Read obolo Dan 9 Bible Online

Dan 9 - obolo bible

Dan 9

¹Adasi acha me lek mkpulu kè Dariọs, gwun̄ kè Jakisis (òrere si Ayaserọs), ogwu Midia, ogwu ònikikpulu ido Babilọn,

²me emen adasi acha mkpulu kan̄ ya, emi Danien, nnenifuk inu egebe me Ikpa Mbuban, mè inigobo itet ibe ke jakajaka ebejijaka Jeruselem môbọkọ akọp acha jaaba, igọọk me ikọ Okumugwem otumube inyi Jerimaya ogwu nriran.

³Eya orọ, nnenikana isi lek Ogwukaan̄-ene Awaji, mè ito ito inyi, mè iriaak uriaak, mè ibeek mbeek, mè ijin otu, mè itap ofọnti ufieejit, mè ifuun̄ lek me ntọn̄.

⁴Nrariaak uriaak inyi Okumugwem Awaji n̄a, mè ifuk ijo ebi kiji ibe ikeyi: “Jei Ogwukaan̄-ene, Awaji ogwu òmimin mè ikaan̄ ukpook, owu ogwu òkirọ inyan̄a-ibot kwun̄, mè ikikaan̄ imumechieen̄ mgbọ geelek me lek ebi geelek ìmumun̄ owu me chieen̄, mè ikirọ ikọ owu otọbe,

⁵eji mîrọ ijo inu, mè irọ owu ilọ, mè irọ inu ikpak. Eji mîkpaka ibot inyi owu, mè ijit irọrọ ikọ otọbe, mè ijit si ikan kwun̄.

⁶Eji kpegban̄ utọn̄ inyi ebi nriran kwun̄ ebi ìtutumu ikọ me erieen̄ kwun̄ inyi ebi ubọọn̄ kiji, mè ebi ibot kiji, mè ebi nte nte kiji, mè otutuuk kiji ebi ìluk me ido kiji.

⁷“Ogwukaan̄-ene, owu ìre ogwu ata irọrọ. Ire, me cherekeyi, esip ìjojot eji isi, eji otutuuk ebi Juda mè ebi Jeruselem, mè otutuuk ebi Ijeren, ebi ìkup me mgbet mgbet ere, mè ebi ìkup me ujọn̄ọ ere, me ido geelek ere owu oyiyalabe eji isi igwook, mije mkpaka-ibot eyi eji ekpakabe inyi owu.

⁸Okumugwem, îre eji ke esip ojot isi, eji melek ebi ubọọn̄ kiji, mè ebi ibot kiji, mè ebi nte nte kiji, mije eji mîrọ owu ijo inu.

⁹Ogwukaan̄-ene Awaji kiji ìre ogwu ejit nsan, mè ogwu òkitele ijo inyi ene, ubọk geelek eji ekpakabe ibot inyi ọmọ.

¹⁰Eji kpekigban̄ utọn̄ me ida Okumugwem Awaji kiji, kpekisun̄ si ikan kan̄ echi înyibe eji inan̄a me otu ebi ikwaan̄ kan̄ ebi nriran.

¹¹Otutuuk ebi Ijeren mîkpaka ibot inyi ikan kwun̄, mè igba udun̄ ifit owu, kpekigban̄ utọn̄ me ida kwun̄. “Eya orọ, ifieek-otu melek itip-oyerebet eyi onyan̄abe ibot itoon̄ me lek ya, eyi egebe me emen Ikan kè Mosis ogwu ikwaan̄ Awaji ya îtoon̄ eji me lek, mije, eji mîrọ owu ijo inu.

¹²Owu orọ otutuuk ikọ cha otumube ikeme eji, mè ebi mkpulu kiji iso, ike otumube ibe ke owu môsa ikpele ùrioon̄ inikeme eji. Me otutuuk irak ura yi, ojelek osusut keyi ònunu inyi ebi Jeruselem ìkararak ìkup.

¹³Kubọk egebe me Ikan kè Mosis, otutuuk osusut chi înu inikeme eji, ire, eji kpegwu ikom itele nrọ-nlọ kiji, mè igban̄ utọn̄ me lek atikọ kwun̄, mè iweek ntap-ubọk kwun̄, owu Okumugwem Awaji kiji.

¹⁴Okumugwem îsulu eji osusut ya înen̄ebe isun̄, mije, Okumugwem Awaji kiji ìre ogwu ata irọrọ me inu geelek îkirọ. Ire, eji kpegban̄ utọn̄ me ida kan̄.

¹⁵“Mgbọ keyi, jei Okumugwem Awaji kiji, ogwu òsasa me unye ubọk isan̄a ebi kwun̄ isibi me ido Ijipiti, mè isa me ikeya ikaan̄ ikpele erieen̄ mege inire cherekeyi, eji mîrọ owu ijo inu, mè irọ owu inu ikpak.

