Read obolo Emọs 9 Bible Online

Emọs 9 - obolo bible

Emọs 9

¹Nnenimun̄ Ogwukaan̄-ene okekebe me agba lek ntook, mè itumu ibe: “Sulu inyọn̄ ibot atà Uwu Mbuban cha nye, inyi ọdọ uwu ya isisik. Gọ atà kan̄ cha gwook, inyi igbugbọ ikpukpuku ibot ebi geelek ìkup me irak kiban̄. Ebi geelek ìsisik, mâsa oge akọn̄ ikpan̄. Ogwu iweek ililibi inan̄a, ìkpokọt ilibi; ogwu iweek inwọnwọnọ, ìkpokọt inwọnọ.

²Ìrere ema erọrọkọ ijọn̄ isi ire ama ekwukwu, ubọk n̄a ìborere ema lek me ere ya; ikerere ema ewuwulu ifo akpabin inyọn̄, emi mâtaba ema inito me ijọn̄.

³Ire ema inene ifo inyọn̄ ibot ogoon̄ Kamen isi ilet, emi mâweek ema imun̄, mè itet ema; ire ema ilet me ijọn̄ ejit okwaan̄, inyi chieen̄ n̄a ikamun̄ ema, emi mânyi ijijinu òluk me ere ya ida ibe iloon̄ ema.

⁴Ikerere ebi ochicha kiban̄ ekpulu ema me akọn̄ isa ifo, emi mânyi oge akọn̄ ida me ere ya ibe ikpan̄ ema. Mâgwuun̄ chieen̄ n̄a me lek kiban̄, inyi ǹrọ ema ijo inu, ìkare ata inu.”

⁵Ogwukaan̄-ene Okumugwem Ogwukaan̄ Inyọn̄ mè Ijọn̄, ọmọ ore ogwu òchachak ubọk me linyọn̄, linyọn̄ otọtọk ita, otutuuk ebi ìluk me linyọn̄ efefieek ejit; otutuuk lek ijọn̄ owuwuku imeen̄ ere kubọk okwaan̄ Nali, mè igele isiki kubọk okwaan̄ ebi Ijipiti.

⁶Îre ọmọ onama ubene ubene uwu ubọọn̄ kan̄ me akpabin inyọn̄, mè itọbọ ọdọ uwu ya me linyọn̄; ọmọ okitaba mun̄ òkup me okwaan̄, mè òben ògbuku ogwook me linyọn̄. Okumugwem ore erieen̄ kan̄.

⁷Okumugwem ìtumu ibe, “Enyi ebi Ijeren, me atikọ, inu yaage ebi Etiopia erebe me lek n̄a ke enyi ere. Îre emi nsan̄a enyi ebi Ijeren isibi me Ijipiti, mè isan̄a si ebi Filisia isibi me Kafitọ, mè isan̄a si ebi Aram isibi me Kiri.”

⁸Okumugwem îtumu si ibe ikeyi: “Ìkpọ, emi Ogwukaan̄-ene Okumugwem, chieen̄ n̄a ìgwọgwọk ikikpọ ebi ido Ijeren cha ìkirọ ijo inu. Emi mâjijaka ema isan̄a me linyọn̄, ire, m̀kpachep uwu kè Jekọp isan̄a isi ge.

⁹Mije, mâninyi ida, mâsisik ebi Ijeren, me etete ebi ofifi ido geelek; mâsisik ema kubọk ekisisik akpa me emen ugen̄, nkwukwuuk geege ìkporọn̄ me ijọn̄.

¹⁰Ebi ijo ife me etete ebi n̄a, ebi ìkitumu ibe, ‘Ùrioon̄ geege ìkpotoon̄ eji, ìkporere eji lek;’ ema otutuuk mêkwaan̄ isan̄a me otu oge akọn̄.

¹¹“Me usen ya, mâjibi mkpulu kè Debit òrọrọn̄ ibene igwuun̄. Mânama ere òbabak me lek ichit, mè ibene ere òkpukpukpuku inen̄e isun̄; mânama, inyi ikup kubọk îkupbe me mgbọ òraraka,

¹²inyi ema mêkaan̄ ebi ìsisik me Edọm, mè ikaan̄ si ebi ofifi ido ìkichieek erieen̄ n̄a. Emi Okumugwem, ogwu òborọ inu chi, ntumu.”

¹³Okumugwem îtumu si ibe: “Usen òkinu, mgbọ mêkupbe me lek irọrọkọ uko mege ire mgbọ mêgbọbe ayaya uko, mè ikup me lek ichichimi gerep mege ire mgbọ mêwopbe ayaya mfut gerep. Mgbọ ya, aya miin̄ môkigbuk me lek ogoon̄ isibi, mè ikigbọọk me lek orioon̄ isibi.

¹⁴Mâsa ebi n̄a, ebi Ijeren, ebi ekpulube me akọn̄ igwu ikom ika; ema mêneninama ama kiban̄ ejijakabe cha, mè iluk me emen. Ema mêwop ebi kè uko gerep, mè inwọ miin̄ òsibi me lek, mè iwop ebi kè uko mfut uti, mè irie mfut ònan̄a me lek.

¹⁵Emi mâwop ebi Ijeren ikam me inyọn̄ ijọn̄ kiban̄; kpebekọt iyaka ikpọk isan̄a ema isan̄a me inyọn̄ ijọn̄ kiban̄, eyi emi nnyibe ema. Emi Okumugwem Awaji kinyi ntumu.”