Read obolo Ifuk 12 Bible Online

Ifuk 12 - obolo bible

Ifuk 12

¹Miriam mè Erọn enenikitumu ikọ ikeme Mosis, bak me lek ogwu enenwaan̄ Kus îkaan̄be me lek nwa, mije, nwa kan̄ ìre ogwu Kus.

²Ema ekitumu ibe, “Ìre Okumugwem ìkitumu ikọ inan̄a me otu kè Mosis gaalek ni? Ìre Okumugwem ìkararak ìtumu ikọ ìnan̄a me otu kiji?” Okumugwem onọnọ ikọ ya ema etumube.

³Mosis ìre enerieen̄ òsisiki lek enenen. Ọmọ osiki lek ichit me etete otutuuk ebilene me linyọn̄.

⁴Mgbọ yaage, Okumugwem otutumu inyi Mosis mè Erọn mè Miriam ibe, “Enyi ene ita, ìsibi ìna me Atanga Chinichini.” Ema ene ita cha esisibi isi lek Atanga Chinichini.

⁵Okumugwem ogegele isiki me emen oduku inyọn̄ inu me isotu Atanga Chinichini ya, mè inigwen Erọn mè Miriam ibe enu. Ema ene iba enanan̄a isibi isi.

⁶Okumugwem onenibe ema, “Mgbọ yi, ìgban̄ ikọ mbatumu inyi enyi. “Ire enyi ikaan̄ ogwu nriran me etete kinyi, emi Okumugwem m̀bachili lek n̄a ijeen̄ ene ya me ilaak ọkpọchieen̄, mè itumu ikọ melek kan̄ me emen ilaak.

⁷Ire, ìkare ikeya ke emi nkirọ me lek kè Mosis ogwu ikwaan̄ n̄a. Me otutuuk uwu n̄a, ọmọ ore ogwu ògbegbe utoon̄-ejit.

⁸Emi ǹkitumu ikọ melek kan̄ isi mè isi, mè ikitumu ikọ ikpọk mbum melek kan̄; ǹkakitumu ikọ me urọk ìnyi ọmọ. Ikerere ogugo Okumugwem, Mosis ìkimumun̄. Ìre keke orọ ukpook kan̄ ìkatet enyi? Enyi ejeje ikitumu ikọ ikeme Mosis ogwu ikwaan̄ n̄a ikeya?”

⁹Okumugwem onanaan̄ ejit me lek kiban̄ enenen, mè inan̄a itele ema me ere ya.

¹⁰Oduku inyọn̄ ya òduduku ichit inyọn̄ Atanga Chinichini ya ojijibi ibene inan̄a ifo inyọn̄. Mgbọ yaage, orukan̄ inyakpa obubum ichit Miriam otutuuk lek, akpalek kan̄ okekitana kubọk abalara. Mgbọ Erọn okanabe chieen̄ ikpọ Miriam, ìyaka inimun̄ orukan̄ inyakpa okpọkbe iso otutuuk lek kè Miriam.

¹¹Itutumu inyi Mosis ibe, “Soso, ogwu nte, kayaka ìfieek eji ikọ mije burubut ijo inu yi eji erọbe.

¹²Soso, kajit Miriam ìtele ikeyi kubọk nkwukwu ene, òbet lek ayaya gwun̄ emanbe nkwukwu, eyi usini agan̄ lek ojọbe, mè ijeen̄ ita.”

¹³Mosis otataan̄ ukpo igwen Okumugwem ibe, “Jei Awaji, soso, gwa ogwu enenwaan̄ yi. Soso, nriaak owu.”

¹⁴Okumugwem ofọfọọk ibe, “Mebe ke îre ogwu ute ocho ataak igwook ọmọ me emen isi, ìre ọmọ kpomokup ibọkọ esip usen jaaba? San̄a ọmọ sibi me emen ere m̀gba-ǹgwele ukan̄ si chit me ere ònọnọọn̄, inyi ikup ọmọ gaalek usen jaaba. Otu ifuk usen cha isiraka, si sa ọmọ ka.”

¹⁵Enenisan̄a Miriam isibi me emen ere m̀gba-ǹgwele ukan̄, mè ichit ọmọ me ere ònọnọọn̄ usen jaaba. Ebi Ijeren kpejibi ije inan̄a me ere ya mege ire mgbọ esabe Miriam ika inu.

¹⁶Mgbọ eya orakabe, ebi Ijeren eneninan̄a me Aserot, mè ije inyi isi, mè isi igwugwuun̄ uwu ọfọ kiban̄ me emen èwê agan̄ Paran.