¹⁶Jei Ogwukaan̄-ene, mije owu orebe ogwu ata irọrọ, nye lek ben unaan̄-ejit kwun̄, uyok uyok unaan̄-ejit kwun̄ ya, san̄a me lek Jeruselem, ama inyọn̄ ogoon̄ mbuban kwun̄. Mije, Jeruselem melek otutuuk ebi kwun̄ mîkana inu otutuuk ebi ìluk ikana eji ekisa irọ ochak mgbọ geelek, mije ijo inu kiji melek nrọ-nlọ ebi nte nte kiji erọbe.

¹⁷“Mgbọ keyi, owu Awaji kiji, nye lek nọ otutuuk uriaak mè mbeek geelek emi ogwu usun̄ kwun̄ nkibeek me ubọk kwun̄. Mije erieen̄ kwun̄, jei Ogwukaan̄-ene, nye lek kaan̄ ata ejit me lek Uwu Mbuban kwun̄ eyi ejijakabe isan̄a.

¹⁸Jei Awaji, soso rieen̄ utọn̄ gban̄, mè nọ mbeek nkibeek owu. Raan̄ chieen̄ kpọ, mè mun̄ jakajaka ejijakabe eji isan̄a, mè ijijaka si ama ya eyi òkichieek Erieen̄ kwun̄. Mbeek kiji ìkare mije ata irọrọ kiji, kpan̄asi ikeya, eji ekibeek ikpọ me lek ikpele nsan kwun̄.

¹⁹Jei Ogwukaan̄-ene, nye lek gban̄! Jei Ogwukaan̄-ene, soso tele nyi eji! Jei Ogwukaan̄-ene, soso nọ, mè jibi nan̄a keke! Jei Awaji n̄a, mije erieen̄ kwun̄, kafiat mgbọ, mije, îre erieen̄ kwun̄ ke ama kwun̄ mè ebi kwun̄ ekichieek.”

²⁰Nkekiriaak uriaak ya, mè ikifuk ijo n̄a mè ijo ebi ido kiji, Ijeren, mè ikibeek si Okumugwem Awaji n̄a mbeek me ibot orioon̄ mbuban kan̄.

²¹Uriaak ya me otu n̄a nkiriaak, ogwu osat, Geberen, ogwu mmun̄be me emen ilaak ọkpọchieen̄ ya mgbọ òraraka, owuwulu mgbọ yaage inu me lek n̄a me mgbọ uriaak otu ikakwun̄.

²²Geberen ogwu osat onenibe emi, “Danien, ǹnu mgbọ keyi ineninyi owu ifuk-ibot mè ngobo-ntet.

²³Mgbọ yaage owu obenebe ikiriaak uriaak ya, Awaji îfọọk owu otu. Ufọọk-otu ya ke nsa inu inenilook owu, mije, owu ìre ogwu Awaji omabe enenen. Eya orọ, gban̄ etip yi jaan̄, mè tet ibot me lek ilaak ọkpọchieen̄ ya.

²⁴“Danien, akọp nde[8] jaaba ke Awaji otumu ifieek inyi ebi kinyi melek ama mbuban kinyi ibe ìre mgbọ enyi ebesa irọ inu ikpak ire ibot, mè irọ ijo inu ire òta, mè irọ esuuk mije nrọ-nlọ kinyi, mè isa ata irọrọ eyi mgbọ geelek inu, mè ichit ilaak ọkpọchieen̄ melek nriran, mè itọkọ aran̄ me lek Ere Òkup Mbuban Ichit[9] isa igwọk lek ere ya.

²⁵“Riọọn̄, mè gobo tet ibe: Bene me mgbọ enyibe ida ibe ekpọk enama Jeruselem mege isi ire mgbọ Ogwu Etọkọbe Aran̄ Me Ibot ya mônube, môbọkọ nde jaaba, mè akọp nde gweregwen mè nde iba. Mgbọ isikpọk inama Jeruselem, mêbum owuwa oniin̄ me emen, mè irọkọ udọn̄ okwukwek akọn̄ ikat ikana. Ire, inu chi ìbore me mgbọ ogbogbo ufialek.

²⁶Akọp nde gweregwen mè nde iba isiniraka, mêkpakpan̄ Ogwu Etọkọbe Aran̄ Me Ibot ya, kpunu ene geege òbomọnọ irek kan̄. Ogwu ibot mkpulu ge mônanan̄a isibi, ebi akọn̄ kan̄ mênenijijaka ama ya melek Uwu Mbuban ya. Akọn̄ akọn̄ obokup mege ire òta mgbọ, Awaji îwuuk lek itumu ifieek ibe ke owuwa jakajaka môkup.

²⁷Ogwu ibot mkpulu ya mônenirọ inyan̄a-ibot melek owuwa ene otuuk kè nde ge. Me ìkike iba nde ya, môchit ibe ekayaka ìgwa ngwugwa melek ngwugwa akpa geelek me Uwu Mbuban, mè ekayaka ìsa inyinyi kiban̄ ìnu si me Uwu Mbuban. Mgbọ mbuban inu kan̄ môwabe ichit,[10] môneniyik òchichaka inu eyi òkitap mfufiat mege ire òta mgbọ, mgbọ Awaji môchobe ogwu ibot mkpulu ya ifiin̄, ike îtumube ifieek.”