Read obolo Ifuk 11 Bible Online

Ifuk 11 - obolo bible

Ifuk 11

¹Ike mgbọ okije, ebi Ijeren enenikinunuun̄ me isi Okumugwem mije ufialek kiban̄. Okumugwem onọnọ, mè inaan̄ ejit enenen inyi ema, mè iria ukan̄ kan̄ itap me etete kiban̄. Ukan̄ ya otataka ebi ìluk me agan̄ ge me òta ere m̀gba-ǹgwele ukan̄ ya.

²Ebi Ijeren etataan̄ ukpo ito ito inyi Mosis. Mosis orariaak uriaak igwen Okumugwem. Ukan̄ ya oniniin̄.

³Egwegwen ere ya Tabera,[6] mije ukan̄ Okumugwem osakbe itaka ebi Ijeren me ere ya.

⁴Ulọk ebek ofifi chieen̄ inorie obebene ikisisaak ebi ofifi ido ìgwugwugwa me etete ebi Ijeren. Ebi Ijeren si egọgọọk ibene ikito lek ibe, “Jei, ìre ekene oboninyi eji ukpọk ukpọk lek anam?

⁵Eji mîkeek irin̄ cha eji ekitaka ọsọ ọsọ me Ijipiti. Ìre kukumba cha ke eji ebekeek mọnọ, sà ìre osisem mun̄ mun̄, mè ayook ukut lek, mè ìyaka ire ata ayook, sà ìre ayook okuket?

⁶Ire, mgbọ keyi, inorie îgbuuk ene! Mije, kpunu inu geege òkukup irerie, ilọ me lek mana yi gaalek.”

⁷Mana ìkup ibot kpiri kpiri kpiri kubọk ukwuuk uti kọrianda, mè itana okuket.

⁸Mgbọ mana yi isirep igwook ichit ijọn̄, ebi ene mîra ikisibi isi ikwọọk isa ika, mè inikọk me inyọn̄ ewuuk, mè ìyaka ire, itun̄ me emen otik, mè item me otin̄, mè ìyaka ire, isa irọ fituru. Îra ikitop kubọk nchicha esabe aran̄ olifu ikala.

⁹Mgbọ mbat okirọn̄ọ igwook me ijọn̄ me eririeen̄ ke mana okirọn̄ọ igwook me ijọn̄ me ere m̀gba-ǹgwele ukan̄ ya.

¹⁰Usen ge, Mosis oneninọ ebi ene me ototun̄ ukan̄ geelek ekito ito me isotu uwu ọfọ kiban̄. Inu ya onanaan̄ Okumugwem ejit iraka iman̄, mè isisaak Mosis enenen.

¹¹Mosis onenido Okumugwem ibe, “Ìre kpasi ufialek ire eyi obenbe itap emi ogwu usun̄ kwun̄ me lek ikeyi? Ìre keke ke nrọ owu ilọ, eyi owu obenbe ufialek otutuuk ebi ife chi isa inikeme emi ikeyi?

¹²Ìre emi mben otutuuk ife chi me owot? Sà ìre emi mman ema ni, eyi owu obe emi m̀ben ife chi ǹkaan̄ me ubọk, kubọk ogwu òban okiben nsek gwun̄ me ubọk, mè ǹsa ema ǹsi lek ijọn̄ ya eyi owu ochieekbe ebi nte nte kiban̄ use?

¹³Ìre emi m̀basa anam me ere owa ininyi otutuuk ebi ife chi etaka, eyi ema ekito ito ibe emi ǹnennyi ema anam etaka?

¹⁴Emi m̀kpakọt ibeme otutuuk ufialek ife chi, ibot n̄a gaalek. Eyiyi îlobo igak emi.

¹⁵Ire ikeyi ke owu oborọ emi me lek, kpọkpọ kpan̄ emi isi ge, ire owu oma emi, inyi nkakup me ugwem ìtaka lek me otu.”

¹⁶Okumugwem otutumu inyi Mosis ibe, “Gobo akọp ebi ugane jaaba me etete ebi ugane Ijeren sibi nyi emi, ebi owu oriọọn̄be ibe ìre ebi ìkikọt ikpulu ebi ene ijaan̄, mè ire si ebi ebi ene ekinyi ulibi. Sa ema na me isi Atanga Chinichini, inyi enekeke me ere ya melek kwun̄.

¹⁷Emi mâsibi inu me ere ya initumu ikọ melek kwun̄. Mâmọnọ usini me lek ekwukwu òkup me emen kwun̄ isa itap me emen kiban̄, inyi ema egọọk owu ebeme ufialek ebi ife chi, inyi owu okayaka ìbeme ufialek cha owu gaalek.

¹⁸“Tumu nyi ebi Ijeren ibe ke emi Okumugwem m̀be, ‘Ìgwọk lek kinyi ìban egwe iyakwut, ke enyi mêtaka anam. Mije, enyi ekito ito inyi Okumugwem ibe mè ìre ekene obonyi enyi anam, mè ikitumu ibe ke Ijipiti înwọn enyi me lek. Mgbọ keyi, Okumugwem mônyi enyi anam. Enyi mênitaka anam.

¹⁹Ìkare usen ge gaalek ke enyi ebetaka anam ya. Ìkarere si usen iba. Ìkare usen go gaalek. Ìkare akọp usen. Ìkarere si akọp usen iba gaalek.

