Read obolo Osia 13 Bible Online

Osia 13 - obolo bible

Osia 13

¹Iferem isitumu ikọ, ebi ene ekiraran; ebi Ijeren mîkimin ọmọ. Ire, ikan itọtọbọ ebum inyi Baali îtet ọmọ, ikwukwu.

²Mgbọ yi, ema ekpọkpọ si ikirọ ijo inu; ema mîsa alata okuket kiban̄ itọkọ mkpọmfaka inyi lek kiban̄, ema etọkọ mkpọmfaka cha igọọk me lek ngobo-ntet kiban̄; otutuuk cha ìre ubọk ikwaan̄ ebi usọ. Ekitumu ikọ ofolek ife chi ibe, “Ema ekigwa ngwugwa ebilene ekigwa, mè ikituun̄ otu me lek mkpọmfaka bọn eriembuuk!”[10]

³Eya orọ, ema mêniniin̄ ichep kubọk àbaan̄ otu ewelegwe, kubọk mbat okpa otu ewelegwe òkigwat lek isibi, mè ininimi ita mgbọ yaage, mè iyiyeek ita kubọk mfufe akpa me ere igen̄ akpa, eyi efet okiben iwut ije, mè itọk ita, kubọk oduku òkitibi me otu nruruk isibi.

⁴“Ire, emi nre Okumugwem Awaji kinyi, karake mgbọ enyi ekupbe me ijọn̄ Ijipiti. Enyi kpeberiọọn̄ ofifi Awaji geege ilọ me lek n̄a, kpunu si Ogwu Unyan̄a geege igak emi.

⁵Emi me lek n̄a mkpukpo enyi me emen èwê, me inyọn̄ ijọn̄ ya òchachat, mè iyok.

⁶Nnyi enyi inorie, owot kinyi ojojot; mgbọ owot ojotbe enyi, enyi egugumu lek, mè iwuuk emi.

⁷Eya orọ, mâchim enyi kubọk egbe àtat, mè ilet me lek oniin̄ kubọk egbe ntọọk ntọọk ikikpọ enyi.

⁸Mâwulu ijeen̄ enyi kubọk ibo nriọk eteen̄be bọn isan̄a me lek, mè igwak ejit kinyi ibook. Mâtaka enyi imeen̄ kubọk egbe àtat; ijo anam oron môtaba enyi igwaka.

⁹“Enyi ebi Ijeren, mîjijaka enyi isan̄a kpai, mije, enyi ejebe ikeme emi, ogwu ntap-ubọk kinyi.

¹⁰Mọmọ achubọk ogwu ubọọn̄ kinyi ya? Inu-nu ininyan̄a enyi me emen otutuuk ama kinyi cha? Mọmọ ebi ibot mkpulu kinyi cha, ebi enyi etumube inyi emi ibe, ‘Nyi eji ogwu ubọọn̄ mè ebi ibot mkpulu?’

¹¹Eya orọ, nsasa me unaan̄-ejit inyi enyi ogwu ubọọn̄, mè isa me uga unaan̄-ejit imọnọ ọmọ isan̄a.

¹²Ijo irọrọ kè Iferem, ebọbọp ititiin̄, ijo inu kan̄, esusun̄ itele.

¹³Ufiak òbet lek ufiak uman înu inyi ọmọ, ire, ọmọ ìre gwun̄ ikakaan̄ge iriọọn̄-inu; mije, mgbọ mgbọ orebe ebeman ọmọ, ìkachieek inanan̄a isibi.

¹⁴“Mânyi inu inwene-ibot isa ibọkọ ọmọ isibi me ubọk ama ekwukwu; mâfaka ọmọ isibi me ubọk mkpa. Jei mkpa, mọmọ ijo orukan̄ kwun̄ cha? Jei ama ekwukwu, mọmọ jakajaka kwun̄ ya? “Chieen̄ n̄a ìkpoyaka imọọn̄ njijin kan̄;

¹⁵ubọk geelek ọmọ okimumana kubọk mbubet me etete ebi ngwan̄ kan̄, efet agan̄ mbum-ura mônu, efet Okumugwem òkinan̄a me emen èwê inu. Udọn̄ mun̄ kan̄ môchiaak ita kpai, ogbuuruk kan̄ môrak isan̄a. Mêbum inin̄ uwu isun̄-inu kiban̄, mè ifum otutuuk inu ubọọn̄ kiban̄ isan̄a kpai.

¹⁶Ebi Sameria mîje ikeme Awaji kiban̄, mije keya, ema mêbọkọ osusut oyerebet òtitip ema. Ema mêkwaan̄ me otu oge akọn̄; mêtọọn̄ asa nsabọn kiban̄ isek okpọkọ okpọkọ, mè ichiin̄ owot ebi nwa-owot kiban̄ ibak.”