Read obolo Dan 8 Bible Online

Dan 8 - obolo bible

Dan 8

¹Me òso acha ita me lek mkpulu ogwu ubọọn̄ Belisaja, emi Danien, nnenimun̄ ofifi ilaak ọkpọchieen̄, mgbọ inu geelek ofolek adasi ilaak ọkpọchieen̄ mmun̄be ya orakabe.

²Me emen ilaak ya, m̀mun̄ lek n̄a ike nkekebe me agba lek okolo Ulai, me Susa, òrere ama ibot me agan̄ Elam.

³Mbebene chieen̄ ikpọ, mè imun̄ orie arọọn̄ ge òkaan̄ ujọn̄ọ iko iba me ibot okekebe me isi n̄a me agba lek okolo ya. Ge me lek iko iba cha îjọn̄ọ igak ge. Iko eyi òjọjọn̄ọ igak ya ìtibi isibi mgburudun̄.

⁴Nkekikpọ ike orie arọọn̄ ya okinya ikana ikisa iko kan̄ cha ikichichiin̄ ebi kè anam. Îlilaba anam inin̄ agan̄ ichep-ura, mè agan̄ inyọn̄, mè agan̄ osiki. Kpunu anam geege òkọkọt ikeke ida ọmọ, kpunu si ene geege òkọkọt inyan̄a inu geelek îgọbọbe isibi me ubọk kan̄. Inu geelek òneme ọmọ, eya ke îkirọ. Sa me ikeya, ikakaan̄ unye enenen.

⁵Ike nkikeek ekiket ofolek inu yi, ǹyaka inimun̄ orie ebot ge okanabe isibi mgbọ yaage, mè ikaan̄ ilile iko ge òtibi isibi me okwut isi, me agbagba chieen̄ iba kan̄. Orie ebot yi ìnan̄a me agan̄ ichep-ura isibi, mè ikilibi ekot ekot isaba linyọn̄, ukot kan̄ ìkare ijọn̄.

⁶Orie ebot yi onenire lek orie arọọn̄ ya òkaan̄ iko iba, eyi òkeke me agba lek okolo Ulai, mè isa me uga unaan̄-ejit ijibi inin̄ lek,

⁷mè inin̄ ọmọ gìrìrìm, mè igoon̄ ọmọ kpekpekpe, mè igoon̄ iko iba orie arọọn̄ ya ifaan̄ isan̄a kpai. Efuuk otata me emen orie arọọn̄ ya, ìkayaka ìkọt ìkeke ìda orie ebot ya. Orie ebot ya ogogon orie arọọn̄ ya ito me ijọn̄, mè isa ukot ijak ọmọ imem me ijọn̄. Ìkakaan̄ ogwu òkọkọt inyan̄a orie arọọn̄ ya isibi me unye ubọk orie ebot ya.

⁸Orie ebot ya onenikaan̄ ikpele unye. Ire, me mgbọ unye kan̄ ominbe ichit, ikpele iko kan̄ ya ofafan̄a. Me irek kan̄, ayaya ilile iko ini otitibi isibi, mè isan ikida agan̄ ini eyi linyọn̄ keyi.

⁹Ofifi sọntitiik iko ge onenitibi isibi me lek iko ge me etete iko ini cha, mè ikimin, mè ikaan̄ unye enenen, mè ikitibi inyana ikpọ agan̄ osiki, mè agan̄ mbum-ura, mè ikitibi si inyana ikpọ agan̄ Uja Ido ya, òrere Ijeren, okupbe.

¹⁰Iko ya otitibi imin mege isi ichak me lek ebi kè ntoronyan̄ me akpa isinyọn̄, mè ida usini ntoronyan̄ igwook me ijọn̄, mè isa ukot ijak ema imem.

¹¹Îsa unye kan̄ isi itọ me lek Ogwu Ibot urum akọn̄ emen inyọn̄, mè ibọkọ ngwugwa ekigwa inyi ọmọ usen geelek isan̄a me ubọk kan̄, mè ijijaka Uwu Mbuban kan̄ igwook.

¹²Me nrọ-nlọ, mîto ebi akọn̄ ibe ekekpọ chieen̄ me lek ngwugwa ekigwa usen geelek,[6] mè iben atikọ itọp ito me ijọn̄. Inu geelek iko ya orọbe, ìkpọkpọ ikije ijaan̄ inyi.

¹³Nneninọ ogwu mbuban ge okitumu ikọ, ofifi ogwu mbuban okekido ọmọ ibe, “Ìre ilaak ọkpọchieen̄ chi ìbokup ire mgbọ owa sabum ìborọ iso? Ilaak ọkpọchieen̄ eyi ngwugwa usen geelek, mè eyi mkpaka-ibot eyi òkitap mfufiat, mè eyi ijijijaka Uwu Mbuban, mè eyi ijajak ebi akọn̄ me ukot ya, ìre mgbọ owa ke otutuuk chi oborọ iso?”

