Read obolo Juwen 2 Bible Online

Juwen 2 - obolo bible

Juwen 2

¹Ìwut otita me Sayọn; ìtaan̄ ukpo ìriki ere me ogoon̄ mbuban n̄a. Tele ebi ìluk me otutuuk lek ijọn̄ ekeran; mije, usen oyerebet Okumugwem òkinu, îtata me ubọk.

²Usen ya ìbore usen udun mè usen ugwuuk, usen oduku inyọn̄ obobaan̄ ichit isinyọn̄, ere môkpọkpọ ichọkọ idun. Ikpele urum akọn̄ ònyenye lek mônu, kubọk utoon̄ egwe okitoon̄ inyana isaba ogoon̄ igwook. Mbet keya ìkararak ìkup me ukot ikaan̄, ìkaboyaka ikukup si me ukot echi òbonunu.

³Ukan̄ òkitataka inu iriọọk okije ema me isi, sà alọm ukan̄ òkisasak okigọọk ema me udun̄. Sabum ema eninu, lek ijọn̄ ìjaan̄ kubọk uko Iden; me udun̄ kiban̄, lek ijọn̄ îkana èwê ejijakabe igwook, inu geege ìkanwọnọ ema me ubọk.

⁴Ema ekup kubọk inyinya, mè ifet ukot ekot kubọk ebi akọn̄ inyọn̄ inyinya.

⁵Ema ekitatama isaba inyọn̄ ibot ogoon̄, mè ikikput kubọk ekpirikpo uji akọn̄, mè ikikpam kubọk ukan̄ ònin̄ lek nchat oron, mè ibet lek urum akọn̄ ònyenye òkeke me onineen̄ akọn̄.

⁶Ebilene itoon̄ chieen̄ me lek kiban̄, èbene èkeran, isi ene onwene òkup nreren̄ nreren̄.

⁷Ema ekinin̄ inu kubọk ebi akọn̄ ekinin̄ akọn̄, mè ikiwulu isaba mgban ama kubọk ebi akọn̄. Ema otutuuk ekijeje itat me onineen̄, ge ìkaje ìkọọn̄ me lek akpat ukot ije kiban̄.

⁸Ge ìkaje ìtọbọ ge, ogwu ikup, ìtetet isi kan̄ itat me lek oniin̄ ije kan̄. Ikerere ema enanan̄a irọn̄ me otu nroon̄ akọn̄, ema kpekiyaka ikeke.

⁹Ema ekibum inin̄ ama me unye, mè ikilibi me inyọn̄ mgban ama, mè ikinene itibi otu nruruk kubọk ebi inọ ininin̄ ijot emen uwu.

¹⁰Ema isikinu, inyọn̄ ijọn̄ ìkisisisik, isinyọn̄ îra ikinyen̄e, ura mè onyan̄ îra idun, ebi kè ntoronyan̄ kpeyaka ikitoon̄ ere.

¹¹Okumugwem îsook ida me isi urum akọn̄ kan̄; mije, urum akọn̄ kan̄ kpekọt ifuk otu ifuk; ebi ìkirọ inu îtọbe ibe erọ ìre ebi unye. Usen oyerebet Okumugwem îmin enenen, mè ikup si nriki nriki. Ìre ekene obokọt ikeke ida?

¹²Okumugwem ìkitumu ibe, “Ikerere mgbọ keyi, ìgwu ìkom ìna me lek n̄a me otutuuk ejit kinyi; ìjin otu, mè ìto ito, mè ìfieek ejit.”

¹³Ikagwak ofọnti kinyi me ufieejit, kpan̄asi ikeya, ìgwak ejit kinyi, mè ìgwu ìkom ìna me lek Okumugwem Awaji kinyi; mije, ọmọ ìre ogwu ata ejit mè ogwu ejit nsan, ìkakigwat lek ìnaan̄ ejit, ire, ìjojot me imumechieen̄, mè ikitele ùrioon̄ ìbosa ikeme ene.

¹⁴Ekene oriọọn̄, usini mgbọ, ọmọ mônwene ejit, mè ikaan̄ enyi njijin me lek, mè inyi enyi ugbana kan̄, inyi enyi ekọt egwa ngwugwa akpa mè ngwugwa miin̄ enyi ọmọ Okumugwem Awaji kinyi.

¹⁵Ìwut otita me Sayọn, ìnyi otu ibe enin̄ ijin-otu òkup mbuban, ìgwen ntitiin̄ òkup mbuban.

¹⁶Ìtitiin̄ ebi ene, ìgbama lek ebi ogbo ntitiin̄ ya; ìgbaan̄ ebi ugane ìtitiin̄, mè ìtitiin̄ si nsabọn, mè ìtitiin̄ ebi ìkinwọ ebe ìgbaalek. Olom òdo nwa ayaya isibi me agwut kan̄ inu, nwa òbat olom ayaya isibi si me agwut kan̄ inu.

