Read obolo Osia 2 Bible Online

Osia 2 - obolo bible

Osia 2

¹“Ìgwen ebi ngwan̄ kinyi ebirieen̄, ‘Ebi n̄a,’ mè ìgwen ebi ngwan̄ kinyi ebibaan̄, ‘Mîto nsan.’

²“Ìgana ikọ ìnyi nga kinyi, ìgana ikọ ìnyi ọmọ, mije, ọmọ ìkare nwa n̄a, emi si ǹkare nlom kan̄. Ìtumu ìnyi ibe isan̄a isi òje oyet kan̄ ito, mè isan̄a ejit me lek ebi melek kan̄ ekirọ barabat cha.

³Ire ìkare ikeya, emi mârọ ọmọ ije njak, mè isun̄ ọmọ ukpọk lek kubọk usen emanbe ọmọ; mârọ ọmọ ikup ukpọk ukpọk kubọk emen èwê, mè irọ ọmọ ikana nchat ijọn̄, mè isa urak-ebek mudim ikpan̄ ọmọ.

⁴M̀kpakaan̄ nsan me lek bọn kan̄, mije, ema ìre bọn ugan.

⁵Nga kiban̄ îje oyet, mè inin̄ owot kiban̄ me esip. Ìtumu ibe, ‘Emi mâgọọk ebi ugan n̄a, ebi ìkinyi emi inorie melek mudim, mè ikinyi emi ekwut inwọọn̄ anam melek ekwut lilin̄, mè aran̄ melek miin̄.’

⁶Eya orọ, mâto ukpak ichit oniin̄ kan̄; mâwak ogọ ikwek ọmọ ibia, inyi ikayaka ìmun̄ agan̄ ìbonin̄.

⁷Ọmọ môlibi igọọk ebi ugan kan̄, ire, ìkpolibi itut ema; ọmọ môweek ema, ire, ìkpomun̄ lek kiban̄. Mgbọ ya mônenibe, ‘Mâgwu ikom isi lek adasi nlom n̄a, mije, mgbọ nkupbe melek kan̄, inu înwọn emi me lek igak mgbọ keyi.’

⁸Ọmọ ìkariọọn̄ ibe ke îre emi nnyi ọmọ inu cha; îre emi nnyi ọmọ akpa, mè aya miin̄, mè aran̄, mè ifele alata okuket mè alata araran̄ inyi ọmọ, echi ọmọ okisa ifaka mfaka inyi Baali.

⁹Eya orọ, mâbọkọ akpa n̄a isan̄a mgbọ akpa isikem, mè ibọkọ si aya miin̄ n̄a isan̄a me ibot mgbọ kan̄; mâbọkọ ekwut inwọọn̄ anam n̄a melek ekwut lilin̄ n̄a, echi nnyibe ibe isa ikichit njak kan̄.

¹⁰Mgbọ keyi, mâben njak kan̄ iwele me isi ebi ugan kan̄ cha; kpunu ogwu môkọtbe inyan̄a ọmọ isibi me ubọk n̄a.

¹¹Emi mâchit otutuuk orirọ kan̄: otutuuk ijọk ibot acha kan̄ cha, mè ijọk Aya Onyan̄ kan̄, mè ijọk Usen Mbuban kan̄, òrere otutuuk ijọk cha geelek îkirie me ibot mgbọ me ibot mgbọ.

¹²Emi mâjijaka uko gerep kan̄ mè uko figi kan̄, echi îkisa iriak lek ibe ke îre ebi ugan kan̄ enyi ọmọ me mkpukpe; emi mârọ ebi kè anam oron etaka uko cha egwak eta, mè ikana aka oron.

¹³Emi mâsut ọmọ osusut ikpọ me lek otu ifuk mgbọ eyi ọmọ okisi iwọp nsensi inyi Baali, mè ikitap mkputọn̄ mè inu mbala-lek echi ewuuk unye otu ewe, mè ikikana igọọk ebi ugan kan̄, mè iwuuk emi itele. Emi Okumugwem ntumu.

¹⁴“Eya orọ, kpọ, emi mânileke ọmọ, mè isa ọmọ ije isi emen èwê, mè isa utop otu itumu ikọ itap ọmọ me ejit.

¹⁵Me ere ya, mâyaka uko gerep kan̄ cha inyi ọmọ, mè irọ inyi iteke Akọ[4] ikana otu isotu eyi ikpọchieen̄. Me ere ya, ọmọ môfọọk emi otu kubọk mgbọ îrebe nsabọn ibaan̄, kubọk usen ya ọmọ okinan̄a me Ijipiti isibi.”

¹⁶Okumugwem onenibe, “Me usen ya, owu môgwen emi ‘Nlom n̄a’; owu òkpoyaka igwen emi ‘Nte uwu n̄a.’

¹⁷Emi mânenisan̄a erieen̄ Baali cha isan̄a me otu kan̄; kpebeyaka ikitan̄a erieen̄ kiban̄ cha ofifi.

¹⁸Me usen ya, me ibot kiban̄, emi mânyan̄a ibot melek ebi kè anam oron, melek ebi kè ofut òwulu me inyọn̄, mè inu òkinyinyọnọ me ijọn̄, inyi ekayaka ìkisak ema unan me lek. Akọn̄ mè ogbaan̄ melek oge akọn̄, mâsan̄a isan̄a me lek ijọn̄, inyi ema ekelaak ilaak me utelelek.

¹⁹Emi mâkaan̄ owu me lek nwa ire mgbọ ikafieekge; emi mâkaan̄ owu me lek nwa, sa me ata irọrọ, mè unen oyerebet, mè imumechieen̄ mgbọ geelek, mè nsan.

²⁰Emi mâkeke inye ikaan̄ owu me lek nwa, owu môneniriọọn̄ Okumugwem.”

²¹Okumugwem onenibe, “Me usen ya, emi mâfọọk otu. Iin̄, emi mânyi akpabin inyọn̄ ufọọk-otu, ibe oduku inyọn̄ iduku, akpabin inyọn̄ mônenifọọk ijọn̄ otu ibe ibot irep igwook me ijọn̄.

²²Ijọn̄ mônenifọọk otu ibe akpa itibi, mè aya miin̄ melek aran̄ egbuk esibi, akpa mè aya miin̄ mè aran̄ mênenifọọk Jesereli otu.

²³Mgbọ ya, emi mâneniwop ebi Ijeren me lek ijọn̄ yi inyi lek n̄a; ogwu ngwenbe ‘Kpunu nsan,’ mâkaan̄ ogwugwa nsan me lek; ebi ngwenbe ‘Kpere ebi n̄a,’ mâtumu inyi ema ibe, ‘Enyi ìre ebi n̄a;’ ema mêbebe, ‘Owu ìre Awaji kiji.’ ”