Read obolo Emọs 2 Bible Online

Emọs 2 - obolo bible

Emọs 2

¹Okumugwem ìtumu ibe ikeyi: “Mije owuwa ijo inu ebi Mowabu erọbe mè ikpọk irọ, emi m̀kpatele inanaan̄ ejit me lek kiban̄. Bak me lek ema ewọpbe ukwuuk ogwu ubọọn̄ Edọm iriọk ikana ntọn̄,

²mâria ukan̄ itap me Mowabu, eyi môtakabe uwu mgban akọn̄ kiban̄ cha òkup me ama Keriyot iriọk. Ebi Mowabu ebekwaan̄ me emen okput akọn̄ ya, mgbọ ukpo môkibọn̄, otita môkekitaan̄.

³Mâkpan̄ ogwu ubọọn̄ kiban̄, mè ikpan̄ si otutuuk ebi ibot mkpulu kiban̄ igbaalek. Emi Okumugwem ntumu.”

⁴Okumugwem ìtumu ibe ikeyi: “Mije owuwa ijo inu ebi Juda erọbe mè ikpọk irọ, emi m̀kpatele inanaan̄ ejit me lek kiban̄. Bak me lek ema ejitbe Ikan Okumugwem, mè ijit si irọrọ orọmijọn̄ kan̄, mije awaji ataak ataak cha ebi nte nte kiban̄ eriaakbe esabe ema ije ilọ oniin̄,

⁵mâria ukan̄ itap me ido Juda, eyi môtakabe uwu mgban akọn̄ ama Jeruselem iriọk.”

⁶Okumugwem ìtumu ibe ikeyi: “Mije owuwa ijo inu ebi Ijeren erọbe mè ikpọk irọ, emi m̀kpatele inanaan̄ ejit me lek kiban̄. Bak me lek ema enyambe ebi ata irọrọ ibọkọ ikpoko alata okuket, mè inyam ebi ugbọọn̄ ibọkọ ikpukot.

⁷Ema ekijak ibot ebi ugbọọn̄ itap me achiaan̄ ijọn̄, mè ijit isisibi unen oyerebet inyi ebi ekifeen̄. Ute mè gwun̄ ekigbaan̄ igan gwun̄ nsabọn ibaan̄ yaage, mè isa me ikeya ichaka mbuban me lek erieen̄ mbuban n̄a.

⁸Ekwut ebi ugbọọn̄ esabe ifọọk ema ikpoko me ubọk ke ema esa ikito ilaak me isi ntook ngwugwa yọk kiban̄ geelek. Miin̄ ema efieekbe inyi ene me oyerebet ke ema ekinwọ me emen uwu awaji kiban̄.

⁹“Emi me lek n̄a mkpan̄ ebi Amọ isan̄a mgbọ ema ekinu, ife ìjijijọn̄ kubọk uti olik, mè inye lek kubọk uti ilip. Ǹjijijaka mfut me inyọn̄ ibot kiban̄, mè ijijaka ugwun̄-ijọn̄ me irak kiban̄.

¹⁰“Emi me lek n̄a nsan̄a enyi isibi me ido Ijipiti, mè isa enyi ije me emen èwê akọp acha ini, inyi enyi enebọkọ ijọn̄ ebi Amọ esak.

¹¹Emi ngobo usini me lek bọn ebirieen̄ kinyi isa irọ ebi nriran, mè isa usini me lek nsabọn irieen̄ kinyi irọ ebi ìfaka lek isun̄ esese inyi Awaji. Jei ebi Ijeren, ìre ìkare ikeya ni? Emi Okumugwem ntumu.

¹²Ire, enyi mîbieen̄ ebi ìfaka lek isun̄ esese cha itap me lek miin̄, mè itọ inyi ebi nriran cha ibe ekaben nriran.

¹³“Ìkpọ, mâkikene enyi ukot ije, kubọk akpa esọpbe itap ijot uji ekpirikpo okisa ulobo kan̄ ikeme uji ekpirikpo, inyi ikakọt ìje ìgwat ukot.

¹⁴Mgbọ ya, ebi mfufet ukot kpebekọt ilibi inwọnọ, ebi unye kpebekaan̄ unye isa ikeke ida, ogwu usọ akọn̄ ìkpokọt inyan̄a ebek ugwem kan̄.

¹⁵Ogwu òsook oraan̄ ìkpokọt ikeke isook oraan̄, ogwu akọn̄ òfet ukot ekot ìkpokọt ilibi inwọnọ, ogwu òkọp me inyọn̄ inyinya ìkpokọt ilibi inan̄a inyan̄a ebek ugwem kan̄.

¹⁶Ikerere ogwu ònyenye lek ichit me etete ebi usọ akọn̄, ìbolibi njak njak me usen ya. Emi Okumugwem ntumu.”