Read obolo Osia 1 Bible Online

Osia 1 - obolo bible

Osia 1

¹Eyi ìre etip Okumugwem ònunu inyi Osia gwun̄ kè Beri me ukot mgbọ Ujaya mè Jotam mè Ayaji mè Ejikaya erebe ubọọn̄ me Juda, mgbọ Jerobuwam gwun̄ kè Jowas orebe ubọọn̄ me Ijeren.

²Mgbọ Okumugwem obenebe itumu ikọ itibi Osia, ìdasi itumu inyi ibe, “Je, si do ogwu enenwaan̄ òje oyet ge me lek nwa, mè bon bọn ugan, mije, me atikọ, ebi ido yi mêkije oyet enenen bak me lek ema etelebe Okumugwem, mè ikibubat ifo lek ebi kè ofifi awaji.”

³Ikeya ke Osia onisi ido Goma gwun̄ kè Dibalayim. Ininin̄ owot, mè iman gwun̄ enerieen̄ inyi.

⁴Okumugwem onenitumu inyi Osia ibe, “Gwen gwun̄ ya Jesereli,[1] mije, ìkpofiin̄ mgbọ, mârọ ibe ebi uwu kè Jewu ekpe ewe eje ebi Jesereli ema ekpan̄be, mâchep si ama ubọọn̄ ebi Ijeren.

⁵Me usen ya, mâfaan̄ ogbaan̄ ebi Ijeren, mè ikpukpuku unye kiban̄ isan̄a kpai me iteke Jesereli.”

⁶Goma okpọkpọk inin̄ owot, mè iman gwun̄ enenwaan̄. Okumugwem otutumu inyi Osia ibe, “Gwen erieen̄ gwun̄ ya Lo-Ruwama,[2] mije, emi m̀kpayaka ikpọk ikaan̄ nsan me lek ebi Ijeren ofifi, m̀kpatetele si ijo kiban̄ kubọk ge.

⁷Ire, mâkaan̄ nsan me lek ebi ido Juda, mè inyan̄a ema sa me unye n̄a, emi Okumugwem Awaji kiban̄. Ìkare ogbaan̄, mè ìre oge akọn̄, mè ìre akọn̄, mè ìre inyinya, mè ìre ebi akọn̄ inyọn̄ inyinya, ke mbasa inyan̄a ema.”

⁸Mgbọ Goma obanbe Lo-Ruwama ebe, imaman ofifi gwun̄ enerieen̄ igọọk.

⁹Okumugwem otutumu inyi Osia ibe, “Gwen gwun̄ ya Lo-Ami,[3] mije, enyi kpere ebi n̄a, emi si ǹkare Awaji kinyi.

¹⁰“Ire, mgbọ me isi, ebi Ijeren mêwa ikup kubọk achiaan̄ agba awaji, eyi kpekikọt itọ, kpekikọt ifuk. Me ere etumube inyi ema ibe, ‘Enyi kpere ebi n̄a,’ ere ya ke mêgwen ema ‘Bọn Awaji òkup me ugwem.’

¹¹Ebi Juda mè ebi Ijeren mêkpọk igbaan̄ ire ge, mè igobo ogwu ibot mkpulu ge inyi lek kiban̄, mè inan̄a isibi me emen ufialek kiban̄, mije, usen Okumugwem môgbanabe Jesereli ìbore ikpele usen enenen.