Read obolo Emọs 6 Bible Online

Emọs 6 - obolo bible

Emọs 6

¹Môfieek inyi ebi ìkikpọ inu chieen̄ chieen̄ me Sayọn, mè ebi ìkup me ogoon̄ Sameria ikitoon̄ ejit ibe mfat ìkpofat ema, enyi ebi ìsisibi isi me ido òkup me isi isi me etete ido geelek, enyi ebi ebi Ijeren ekinu lek inikiweek ntap-ubọk!

²Ìje ìsi Kaline, mè ìsi ìkpọ ubọk îkupbe, ìnan̄a me ere keya ìsi ama ile ya òre Amat, mè ìraka ìsibi ìsi Gat òkup me Filisia. Ìre ebiba mînwọn igak ido iba kinyi chi? Ìre ijọn̄ kiban̄ îmin igak eyi kinyi?

³Enyi ekibe ke usen mfufiat ìkponu, ire, mè ikirọ inu òkitaba mkpulu afa igbet.

⁴Enyi ekilaak me inyọn̄ mkpilaak oduuk eniin̄, mè ikiyat lek iwele ichit inyọn̄ mkpilaak kinyi; enyi ekitaka bọn arọọn̄ òjajaan̄ lek ichit me etete urum arọọn̄, mè eriembuuk egwookbe imiin̄ ufuk me uwu isun̄ anam.

⁵Enyi ekilọbọ uneen̄ itaan̄ ukpo ikọt okwa geelek ònin̄ enyi otu, mè ikisan̄a nkwukwak isibi kubọk Debit.

⁶Enyi ekitap miin̄ ijot ewop inwọ, mè ikiken aran̄ echi òre atata ichit, ire, enyi kpefieek ejit me lek uwu kè Josefu, eyi ejijakabe ikana ǹrioon̄.

⁷Eya orọ, enyi mêre adasi ebi ebekpulu me akọn̄ ifo, utop otu melek irerie ugwem kinyi cha môtata.

⁸Okumugwem Awaji Ogwukaan̄ Inyọn̄ mè Ijọn̄ ìtumu ibe ikeyi: “Ogwukaan̄-ene Okumugwem îsa lek kan̄ inyan̄a ibot ibe, “ ‘Emi njọ ejit me lek ugumulek ebi uwu kè Jekọp, mè icha si uwu mgban akọn̄ kiban̄. Emi mâyaka ama yi mè otutuuk inu òkup me emen inyi ebi ochicha kiban̄.’

⁹“Ire akọp ene isik me uwu ge, ema si mêkwaan̄.

¹⁰Ire ngwan̄ kiban̄ ge ogwu òboniwọp nkwukwu ene inu inenibeen̄ ema isibi me uwu, mè inido ene ge me agan̄ emen emen uwu ya ibe, ‘Ìre îkaan̄ ofifi ene melek kwun̄ ekupbe?’ Ene ya môbebe, ‘In̄-in̄.’ Ogwu òdo ikọ ya mônenibe, ‘Chit otu, inyi ekabak erieen̄ Okumugwem!’ ”

¹¹Mije, kpọ, Okumugwem môninyi ida, uwu geelek òmimin, ebetọtọbọ ibak okpọkọ okpọkọ, uwu geelek òsisip, ebesesek asabọn asabọn.

¹²Ìre inyinya ìkekilibi ekot me inyọn̄ ewuuk? Sà ìre ekekisa eriembuuk ibak ijọn̄ uko me inyọn̄ ewuuk? Ire, enyi mînwene unen oyerebet ikana ibọk, mè inwene mfut eyi ata irọrọ ikana ujat inu.

¹³Enyi ekibele ejit me lek ama Lo-Deba[2] enyi etimbe ikpan̄, mè ikibe, “Ìre ìkare sa me unye kiji ke eji etim akọn̄ ibọkọ ama Karanayim?”

¹⁴Okumugwem Awaji Ogwukaan̄ Inyọn̄ mè Ijọn̄ ìtumu ibe, “Jei ebi uwu kè Ijeren, ìkpọ, emi mâjibi ido ge ibene, eyi òbonitim akọn̄ me lek kinyi, ema mêtutuku enyi, ibene me Lebo Amat me agan̄ inyọn̄ isi igwook me iteke Araba me agan̄ osiki.”