Read obolo Obid 1 Bible Online

Obid 1 - obolo bible

Obid 1

¹Eyi ìre ilaak ọkpọchieen̄ eyi Obidaya omun̄be. Inu Ogwukaan̄-ene Okumugwem otumube ibak ebi ido Edọm ìre ikeyi: “Eji mîbọkọ etip ònan̄a me ubọk Okumugwem inu; mîria ogwu ikwaan̄ ibe isi ilook otutuuk ebi ido geelek ibe, ‘Ìnan̄a ìkeke, mè eji ejibi akọn̄ esi lek ebi Edọm!’ ”

²Okumugwem onenitumu inyi ebi Edọm ibe, “Ìkpọ, mârọ inyi enyi esiki enenen me chieen̄ ebi ido geelek; mêkpọ enyi chieen̄ isiki enenen.

³Ugumulek òkup enyi me ejit îfiaan̄ enyi, enyi ekiluk me emen udọn̄ me lek ewuuk, mè isa inyọn̄ ubene ogoon̄ irọ ere nluk kinyi, mè ikisa me ikeya ikitumu me ejit kinyi ibe, ‘Ìre ekene obokọt isan̄a eji inito me ijọn̄?’

⁴Ikerere òwuwulu ichep me akpabin inyọn̄ kubọk igo, ikerere ònanama uwu kwun̄ me etete ebi kè ntoronyan̄, emi mâtọp owu me ere ya itọbọ ikaak me ijọn̄. Emi Okumugwem ntumu.

⁵Ire ebi inọ inu enyi me lek, mè ìre ebi inọ afa enu me eririeen̄, ema ebechiin̄ oke inu echi ejit kiban̄ otọbe. Ire ebi ìkigbeme gerep inu enyi me lek, ema kpebelọlọ igbegbeme isik echi ekirọrọọn̄. Ire, ebi ochicha kwun̄ ebechachan owu irak.

⁶Jei, Isọ,[1] ebekwọkwọọk owu irak; otutuuk inu ubọọn̄ kwun̄ cha oletbe, ebewọwọlọ iweek imun̄, mè ikpulu isa ifon.

⁷Otutuuk ebi melek kinyi erebe ebon ge mêrieen̄ enyi isibi isi igwook me oke ijọn̄ kinyi; ebi melek kinyi elukbe me esuuk mêfiaan̄ enyi ifiin̄, mè itim ikpan̄ enyi; ebi ìkirie inorie kinyi mêtip ufe ikana enyi, ire, enyi kpeberiọọn̄.[2]

⁸“Emi Okumugwem ntumu ibe, me usen ya, emi m̀bajijijaka ebi ìriọọn̄ inu isan̄a me Edọm, mè ijijaka si ebi ìkaan̄ ngobo-ntet isan̄a me inyọn̄ ogoon̄ kè Isọ.

⁹Jei, ama Teman, ukpook mônin̄ igon me lek ebi akọn̄ kwun̄, ebi geelek ìluk me lek ogoon̄ kè Isọ, ebesọsọp ema ikpan̄ isan̄a.”

¹⁰“Mije inu afa owu orọbe me lek ngwan̄ kwun̄ Jekọp, esip môchit owu isi; mêjijaka owu isan̄a ire mgbọ geelek.

¹¹Usen ya, owu òkeke nsọn nsọn me usaba agan̄, mgbọ ebi ichen ekikwọọk inu ubọọn̄ kè Jekọp isibi ifon, mgbọ ebi ofifi ido etibibe iraka inin̄ otunchit kan̄, mè iroon̄ nriroon̄ isa iche Jeruselem inyi lek kiban̄, owu òkup kubọk ene ge me lek ife cha.

¹²Owu kpomokeke nsọn nsọn ikikpọ ngwan̄ kwun̄ me ubelejit, me usen ijo isi otoon̄be ọmọ; owu kpomonwọọn̄ unwọọn̄ me ibot ebi Juda me usen mfufiat onin̄be inyi ema; owu kpomotumu otu ile ikeya inyi ọmọ, me usen ufialek otetbe ọmọ.

¹³Owu kpomoje itibi inin̄ otunchit ebi n̄a, me usen ùrioon̄ otoon̄be ema; owu kpomokeke nsọn nsọn ikikpọ ema me ubelejit me emen ujaralek kiban̄, me usen ufialek okemebe ema; owu kpomofum inu ubọọn̄ kiban̄ me usen jakajaka otoon̄be ema.

¹⁴Owu kpomokeke me ugwaka oniin̄ ikikpan̄ ebi kiban̄ ìlilibi inwọnọ; owu kpomotet ebi kiban̄ ìsisik isa iyaka itap me ubọk ebi ochicha, me usen ufialek otetbe ema.

¹⁵“Usen oyerebet Okumugwem îkup mgbet inyi otutuuk ebi ido geelek. Ubọk owu orọbe inyi ofifi ene, ikeya ke mêrọ inyi owu; inu owu orọbe môgwu ikom initoon̄ owu me ibot.

¹⁶Ike enyi emeen̄be ebi n̄a[3] me inyọn̄ ogoon̄ mbuban n̄a, ikeya si ke otutuuk ebi ido geelek ebekinwọ miin̄ unaan̄-ejit n̄a; ema mênwọ mè ikimeen̄, mè ikwaan̄ ichep dìp dìp kubọk ema kperarak ikup.

¹⁷“Ire, me ogoon̄ Sayọn, unyan̄a môkup inyi ebi ìnwọnwọnọ; ogoon̄ ya môkup me mbuban; ebi owot iman kè Jekọp mêbọkọ ìrot kiban̄ ikaan̄.

¹⁸Ebi uwu kè Jekọp mêkup kubọk ukan̄, ebi uwu kè Josefu mêrere alọm ukan̄; ebi uwu kè Isọ mêre mfurufu, mêchim ukan̄ itap me lek kiban̄, mè iwọp ema itaka iriọk. Kpunu ene geege òbonwọnọ me uwu kè Isọ. Emi Okumugwem ntumu.”

¹⁹“Ebi emen èwê agan̄ osiki mênenibọkọ ogoon̄ kè Isọ me ìrot; ebi inyọn̄ orioon̄ isi ogoon̄ me agan̄ ichep-ura mênenibọkọ ijọn̄ ebi Filisia. Ema mêluk me lek oron ebi Iferem, mè iluk si me lek oron ebi Sameria, sà ebi uwu kè Benjamin ebebọkọ Giliadi me ìrot.

²⁰Urum ebi Ijeren keyi ekpulube me akọn̄ isa ifo Kenan, ebekaan̄ otutuuk ijọn̄ ido ebi Fonisia isi igwook me Jerefat; sà ebi ekpulube me akọn̄ me Jeruselem isa ifo Sefaradi, ebebọkọ ama echi òkup me emen èwê agan̄ osiki cha me ìrot.

²¹Ebi ìnyan̄a ene mêneninene isi ikup me ogoon̄ Sayọn ikikpulu lek ogoon̄ kè Isọ. Mgbọ ya, irek mkpulu mônenikana ire eyi Okumugwem.”