²⁰Enyi mêtaka anam ya otuuk kè onyan̄ ge, mege ire lek anam môkisibi enyi me inwọm, mè igbuuk enyi, mè ijọ enyi ejit. Mije, enyi mîjit emi Okumugwem ogwu òkup me etete kinyi, mè ikito ito me isi n̄a ibe mè ìre keke orọ enyi enan̄abe isibi me Ijipiti.’ ”

²¹Mosis onenitumu ibe, “Ìin̄-iin̄-ìin̄! Otuuk kè efit obop ene gweregwen ebi emi nkupbe me etete kiban̄, ke owu obe ke owu mônyi anam, mè etaka otuuk kè onyan̄ ge!

²²Ire ekpan̄ otutuuk arọọn̄ mè ebot mè eriembuuk chi, ìre eya môso otutuuk kiban̄ ni? Ikerere otutuuk irin̄ òkup me okwaan̄, ìre ìbojeje iso ema?”

²³Okumugwem ofọfọọk Mosis ibe, “Ìre ubọk Okumugwem ìre mgbidim ni? Mgbọ keyi, owu mômun̄, mè ìre ikọ n̄a môrọ iso inyi owu, mè ìre ìkporọ iso.”

²⁴Mosis oneninan̄a isibi, mè isa ikọ ya Okumugwem otumube inyi ọmọ isi itumu inyi ebi Ijeren, mè inigobo akọp ebi ugane jaaba isibi me etete ebi ugane Ijeren, mè inisa ema isi ikeke ikana Atanga Chinichini ya okokop.

²⁵Okumugwem onenigele isibi inu me emen oduku inyọn̄, mè ikitumu ikọ melek kè Mosis, mè inimọnọ usini me lek ekwukwu òkup me emen kè Mosis isa itap me emen akọp ebi ugane jaaba cha. Mgbọ ekwukwu ya onin̄be emen ife cha, ema ebeben nriran. Ire, ema kpeben nriran ya ijọn̄ọ mgbọ.

²⁶Ene iba, me etete akọp ebi ugane jaaba cha, kpegọọk isibi isi lek Atanga Chinichini ya, ema ebia me emen ere m̀gba-ǹgwele ukan̄ ya. Erieen̄ ene iba cha ìre Elidadi mè Medadi. Ubọk geelek ema kpegọọk isibi isi ere ya, ekwukwu ya oninin̄ si me emen kiban̄, ema ekukup me uwu ọfọ kiban̄ iben si nriran.

²⁷Gwun̄ enerieen̄ ge òkukup imun̄, olilibi isi itumu inyi Mosis ibe, “Kpọ, Elidadi mè Medadi ire echilọ mêkiben nriran me emen ama.”

²⁸Josuwa gwun̄ kè Nun, òrere ogwu ntap-ubọk kè Mosis bene me ijija kan̄, otutumu inyi Mosis ibe, “Ogwu nte, Mosis, gban ebi ife cha, inyi ekayaka ìben nriran.”

²⁹Mosis ofọfọọk ọmọ ibe, “Ìre owu òkito mba mije n̄a ni? Kè ònwọn ibe otutuuk ebi eyi Okumugwem chi ekeben nriran! Mebe Okumugwem înyi ema otutuuk ene ekwukwu kan̄, eya kè oneme emi!”

³⁰Mosis onenigwu ikom ifo emen ere m̀gba-ǹgwele ukan̄, ọmọ melek ebi ugane cha.

³¹Efet ònan̄a me ubọk Okumugwem onenibene ikiwut inan̄a me okwaan̄ inin̄ ama, mè iwut ekun̄kun̄ itap ijot emen ere m̀gba-ǹgwele ukan̄ ya. Ekun̄kun̄ cha ojojot otutuuk ere m̀gba-ǹgwele ukan̄ ya, mè ijot si otutuuk inyọn̄ ijọn̄ òkup ikana ere ya, mè itọm ibene me ijọn̄ iso ikeke agbagba otubọk ini, mè iwele ichit ijọn̄ iso ije usen ge me agan̄ geelek.

³²Ebi ene enanan̄a isibi isi ikiteen̄ ofut cha otutuuk egwe usen ya mè otutuuk eririeen̄ ya mè otutuuk ofit iwele kan̄. Ogwu òteteen̄ isip ichit oteen̄ ijot akọp okwun itọ-inu gweregwen. Ema ewewele unọn cha ikana otutuuk emen ere m̀gba-ǹgwele ukan̄ ya, inyi ichat.

³³Anam ya me otu kiban̄ ema ekitaka, ìkagegele-nu ìgwook ema me owot, unaan̄-ejit Okumugwem okpọkpọk ichit ema. Okumugwem oraria uga ijo orukan̄ itap me etete kiban̄, mè isa me ikeya ikpan̄ ema ogbogbo.

³⁴Mije keya ke egwen ere ya Kiborot Atayaba.[7] Mije, îre ere ya ke efuun̄ ebi ìkwaan̄ mkpa mije ulọk ebek anam.

³⁵Ebi Ijeren enenijibi ije inan̄a me Kiborot Atayaba isi Aserot, mè ikup me ere ya.