Read obolo Ifuk 17 Bible Online

Ifuk 17 - obolo bible

Ifuk 17

¹Okumugwem onenitumu inyi Mosis ibe,

²“Tumu nyi otutuuk ebi Ijeren ibe ogwu ibot otoko geelek inyi owu mkpat ge me ibot otoko kan̄. Osibọkọ mkpat cha, òsisibi akọp mè mkpat iba igọọk me otu ifuk otoko ebi Ijeren, ge erieen̄ ogwu ibot geelek me lek mkpat kan̄.

³Owu môge erieen̄ kè Erọn me lek mkpat ebi otoko kè Libai. Ogwu ibot otoko ge ìbonyi owu mkpat ge.

⁴Osibọkọ otutuuk mkpat cha, owu môkpulu ema isi igwook me emen Atanga Chinichini me isi okop inyan̄a-ibot, ere nkinichichini melek kwun̄.

⁵Ene geelek mâgobobe, mkpat kè ogwugwa môsek inwan̄ me lek. Sa me ikeyi, mâtap okputut inyi nuunuun̄ ebi Ijeren ekinunuun̄ ikeme enyi, inyi ikayaka ìre emi utọn̄ ìgak ikeya.”

⁶Mosis oneniben ikọ ya isi itumu inyi ebi Ijeren. Otutuuk ebi ibot otoko cha enyinyi Mosis mkpat. Ogwu ikup, onyi mkpat ge me ibot otoko kan̄. Otutuuk osisibi akọp mè mkpat iba. Mkpat kè Erọn si me otu ifuk mkpat cha.

⁷Mosis okpukpulu mkpat cha isi igwook me isi Okumugwem me emen Atanga Inyan̄a-ibot.[10]

⁸Me ofit iwele kan̄, Mosis ojeje isi emen Atanga Inyan̄a-ibot ya, mè isi imun̄ ibe ke mkpat kè Erọn, eyi òkeke inyi otoko kè Libai, îsek inwan̄ me lek, mè itibi oduk, mè igwook ajakajak ijot lek, mè ito si owuwa mfut alimọn òreren̄e me lek.

⁹Mosis onenikpulu otutuuk mkpat cha isa inan̄a me isi Okumugwem isibi isi ijeen̄ otutuuk ebi Ijeren. Ema emumun̄. Ene geelek omọmọnọ mkpat kan̄.

¹⁰Okumugwem otutumu inyi Mosis ibe, “Sa mkpat kè Erọn gwu kom si sun̄ me isi okop inyan̄a-ibot ya, inyi ire inu ikween̄-inu inyi otutuuk ebi unye-ibot ebi Ijeren. Sa me ikeyi, mâtap okputut inyi nuunuun̄ ebi Ijeren ekinunuun̄ ikeme emi, inyi ema ekakwaan̄ ìta.”

¹¹Mosis orọrọ ike Okumugwem onyibe ọmọ ida.

¹²Ebi Ijeren etutumu inyi Mosis ibe, “Jei, eji mênikwaan̄ ita! Eyi kiji îta! Eji mîchieen̄ ita!

¹³Ukpọk ukpọk lek ijeje igbet lek Atanga Okumugwem, ogwu geelek òjeje igbet lek, ìbokwukwu. Ìre ìsibi ibe ke eji otutuuk ene ebekwakwaan̄ ita ni?”