Read obolo Juwen 1 Bible Online

Juwen 1 - obolo bible

Juwen 1

¹Eyi ìre etip Okumugwem ònunu inyi Juwen gwun̄ kè Petuwen.

²Enyi ebi ugane ama, ìnọ ikọ keyi, enyi otutuuk ebi ìluk me lek ijọn̄, ìgban̄. Ìre inu òkup ikeyi îrak irọ me ukot kinyi, mè ìyaka ire ukot ebi nte nte kinyi?

³Ìkpa inu ofolek ìnyi bọn kinyi, mè bọn kinyi ekpa si enyi bọn kiban̄, inyi bọn kiban̄ mêkpa inyi ebi ukot ògọgọọk.

⁴Inu akaka ituuk òsọp inu otakabe isik, akaka ituuk òkije me urum înitaka; inu akaka ituuk òkije me urum otakabe isik, bọn akaka ituuk înitaka; inu bọn akaka ituuk otakabe isik, akaka ituuk òkitaka inu ikọọk înitaka isan̄a.

⁵Enyi ebi usa-miin̄, ìnan̄a ìkeke me ilaak ìto ito; otutuuk kinyi ebi ìkinwọ miin̄, ìfieek ejit; mije, utop utop aya miin̄ ìkpoyaka ire enyi ebek, mîsik ibọkọ isan̄a enyi me otu.

⁶Ido ge ònyenye lek mè ikaan̄ ene iwa ire lek kperiọọn̄ otu ifuk, îra ijibi inin̄ me lek ijọn̄ n̄a ibonitim akọn̄; ejeek îkaan̄be ìreke kubọk ejeek egbe àtat, ujọn̄ọ otu ejeek kan̄ ìbet lek ejeek uman egbe àtat.

⁷Îkpukpuku olik gerep n̄a igwook, mè ijijaka uti figi n̄a isan̄a kpai. Îkwat ikpọk udun̄ kiban̄ isan̄a itọọn̄ ifiin̄, otutuuk agọọk kiban̄ ìyaka inire okuket lek okuket lek.

⁸Ìfieek ejit kubọk obaak enenwaan̄ òtobo ekwut ufieejit, mè ikito ito mkpa gwun̄ enerieen̄ òtetet ọmọ itele ibodo me mgbọ nsabọn ibaan̄ kan̄.

⁹Ngwugwa akpa mè ngwugwa miin̄ îfieek ibaak, ìkayaka ìre isotu Uwu Mbuban Okumugwem; ebi ngwugwa, ebi ìkisi ikwaan̄ inyi Okumugwem, ekup me ufieejit.

¹⁰Uko îfiat isan̄a kpai, ijọn̄ me lek kan̄ ìkup me ufieejit; akpa îjijaka ita kpai, aya miin̄ îchat isan̄a, ìkayaka ìkup, aran̄ si îta, ìkayaka ìsibi.

¹¹Enyi ebi uko, ìfieek ejit; enyi ebi ìkiwop gerep, ìto ito, ìfieek ejit me lek akpa wit mè akpa balì, mije, otutuuk inu eberọkọ me uko îjijaka isan̄a.

¹²Olik gerep îchiaak ita kpai, uti figi îkwu; ebi kè pomegaranet, mè asaak mè apulu, mè otutuuk uti geelek me uko îchiaak ita. Me atikọ, inu òkinyi ebilene unwọọn̄ îkwaan̄ ita kpai.

¹³Enyi ebi ngwugwa, ìtobo ekwut ufieejit, mè ifieek ejit; enyi ebi ìkisi ikwaan̄ me isi ntook, ìto ito. Enyi ebi ikwaan̄ Awaji n̄a, ìsa ofọnti ufieejit me lek ìna, ìnikup ìfieek ejit otutuuk eririeen̄; mije, mîtet ngwugwa akpa mè ngwugwa miin̄ ikaan̄, ìkayaka ìre isotu uwu Awaji kinyi.

¹⁴Ìnyi otu ibe enin̄ ijin-otu òkup mbuban, ìgwen ntitiin̄ òkup mbuban, ìgween̄ ebi ugane ama, mè otutuuk ebi ìluk me lek ijọn̄, ìbe ema enu me Uwu Mbuban Okumugwem Awaji kinyi, mè ìtaan̄ ukpo ìnyi Okumugwem.

¹⁵Mije, usen oyerebet Okumugwem îta me ubọk; ìbonu kubọk usen mfufiat ònan̄a me ubọk Ogwu Òkaan̄ Unye Geelek. Urimi usen ya, kpunu ojelek kan̄!

¹⁶Me chieen̄ kiji gaalek, mîfieek inorie isan̄a, mè itap eji me uraafiọọn̄; unwọọn̄ me ubelejit îsibi ita me emen uwu Awaji kiji.

¹⁷Ukwuuk uti îchiaak isan̄a me emen nchat okpukpuk achiaan̄ ere ewopbe; uwu isun̄-mfut îgwak igwook, uwu isun̄-akpa îgbugbọ irọn̄, mije, akpa îkwaan̄ ita kpai.

¹⁸Ebi kè anam uwu mêkitaan̄ ukpo uyọt uyọt! Urum eriembuuk mêkinyinya ikana, mije, kpunu mbubet ema ekitaka; urum arọọn̄ si mêkibọkọ ukwook.

¹⁹Jei Okumugwem, îre owu ke nkigwen, mije, ukan̄ îtaka mbubet emen èwê isan̄a, alọm ukan̄ îrie otutuuk uti geelek òkup me oron isan̄a kpai.

²⁰Ebi kè anam oron si, mêkitaan̄ ukpo igween̄ owu, mije, mun̄ okolo geelek ìchachiaak ita, ukan̄ îtaka mbubet emen èwê isan̄a kpai.