukpook òbet lek egbe ntọọk ntọọk. Anam yi îkaan̄ uwop ini me udun̄, uwop cha ìbet lek echi unọn. Anam yi ìkaan̄ ibot ini. Mînyi anam yi unye eyi mkpulu.

⁷“Mgbọ eya orakabe, nnenimumun̄ ilaak me eririeen̄. Me emen ilaak ya, nnenimun̄ òso anam ukpook ini me isi n̄a. Anam keyi îkaan̄ ukpook, mè ikigwook ene mbiribọ me lek, mè ikaan̄ si unye enenen. Îkaan̄ ikpele ejeek okwukwut me otu, eyi îkisa iloon̄ anam geelek ìbotaka ikpukpuku ukwuuk me lek. Inu geelek òsisik me lek anam cha, îra isa ukot ijak ikpukpuku. Anam keyi îsibi esese me lek otutuuk anam ukpook kechilọ. Anam yi ìkaan̄ akọp iko me ibot.

⁸“Mgbọ nkikeek inu ofolek iko cha, me chieen̄ n̄a, ofifi iko otitibi isibi me etete iko kechilọ cha, ire, iko keyi ìre sọntiik iko. Iko ita me lek akọp iko cha ìjijibi inan̄a, inyi sọntiik iko ya ikaan̄ irek itibi isibi. Sọntiik iko ya îkaan̄ chieen̄ kubọk chieen̄ ebilene, mè ikaan̄ si otu òkitumu ikọ ugumulek ugumulek.

⁹“Me chieen̄ n̄a, enenidọmọ ogboon̄ ubọọn̄ iyiyik me irek me irek, Ogwu Akarake Akat ya onenisiki ikweek me irek kan̄. Ofọnti kan̄ ìkitana miai kubọk abalara; ijeek ibot kan̄ okekitana kubọk okuket inwọọn̄ anam. Ogboon̄ ubọọn̄ kan̄ okekisak kubọk alọm ukan̄, otutuuk ukot ogboon̄ ubọọn̄ ya okekilomo kubọk ukan̄.

¹⁰Ukan̄ okekinan̄a me isi kan̄ ikigbuk isibi kubọk ìre mun̄ okwaan̄. Obop obop ebi ene ekekisi ikwaan̄ inyi ọmọ, efie efie ebi ene kpêkọtbe ifuk otu ifuk ekekeke me isi kan̄. Oyerebet oninin̄, enenichili otutuuk ikpa iwele.

¹¹“Mkpọkpọ igwuun̄ si chieen̄ ikikpọ, mije ikọ ugumulek cha echi sọntiik iko ya okitumu. Nkekikpọ mege ire mgbọ etetbe anam ukpook ya ikpan̄, mè ijijaka akpalek kan̄, mè iben itọp itap me emen ukan̄ ya òkisasak.

¹²Mîbọkọ unye mkpulu isan̄a me ubọk anam ita kechilọ, mè itele ibe ema egat ugwem sọntiik mgbidim mgbọ.

¹³“Me emen ilaak ya si, mkpọkpọ, mè imun̄ me isi n̄a, ene ge òkup kubọk Gwun̄ Ebilene okinu me emen oduku inyọn̄. Inenije igbet lek Ogwu Akarake Akat ya, enenisa ọmọ ije isi isi kan̄.

¹⁴Eneninyi ọmọ unye eyi mkpulu, mè ujamgbugbo, mè irek ubọọn̄. Otutuuk ebi ife geelek, mè ebi ido geelek, mè ebi otu usem geelek ekekitọbọ ebum inyi ọmọ. Mkpulu kan̄ ìre mkpulu mgbọ geelek, eyi ìkakaan̄ itata, ama ubọọn̄ kan̄ si ìre eyi kpebekọt ijijaka.

¹⁵“Emi Danien, ekwukwu n̄a îsisik, mije, inu mmun̄be me emen ilaak ya îsisaak emi enenen.

¹⁶Nnenisi lek ene ge me lek ebi ìkeke me ere ya, mè ido ọmọ ibe ìre inu chi ìsibi keke ye. “Ene ya onenikpa inu geelek ofolek inu chi inyi emi, mè inibum ibot otutuuk inu chi inyi emi.

