Read obolo Emọs 8 Bible Online

Emọs 8 - obolo bible

Emọs 8

¹Ogwukaan̄-ene Okumugwem onenijeen̄ emi ofifi ilaak ọkpọchieen̄. Me emen ilaak ya, mmun̄ okwun ge mfut uti òreren̄e ojotbe emen.

²Inenido emi ibe, “Emọs, òmun̄ keke?” Mfọfọọk ibe, “M̀mun̄ okwun mfut uti òreren̄e.” Okumugwem oneniyaka ibe emi: “Ijo inu ebi n̄a, ebi Ijeren, îra iren̄e ire lek mâsulube ema osusut, m̀kpayaka itele inyi ema ofifi.

³“Me usen ya, okwa ito okwa ito ke ebibaan̄ ebi ìkikọt okwa me uwu ogwu ubọọn̄ ebekikọt.[3] Nkwukwu ene nkwukwu ene oboyiyala ikana ijot otutuuk ere. Otutuuk ere ìbokup yiràk, kpunu ogwu òbosan̄a amọn. Emi Ogwukaan̄-ene Okumugwem ntumu.”

⁴Ìgban̄ ikọ keyi, enyi ebi ìkijak ebi una me ukot, mè ikijijaka ebi ijo irek ìkup me lek ijọn̄ isan̄a.

⁵Enyi ebi ìkibe, “Ijọk Aya Onyan̄ irọ mè ita ma, inyi eji enyam akpa; Usen Mbuban irọ mè iraka ma, inyi eji esa akpa wit esibi ewe, inyi eji egele inu me lek otitọ, mè ekesa otitọ ngan efeen̄ ene, mè esa me ikeya ekaan̄ ikpoko ewa,

⁶inyi eji esa ikpoko elep ebi ugbọọn̄, mè esa ukot ikpukot iba elep ebi una, mè enyam mfurufu akpa kubọk akpa wit.”

⁷Okumugwem, òrere Ugumulek kè Jekọp, îsa lek kan̄ inyan̄a ibot ibe: “Mege ire mgbọ geelek, emi m̀kpawuuk inu ema erọbe.

⁸“Me atikọ, ijọn̄ ìkpolọlọ isisisik bak me lek inu yi ema erọbe, otutuuk ebi ìluk me lek ijọn̄ yi kpebelọlọ ifefieek ejit. Otutuuk lek ijọn̄ môwuku kubọk okwaan̄ Nali obaak imeen̄ ere; mè ifuku ikana, mè igele isiki, kubọk okwaan̄ ebi Ijipiti.”

⁹Ogwukaan̄-ene Okumugwem ìtumu ibe ikeyi: “Me usen ya, emi mârọ inyi ura inim me ejit ikarek, mè irọ ibe linyọn̄ idun me egwe usen ura.

¹⁰Mârọ mgbọ ijọk kinyi ikana mgbọ ufieejit, mè okwa unwọọn̄ kinyi ikana okwa ito. Mârọ otutuuk kinyi ekwun ekwut ufieejit, mè ikwọkọ ijeek irak enyi me ibot. Mârọ ufieejit ya ibet lek ufieejit gwun̄ ibot ge òkwukwu. Òta usen ufieejit ya ìbore usen ujat.”

¹¹Ogwukaan̄-ene Okumugwem îtumu si ibe ikeyi: “Usen òkinu, mgbọ mâriabe akan̄ itap me lek ijọn̄ yi, ìkare akan̄ inorie, ìkarere si urak-ebek mudim. Ire, ìbore akan̄ eyi una inọnọ ikọ Okumugwem.

¹²Ebi ene mêkikọp ikana inyọn̄ isi mun̄ inan̄a me okwaan̄ ile ge isi ire ofifi, mè ikinyinya inan̄a me agan̄ inyọn̄ isi igwook me agan̄ mbum-ura, ikiweek ikọ Okumugwem, ire, ema kpebemun̄ lek.

¹³“Me usen ya, ujuja obaak nsabọn ibaan̄ mè nsabọn irieen̄ ìnyenye lek mêgak iweek mije urak-ebek ikọ Awaji.

¹⁴Ebi ìkisa awaji ebi Sameria ya, eyi òsa awọ itet ebi Ijeren, inyan̄a ibot, mè ikibe, ‘Kè lek ugwem awaji kinyi, enyi ebi Dan,’ mè ìre, ‘Kè lek oniin̄ mbuban ekije isi ama Bieseba.’ Ema mêrurọn̄ọ, kpebeyaka inan̄a ikeke ofifi.”