Read obolo Emọs 5 Bible Online

Emọs 5 - obolo bible

Emọs 5

¹Enyi ebi Uwu kè Ijeren, ìgban̄ ikọ keyi, eyi nkikọt me okwa ito ibak enyi.

²“Ijeren òbet lek obaak enenwaan̄ înan̄a irọn̄, ìkpoyaka inan̄a ikeke ofifi. Mîjit ọmọ itele me inyọn̄ ijọn̄ kan̄ gaalek; kpunu ogwu òbobene ọmọ igwuun̄.”

³Mije, Ogwukaan̄-ene Okumugwem ìtumu ibe ikeyi: “Ama òsan̄a obop ene iria akọn̄ me ibot ebi Ijeren, efit ene gaalek ebesik; ama òsan̄a efit ene iria, akọp ene gaalek ebesik.”

⁴Okumugwem ìtumu inyi ebi Ijeren ibe ikeyi: “Ìweek emi, mè ìgat ugwem.

⁵Ikaweek Beten, ama isi yọk cha okupbe, ikasisi si ama Giligan ìsi ìfaka mfaka, ikaben ije ìje ìsi ama Bieseba. Mije mêkpulu ebi Giligan me akọn̄; Beten môchep dìp dìp.”

⁶Ìweek Okumugwem, mè ìgat ugwem! Ire ìkare ikeya, ọmọ môseme kubọk ukan̄ itaka uwu kè Josefu iriọk; mè itaka si Beten iriọk, kpunu ogwu òbokọt iniin̄ ukan̄ ya.

⁷Enyi ebi ìgwugwu unen oyerebet ikom ikana ujat, mè itọp ata irọrọ ito me ijọn̄,

⁸ìriọọn̄ ibe ke îre Okumugwem orom ebi kè Nga Ntoronyan̄ mè Ntoronyan̄ Ubọọn̄; îre ọmọ orọ ekpuk udun ikana utoon̄ ewelegwe, mè irọ egwe idun ikana eririeen̄; ọmọ okitaba mun̄ òkup me okwaan̄, mè òben ògbuku ogwook me inyọn̄ ijọn̄ kubọk ibot; Okumugwem ore erieen̄ kan̄.

⁹Ọmọ okijijaka ebi unye isan̄a mgbọ yaage kubọk ukan̄, mè ikpukpuku ama mgban akọn̄ igwook ikana ǹrioon̄.

¹⁰Ema ekicha ogwu òkikan̄ inu me uwu oyerebet, mè ikikpọ ogwu òkitumu atikọ isiki chieen̄.

¹¹Enyi ekitutuku ebi ugbọọn̄, mè ikibọkọ otitip me ibot akpa kiban̄. Eya orọ, uwu ewuuk cha enyi enamabe, enyi kpebeluk me emen; ujuja uko gerep cha enyi ewopbe, enye kpebenwọ miin̄ òsibi me lek.

¹²Mije, emi nriọọn̄ ibe ke nrọ-nlọ kinyi îwa, ke ijo inu kinyi si îmin enenen. Enyi ekitutuku ebi ata irọrọ ibọkọ ikpoko udun̄, mè ikijit ebi ugbọọn̄ unen oyerebet kiban̄ me uwu oyerebet.

¹³Eya orọ, me mgbọ òkup ikeya, ogwu òriọọn̄ lek ìkakisan̄a amọn, mije, mgbọ ya ìre ijo mgbọ.

¹⁴Ìweek ata inu, ikaweek ijo inu, inyi enyi egat ugwem. Mgbọ ya, Okumugwem Awaji Ogwukaan̄ Inyọn̄ mè Ijọn̄ môkup melek kinyi, ike enyi etumube ibe ke ọmọ òwa.

¹⁵Ìcha ijo inu, mè ìma ata inu; ìtet unen oyerebet ìnye me uwu oyerebet. Usini mgbọ, Okumugwem Awaji Ogwukaan̄ Inyọn̄ mè Ijọn̄ môkaan̄ nsan me lek ebi ìsisik me owot iman kè Josefu.

¹⁶Eya orọ, Ogwukaan̄-ene, Okumugwem Awaji Ogwukaan̄ Inyọn̄ mè Ijọn̄ ìtumu ibe ikeyi: “Mêto ito ufieejit me otutuuk oyet ama geelek, me otutuuk lek oniin̄ geelek, ebi ene mêkitaan̄ ukpo, ‘Jei! Jei!’ Mêgween̄ ebi ikwaan̄ uko ititiin̄ ibe eneto ito ufieejit, mè igween̄ ebi usọ okwa igwook ibe enenin̄ uwu ito.

¹⁷Ito ufieejit môkitaan̄ me emen otutuuk uko gerep geelek, mije, emi mâje itibi etete kinyi. Emi Okumugwem ntumu.”

¹⁸Môfieek inyi enyi ebi ìkiweek ibe usen oyerebet Okumugwem inu! Keke orọ enyi ekiweek ibe usen oyerebet Okumugwem inu? Usen ya ìbore usen udun inyi enyi, ìkpore usen utoon̄.

¹⁹Ìbokup kubọk ene olibi inwọnọ egbe àtat, mè iyaka inichichini me lek ibo nriọk; ìbokup si kubọk ene ogwu òninin̄ uwu kan̄, mè iyaka ubọk ibieen̄ me agba uwu, ijijinu okukup me agba uwu ya ilom ubọk kan̄.

²⁰Me atikọ, usen oyerebet Okumugwem ìbore usen udun, ìkpore usen utoon̄; ìbore usen atalek ekpuk udun, eyi nyininyini utoon̄ ìkpokukup me emen.

²¹Okumugwem, ogwu erieen̄ kan̄ orebe Awaji Ogwukaan̄ Inyọn̄ mè Ijọn̄ ìtumu ibe ikeyi: “Ijọk acha kinyi cha enyi ekirie, emi ǹchacha igo, ìkijọjọ emi ejit; ntitiin̄ mbuban kinyi cha, emi ǹkayaka ìdo.

²²Ikerere ngwugwa ewọwọp mè ngwugwa akpa ke enyi egwa inyi emi, m̀kpabọbọkọ. Ikerere eriembuuk òmimiin̄ ufuk ke enyi esa igwa ngwugwa esuuk inyi emi, m̀kpayayaka chieen̄ ikpọ.

²³Ìben okput okwa kinyi cha ìsan̄a emi me utọn̄; ida okwa uneen̄ kinyi cha, m̀kpayaka igban̄.

²⁴Kpan̄asi echicha, ìtele me unen oyerebet igbọọk kubọk mun̄, mè ata irọrọ igbuk kubọk ogbuuruk eyi ìkakirak!

²⁵“Enyi ebi uwu kè Ijeren, ǹdo enyi nu, otutuuk akọp acha ini enyi ekupbe me emen èwê, ìre enyi mîgwa ngwugwa ewọwọp mè echi kpewọp inyi emi?

²⁶Ìre ìkare Sikut ogwu ubọọn̄ kinyi ke enyi ekibeme, mè ikibeme si Kiyun, mkpọmfaka kinyi, mè ebi kè awaji ntoronyan̄ kinyi cha, echi enyi me lek kinyi erọbe inyi lek kinyi?

²⁷Eya orọ, mârọ ibe ekpulu enyi me akọn̄ echon ejọn̄ọ ere eraka Damasikọs.”