¹⁷‘Ikpele anam ukpook ini cha ìkeke inyi ama ubọọn̄ ini òbosibi ikeke me linyọn̄ keyi.

¹⁸Ire, me òta kan̄, mêkana mkpulu ama ubọọn̄ cha inyi ebi eyi Awaji Ogwu Òbebene Ichit mege ire mgbọ ikakaan̄ge itata. Mkpulu ya môre eyi kiban̄ ire mgbọ geelek mgbọ geelek.’

¹⁹“Nneniweek irọriọọn̄ atikọ ofolek anam ukpook eyi òso ini ya, eyi ònwenwene me lek otutuuk anam ukpook kechilọ cha, mè ikaan̄ ukpook igak otutuuk, mè ikaan̄ ejeek okwukwut, mè ujọn̄ọ abọm ekwe. Anam yi ìkikpukpuku anam geelek îtetbe, mè òtaka omeen̄. Geelek òsisik, îra isa ukot ijak ikpukpuku.

²⁰Mweek si irọriọọn̄ inu ofolek akọp iko cha òkup me ibot anam ya, melek sọntiik iko ge ya ònenitibi isibi me ibot kan̄, eyi iko ita ojibibe inan̄a, inyi ikaan̄ irek itibi isibi. Mweek si irọriọọn̄ inu ofolek sọntiik iko ya eyi òkakaan̄ ukpook igak otutuuk iko kechilọ cha, mè ikaan̄ chieen̄, mè ikaan̄ si otu îkisa itumu ikọ ugumulek ugumulek.

²¹Me chieen̄ n̄a gaalek, mmumun̄ iko ya okitim akọn̄ me lek ebi eyi Awaji, mè ikitim igak ema,

²²mege ire mgbọ Ogwu Akarake Akat ya okanabe isibi, mè inifieek oyerebet inwọn ebi eyi Awaji Ogwu Òbebene Ichit. Mgbọ onenikem, ikakana mkpulu ya itap ema me ubọk ibe ebọkọ esak.

²³“Inenitumu inyi emi ibe, ‘Anam ukpook eyi òso ini ya ore ama ubọọn̄ eyi òso ini eyi òbosibi inu me linyọn̄. Ama ubọọn̄ keyi ìbore esese me lek otutuuk ama ubọọn̄ geelek, ìbogwagwak otutuuk linyọn̄ igwook, mè ijak me ukot, mè ikpukpuku isan̄a.

²⁴Akọp iko cha ìkeke inyi akọp ebi ubọọn̄ ebi ìbenikikpulu ama ubọọn̄ keyi. Ukot kiban̄ isiraka, ofifi ogwu ubọọn̄ mônanan̄a isibi. Ogwu ubọọn̄ keyi ìbore esese me lek ebi ubọọn̄ ìkpukpulu sabum ọmọ. Ogwu ubọọn̄ yi môtim akọn̄ ikpan̄ ebi ubọọn̄ ita.

²⁵Môtumu ikọ ikeme Awaji Ogwu Òbebene Ichit, mè itutuku ebi eyi Awaji Ogwu Òbebene Ichit enenen, mè iweek inwenwene ijọk mfaka melek ikan geelek òkukup. Mêkana ebi eyi Awaji itap ọmọ me ubọk acha ita mè okpọkọ.[5]

²⁶“ ‘Ire, mênin̄ oyerebet, mè ibọkọ otutuuk unye isan̄a ọmọ me ubọk, mè ijijaka ọmọ isan̄a kpai mege ire mgbọ ikakaan̄ge itata.

²⁷Mgbọ ya, mênenikana irek mkpulu, mè unye geelek, mè umin eyi ama ubọọn̄ geelek òkup me irak ura keyi itaak me ubọk ebi eyi Awaji, ebi eyi Awaji Ogwu Òbebene Ichit. Mkpulu kan̄ ìbore mkpulu òbokup ire mgbọ geelek. Otutuuk ebi mkpulu geelek ebekitọbọ ebum inyi ọmọ.’

²⁸“Okputut ilaak ya ire eya. Ekiket ònin̄ emi Danien ejit mije ilaak ya îsisaak emi enenen, mè irọ inyi isi n̄a iwọlọ mgbọ yaage. Ire, ǹchichit ilaak ya ikaan̄ me lek n̄a, ǹkakpa ìnyi ene geege.”