¹⁷Kè ebi ngwugwa, ebi ìkisi ikwaan̄ me isi Okumugwem, ekup eto ito me etete ọfọ Uwu Mbuban melek ntook. Ema etumu ebe, “Jei Okumugwem, kaan̄ nsan me lek ebi kwun̄. Kachieek ibe esip itet ebi ìrere ìrot kwun̄, mè ema ekana inu ochak enyi ebi ofifi ido. Kachieek ibe ebi ofifi ife ekedo eji otu ibe, ‘Mọmọ Awaji kiban̄ ya?’ ”

¹⁸Mgbọ ya, Okumugwem mônenikaan̄ mba-ejit me lek ijọn̄ kan̄, mè ikaan̄ njijin me lek ebi kan̄.

¹⁹Okumugwem môfọfọọk ebi kan̄ otu ibe, “Emi gwa ǹkiria akpa mè aya miin̄ mè aya aran̄ ijet enyi, eyi môsobe enyi òjot òjot. M̀kpayaka ikpọk irọ enyi ekana inu ochak, me etete ebi ofifi ido mgbọ geege.

²⁰Emi mâlilaba urum akọn̄ agan̄ inyọn̄ ijọn̄ọ ere me lek kinyi; mârieen̄ ema isi igwook me lek nchat ijọn̄ eyi inu ìkakitibi. Ebi ìje me agan̄ isi kiban̄ ke mbarieen̄ ifo okwaan̄ Uchi me agan̄ mbum-ura, sà ebi ìje me agan̄ udun̄ kiban̄ ke mbarieen̄ ifo okwaan̄ Mediterenia me agan̄ ichep-ura. Ijo olu nkwukwu kiban̄ môkekidun̄u ifo inyọn̄, njijọ olu kiban̄ môjibi ibene, mije, Okumugwem îrọ owuwa ikpele inu.”

²¹Owu, ijọn̄, kafieek owot; bele ejit, mè nwọọn̄ unwọọn̄, mije, Okumugwem îrọ owuwa ikpele inu.

²²Enyi, ebi kè anam oron, ikayaka ìfieek owot, mije, inwan̄ oron emen èwê òkisek. Ebi kè uti mêkito mfut kiban̄, uti figi mè olik gerep mêkito mfut ideke me lek.

²³Enyi ebi Sayọn, ìbele ejit, ìnwọọn̄ unwọọn̄ me emen Okumugwem Awaji kinyi, mije, sa me ata irọrọ kan̄, înyi enyi ibot aya otu ibot. Îria ibot owuwa owuwa ijet enyi; înyi enyi ibot aya otu ibot mè ibot aya otu ura, kubọk îwuukbe lek ikirọ.

²⁴Akpa môjot ere igen̄ akpa gboi, aya miin̄ mè aya aran̄ ìbojojot ogbokot ififini.

²⁵“Otutuuk inu akaka ituuk otakabe isan̄a me uko kinyi otutuuk acha cha, emi mâkpe enyi useen̄. Otutuuk akaka ituuk cha: echi òkije me urum, mè bọn akaka ituuk, mè akaka ituuk òkitaka inu ikọọk, mè akaka ituuk òsọp inu, ema ere ikpele urum akọn̄ n̄a nriabe itap enyi me lek.

²⁶Enyi mêkaan̄ owuwa inorie ikirie ijot owot, mè ikitọn̄ erieen̄ Okumugwem Awaji kinyi, ogwu òrọrọ uyeke inu inyi enyi. Esip ìkpoyaka ikpọk itet enyi ebi n̄a ofifi, mege ire mgbọ geelek.

²⁷Enyi mêneniriọọn̄ ibe ke emi òwa me etete ebi Ijeren, ke emi nre Okumugwem Awaji kinyi, kpunu ofifi. Esip ìkpoyaka ikpọk itet enyi ebi n̄a ofifi, mege ire mgbọ geelek.

²⁸“Mgbọ eya isiraka, emi mâria Ekwukwu n̄a igwook me lek otutuuk ebilene. Mgbọ ya, bọn ebirieen̄ kinyi mè bọn ebibaan̄ kinyi mêkiben nriran, ebi ugane ebirieen̄ kinyi mêkimumun̄ ilaak, nsabọn irieen̄ kinyi mêkekimun̄ ilaak ọkpọchieen̄.

²⁹Ikerere ebi usun̄ ebirieen̄ mè ebibaan̄, emi mâgwook si Ekwukwu n̄a me lek kiban̄ me mgbọ ya.

³⁰Mârọ inu mgbugbo me isinyọn̄, mè irọ si me inyọn̄ ijọn̄; eje môgbọọk, ukan̄ môtaka ere ikọọk, oduku môkekibumu ifo inyọn̄.

³¹Ura môgwu ikom ikana udun, onyan̄ môgwu ikom ikup eje eje. Otutuuk inu chi môrọ sabum usen oyerebet Okumugwem ya ònonu, òrere ikpele usen, mè usen urimi.

³²Ogwu geelek ògwegwen erieen̄ Okumugwem iweek unyan̄a, ogwa obonwọnọ, mije, me inyọn̄ ogoon̄ Sayọn mè Jeruselem ke unyan̄a obokup, kubọk Okumugwem otumube. Unyan̄a ya ìbokup inyi ebi ìbesisik, ebi Okumugwem ogwenbe.”