Read obolo Jona 1 Bible Online

Jona 1 - obolo bible

Jona 1

¹Usen ge, Okumugwem onenitumu inyi Jona gwun̄ kè Amitai ibe,

²“Si Ninife, ama ile ya, mè tumu ikọ keme ama ya, mije, ijo inu kiban̄ îra ire isi n̄a.”

³Ire, Jona olilibi inan̄a ibosi Tasis, inan̄a me isi Okumugwem. Inenije isi Jọpa, mè imun̄ uji òbosi Tasis, mè ikpe ikpoko uji, mè iraka inin̄ uji ya, ibogọọk isi Tasis, inyi ọmọ ilibi inan̄a me isi Okumugwem.

⁴Okumugwem oraria unye efet itoon̄ me isi mun̄ me okwaan̄, uga egwijo obebene me okwaan̄ ya. Ekoon̄ okekitọbọ uji ya kubọk ìbotọtọbọ ibum.

⁵Ukpook oninin̄ ijot emen ebi ikwaan̄ uji ya, ema ebebene ikitaan̄ ukpo, ogwu ikup ògwen awaji ama kiban̄, mè ikikpulu inu etapbe me uji ya itọọn̄ igwook me okwaan̄, inyi uji ya ifet. Ire, Jona ojeje ikwala isiki ifo agan̄ irak irak uji ile ya isi isiki ilaak, mè ilaak idọk.

⁶Ogwu ibot ebi ikwaan̄ uji ya onenije inu me lek kè Jona, mè inibe ọmọ, “Une, òjeje ikilaak idọk ikeyi! Nan̄a keke, mè gwen awaji kwun̄! Usini mgbọ, awaji kwun̄ môkọt imun̄ eji me emen ufialek yi, mè ito eji nsan, inyi eji ekachieen̄ ìta.”

⁷Ebi ikwaan̄ uji ya enenitumu me lek kiban̄ ibe, “Ngwa, eji eneroon̄ nriroon̄ esa eweek eriọọn̄ ogwu ufialek yi ojebe me ibot inire eji lek.” Nriroon̄ ya otetet Jona.

⁸Ema enenido Jona ibe, “Tumu-nu nyi eji, ìre ufialek yi ìnan̄a me lek ekene inirọn̄ ikeme eji? Keke ore ukot mbọm kwun̄? Owu ònan̄a me owa? Owu ìre ogwu kpasi ido? Owu ìre ogwu otu usem eyi owa?”

⁹Jona ofọfọọk ibe, “Emi ìre ogwu Iburu, ǹkitọbọ ebum inyi Okumugwem, Awaji òkup me inyọn̄, ogwu òrorom okwaan̄ mè nchat ijọn̄.”

¹⁰Uga ukpook otetet ebi ife cha, ema ekekido ọmọ ibe, “Ìre kpasi inu ke owu orọ ikeyi?” Ema mîriọọn̄ ibe ke Jona ìkilibi inan̄a me isi Okumugwem, mije, îwuuk lek itumu inyi ema.

¹¹Ema enenido ọmọ ibe, “Ìre keke ke eji eberọ owu, inyi ogbururu yi iwọ?” Ema edo ikọ ya, mije, ogbururu ya ìkpọkpọ ikinye si ifo isi.

¹²Jona ofọfọọk ema ibe, “Ìben emi ìtọp ìto me emen okwaan̄, ke okwaan̄ môlọkọ inyi enyi. Mije, nriọọn̄ ibe ke îre bak me lek n̄a ke uga egwijo yi onirọn̄ ikeme enyi.”

¹³Kpan̄asi ikeya, ife cha ekekisa lek ikọkọp uji ya isi itoon̄ me ijọn̄. Ire, ema kpekọt, mije, ogbururu ya ìkpọkpọ ikinye ikeme ema igak adasi mgbọ.

¹⁴Ema enenitaan̄ ukpo igwen Okumugwem ibe, “Jei, Okumugwem, soso, katele ibe eji ekwaan̄ esan̄a mije ugwem ogwu enerieen̄ yi. Kakpe eji mkpukpe eje ene ogwu ikarọge inu geege ìlọ. Mije, îre inu òneme owu ke owu orọ.”

¹⁵Ema erarak Jona ibene, mè iben itọp ito me okwaan̄, ogbururu ya, òbabaan̄ ijot okwaan̄, owọwọ mgbọ yaage.

¹⁶Uga ukpook otetet ema enenen me lek Okumugwem, ema egwagwa ngwugwa inyi Okumugwem, mè inyan̄a ibot isa ichieek ọmọ use.

¹⁷Okumugwem oraria ikpele anam-irin̄ ge, inyi inimen Jona. Jona okukup me emen owot anam-irin̄ ya egwe ita mè eririeen̄ ita.