¹⁴Ofifi ogwu mbuban ya onenitumu inyi emi ibe, “Inu chi môbọkọ obop ikakwun̄ mè ewelegwe iba mè efit ita,[7] sabum mênigwọk lek Uwu Mbuban Awaji.”

¹⁵Mgbọ emi, Danien, nkikpọ ilaak ọkpọchieen̄ ya, mè ikikeek ike mbasa igobo itet, nnenimun̄ inu ge òbet lek enerieen̄ okekebe me isi n̄a.

¹⁶Nnọnọ ida ene ge okitaan̄ ukpo inan̄a me okolo Ulai ya ikitumu ibe, “Geberen, bum ibot ilaak ọkpọchieen̄ ya nyi ogwu enerieen̄ yi.”

¹⁷Ike ogwu ene ya okije igbet ere nkekebe, ukpook otetet emi enenen, nrọrọn̄ me ijọn̄, mè igban inyana. Ene ya onenitumu inyi emi ibe, “Gwun̄ ebilene, ilaak ọkpọchieen̄ owu omun̄be ìgbaan̄ me lek mgburudun̄ mgbọ. Tet ibot!”

¹⁸Òkitumu ikọ ya me otu, nkakana isi ichit me ijọn̄, mè ilaak inwọnọ. Ene ya onenichak emi ubọk me lek, mè ibene emi igwuun̄, nkekeke.

¹⁹Inenitumu inyi emi ibe, “Mânikpa inu òbomọnọ irek me mgburudun̄ mgbọ, mgbọ Awaji môjeen̄be unaan̄-ejit kan̄ inyi owu, mije, ilaak yi ìgbaan̄ me lek mgburudun̄ mgbọ eyi edọmọbe isun̄.

²⁰Orie arọọn̄ òkaan̄ iko iba me ibot ya owu omun̄be ìkeke inyi ebi ubọọn̄ Midia mè Pesia.

²¹Orie ebot ìnwọọn̄ lek ya ìre ogwu ubọọn̄ Giris. Ilile iko eyi òtitibi isibi me okwut isi kan̄, me agbagba chieen̄ iba kan̄ ya, ìre adasi ogwu ubọọn̄.

²²Ayaya iko ini cha echi òtitibi isibi me irek iko ge òfafan̄a ya ìre ama ubọọn̄ ini echi òbotibi isibi inan̄a me Giris, ire, ema kpebekaan̄ ojelek unye Giris okaan̄be.

²³“Me òfo òta ukot mkpulu kiban̄, mgbọ inu ikpak môsobe ifuk, ogwu ubọọn̄ ge òrere ogwu ikpak, mè ikaan̄ lọkọlọkọ ugwem, mônu inikikpulu.

²⁴Ogwu ubọọn̄ ya mônye lek enenen enenen, ire, unye-lek ya ìkabore sa me unye kan̄. Môtap ikpele jakajaka ijot ere, inu geelek îkirọ, ìbokpọkpọ ikije ijaan̄ inyi. Môjijaka owuwa ebi mkpulu ìnyenye lek, mè ijijaka si owuwa ebi eyi Awaji.

²⁵Mije lọkọlọkọ ugwem kan̄, môsa me ofiaan̄ ofiaan̄ irọ owuwa inu geelek îweekbe irọrọ, mè imọnọ lek kan̄ kubọk ogwu òmimin ichit. Mgbọ ebi ene isikikeek ibe ke ema ekiluk me utelelek, mônenijijaka ugwem owuwa ene, mè inisa me ugumulek itọ ubọk me isi Ogwu Ibot Ebi Ibot Mkpulu. Mêjijaka ọmọ me mgburudun̄ mgbọ, ire, ìkabore me unye ebilene.

²⁶“Ilaak ọkpọchieen̄ ya ofolek ikakwun̄ mè ewelegwe ìre atikọ. Ire, chit ilaak ya, mije, ilaak ya ìgbaan̄ me lek ujọn̄ọ ujọn̄ọ mgbọ ònu me isi.”

²⁷Emi Danien, mfefieek ejit enenen, mè ifiak orukan̄, mè iwọ ilaak owuwa usen. Ire, ntetet lek inye, mè inan̄a ikeke, mè ibene ikirọ ikwaan̄ ogwu ubọọn̄. Ire, ejit îsisaak emi enenen me lek ilaak ọkpọchieen̄ cha, mije, kpunu ogwu òkọkọt igobo itet.